އޮރިޔާން ކާޑު ހަދައި، ބްލެކްމެއިލް ކުރި އަންހެނަކު ހަ އަހަރަށް ޖަލަށްލާން ހުކުމްކޮށްފިއެވެ.
މި މައްސަލައިގައި ހަ އަހަރަށް ޖަލަށްލާން ކްރިމިނަލް ކޯޓުން ހުކުމް ކުރީ މަރްޔަމް ރިޔާސާ، މާލެ / ގ. ސައުތުބްރީޒްއެވެ.
ކްރިމިނަލް ކޯޓަށް އަޕްލޯޑްކޮށްފައިވާ މައްސަލަ ޝަރީއަތް ނިމުނު ގޮތުގެ ރިޕޯޓުގެ ހުލާސާގައިވާ ގޮތުގައި މަރްޔަމް ރިޔާސާގެ އިޢުތިރާފުން، އޮރިޔާން ކާޑު ހައްދާފައިވާކަން ސާބިތުވެފައިވާތީ، ގާނޫނު ނަންބަރު 17/2014 (ޖިންސީ ކުށުގެ ގާނޫނު) ގެ 44 ވަނަ މާއްދާގެ (ހ) ގެ ދަށުން ކަމަށެވެ.
މަރްޔަމް ރިޔާސާގެ އިއުތިރާފުން، ބްލެކްމެއިލް ކޮށްފައިވާކަން ސާބިތުވެފައިވާތީ، ގާނޫނު ނަންބަރު 17/2014 (ޖިންސީ ކުށުގެ ގާނޫނު) ގެ 35 ވަނަ މާއްދާގެ (ހ) ގެ ދަށުންނެވެ.
އޮރިޔާން ކާޑު ހެއްދުމުގެ ކުށުގެ އުގޫބާތެއްގެ ގޮތުން، އިއުތިރާފުގެ އެއްބަސްވުމުގައިވާ ގޮތުގެމަތިން މަރްޔަމް ރިޔާސާ ތިން (ތިނެއް) އަހަރު ދުވަހުގެ މުއްދަތަށް ޖަލަށް ލުމަށް ވަނީ ހުކުމްކޮށްފައެވެ. އަދި ބްލެކްމެއިލް ކުރުމުގެ ކުށަށްވެސް އޭނާ އިއުތިރާފުވެފައިވާތީ ވަނީ ތިން އަހަރު ދުވަހުގެ ޖަލު ހުކުމެއް އިއްވާފައެވެ.
އެއާއެކު، ރިޔާސާއަށް ޖުލްމަކޮށް ވަނީ ހަ އަހަރު ދުވަހުގެ ޖަލު ހުކުމެއް އިއްވާފައެވެ..
