ރައީސް ޑރ. މުހައްމަދު މުއިއްޒަށް ހުތުރު ތުހުމަތުތަކެއްކޮށް ”އަދަދު“ އިން ގެނެސްދިން ”އައިޝާ“ ޑޮކިއުމަންޓަރީގެ މަސައްލައިގައި ބަޔާން ނެގުމަށް، ކުރިން ސަރުކާރުގެ ބައެއް މަގާމުތަކުގައި އުޅުން އައިޝަތު އީޝާ އަޝްރަފް ހާޒިރުކުރި ނަމަވެސް ބަޔާން ދޭން ދެކޮޅު ހަދައި މާދަމާއަށް އެކަން ފަސްކުރަން އެދެފިއެވެ.
އަދަދު ނޫހުން ގެނެސްދިން ”އައިޝާ“ ޑޮކިއުމެންޓްރީގެ މައްސަލައިގައި ސުވާލުކުރުމަށް، އީޝާ މިރޭ 9:00 ގައި ހާޒިރުކުރީ ހުޅުމާލޭ ފޭސް އެކެއްގައި ހުންނަ ޕޮލިސް ސްޓޭޝަނަށެވެ.
ފުލުހުން އީޝާއަށް ފޮނުވާފައިވާ ޗިޓުގައިވާ ގޮތުން، އޭނާގެ މައްޗަށް ކުރެވޭ ތުހުމަތަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މައްޗަށް ގަޒުފުކޮށް ހަދާފައިވާ ކަމަށް ބުނާ ޑޮކިއުމެންޓްރީގައި ބައިވެރިވުމެއް އޮތް ކަމަށް ކުރެވޭ ތުހުމަތެވެ.
ފުލުހުންގެ ތަހުގީގުގެ ސުވާލުތަކަށްފަހު، މީޑިއާތަކަށް މައުލޫމާތުދެއްވައި އީޝާގެ ގާނޫނީ ވަކީލު މުހައްމަދު ފަރީދު ވިދާޅުވީ، މިރޭ ބަޔާން ނުދޭ ކަމަށާއި އެއީ އީޝާއަކީ ކުޑަކުއްޖަކުވެސް ގެންގުޅޭ މަންމައަކަށްވެފައި މިރޭ ބަޔާން ދޭން އުޅެފިނަމަ އެކަން ދިގުލައިގެން ގޮސްދާނެތީ ކަމަށެވެ.
އެެހެންވެ މާދަމާގެ ގަޑިއަކު ބަޔާން ދޭން ހާޒިރުވާން އެދިފައިވާ ކަމަށާއި ފުލުހުންވެސް އެކަމަށް އެއްބަސްވެ ގަޑި ހަމަޖައްސައިދީފައިވާ ކަމަށް ވަކީލު ވިދާޅުވިއެވެ. އަދި ފުލުހުންވަނީ ޑޮކިޔުމެންޓްރީ އާއި އީޝާއާއި ގުޅުވޭ ހެއްކެއް ހޯދާފައިކަމަށްވެސް ވަކީލުން ބުނެއެވެ.
ފާހަގަކޮށްލެވޭ ގޮތުގައި މި މައްސަލައިގައި އީޝާގެ ޕާސްޕޯޓު ވެސް ވަނީ ހިފަހައްޓައިފައެވެ.
