ތިލަމާލެ ބްރިޖް މަޝްރޫއުގެ 72.17 އިންސައްތަ މަސައްކަތް ނިންމާލައިފިއެވެ.
ތިލަމާލެ ބްރިޖުގެ މަސައްކަތްތައް ކުރިއަށްދާ ގޮތުގެ އެންމެފަހުގެ ތަފްސީލު ހާމަކުރަމުން ހައުސިންގ މިނިސްޓްރީން ބުނެފައިވަނީ، މި ވަގުތު ސައިޓުގައި މައިގަނޑު ގޮތެއްގައި ކުރިއަށްދަނީ ބްރިޖްގެ ޑެކަށް ބޭނުންވާ ސެގްމަންޓްތައް ކާސްޓްކުރުމާއި، އެ ތަކެތި އިންސްޓޯލްކުރުމުގެ މަސައްކަތްތައް ކަމަށެވެ.
އެގޮތުން ބްރިޖް ޑެކަށް ބޭނުންވާ ޖުމުލަ 1,222 ސެގްމަންޓްގެ ތެރެއިން 86 އިންސައްތަ ސެގްމަންޓް ކާސްޓްކޮށް ނިމިފައިވާ ކަމަށާއި، މީގެ ތެރެއިން 60 އިންސައްތަ ސެގްމަންޓް އިންސްޓޯލްކޮށް ނިންމާލެވިފައިވާ ކަމަށް އެ މިނިސްޓްރީން ވަނީ ބުނެފައެވެ. މީގެ އިތުރުން ގުޅީފަޅުގައި ބްރިޖާއި ގުޅޭ މަގުތައް ހެދުމުގެ މަސައްކަތް ހަލުވި ދުވެލީގައި ކުރިއަށްދާއިރު، ތިލަފުށީގައި މި ވަގުތު ކުރިއަށްދަނީ ބްރިޖާއި ގުޅިގެން ޖަހަންޖެހޭ ރިވެޓްމަންޓް ޖެހުމާއި ކަލްވާޓްތައް ހަރުކުރުމުގެ މަސައްކަތް ކަމަށް ހައުސިންގ މިނިސްޓްރީން ވަނީ ބުނެފައެވެ.
ތިލަމާލެ ބްރިޖުގެ މަޝްރޫއު އެއްކޮށް ނިންމާލެވޭނީ އަންނަ 2027 ވަނަ އަހަރުގެ ތެރޭގައި ކަމަށް ހައުސިންގ މިނިސްޓަރު ޑރ. ޢަބްދުﷲ މުއްޠަލިބް ވަނީ ވިދާޅުވެފައެވެ.
މި މަޝްރޫއުގައި މާލެއިން ފެށިގެން ގުޅީފަޅާއި ހަމައަށް އަޅާ ބްރިޖުގެ މަސައްކަތް ނިމޭނެ ތާރީހަކަށް މީގެ ކުރިން ދީފައި އޮތީ މި އަހަރުގެ މާރިޗު މަހުގެ 31 ވަނަ ދުވަހެވެ. އަދި ގުޅީފަޅުން ފެށިގެން ތިލަފުއްޓާއި ހަމައަށް މަސައްކަތް ނިމޭނެ ތާރީހަކަށް ދީފައި އޮތީ މި އަހަރުގެ ސެޕްޓެމްބަރު މަހުގެ 30 ވަނަ ދުވަހެވެ. ނަމަވެސް މަސައްކަތް ނިންމަން ދީފައިވާ މުއްދަތު ފަހަނަ އަޅައި ދިޔައިރު ވެސް މަޝްރޫއު ކުރިއަށްގެންދާ ކުންފުނި ކަމަށްވާ އެފްކޮންސްއަށް މި މަސައްކަތް އެއްކޮށް ނިންމާލުމަށް ވަނީ ނުކުޅެދިފައެވެ.
