ބޭންކް އޮފް މޯލްޑިވްސް (ބީއެމްއެލް) ގެ ޑޮލަރު އެކައުންޓްތަކާ ގުޅުވާފައިވާ ކާޑުތައް ބޭނުންކޮށްގެން، ބައިނަލްއަގުވާމީ ރީޓެއިލް ވިޔަފާރި ސައިޓްތަކުން ކަސްޓަމަރުން ބޭނުންވާ އަދަދަކަށް ވިޔަފާރިކުރެވޭނެ ކަމަށް އެ ބޭންކުން ހާމަކޮށްފިއެވެ.
މިކަމާ ގުޅޭގޮތުން ބީއެމްއެލްގެ ސްޕޯކްސް ޕާސަން މުހައްމަދު ސައީދު ވިދާޅުވީ، ޓީމޫ އާއި ޝީއިން ފަދަ އޮންލައިން ވިޔަފާރި ކުރާ ސައިޓްތަކުން ޑޮލަރު އެކައުންޓްގައި ހުރި ފައިސާ ބޭނުންކޮށްގެން މުއާމަލާތް ކުރުމުގައި ބޭންކުން އެއްވެސް ލިމިޓެއް ނުވަތަ ހިފެހެއްޓުމެއް ކަނޑައަޅާފައި ނުވާނެ ކަމަށެވެ. އެހެންކަމުން، ޑޮލަރު އެކައުންޓްތަކުން ކަސްޓަމަރުން ބޭނުންވާ މިންވަރަކަށް މިފަދަ ސައިޓްތަކުން ވިޔަފާރި ކުރެވޭނެ ކަމަށް އޭނާ ވިދާޅުވިއެވެ.
ބޭންކުން ޓީމޫ، ޝީއިން ފަދަ ރީޓެއިލް ވިޔަފާރި ސައިޓްތަކުން ޑޮލަރު އެކައުންޓުން ކާޑު ބޭނުންކޮށްގެން ކަސްޓަމަރަކު ބޭނުންވާ އަދަދަކަށް ވިޔަފާރިކުރެވޭނެއެވެ. މިކަމަށް ބެންކުން ލިމިޓެއް ކަނޑައަޅާފައިނުވާނެއެވެ. ބޭންކުން ހަމައެކަނި އަޅާފައިވާ ފިޔަވަޅަކީ އެފަދަ ސައިޓްތަކުގައި ރުފިޔާ…
— Mohamed Saeed (@BMLSpokesperson) May 5, 2026
ބޭންކުން އިތުރަށް ތަފްސީލް ކޮށްދެއްވި ގޮތުގައި، ބޭންކުން މިހާރު އަޅާފައިވާ ފިޔަވަޅަކީ ހަމައެކަނި ރުފިޔާ އެކައުންޓްތަކާ ގުޅުވާފައިވާ ކާޑުތަކުން ބޭރު ފައިސާގެ މުއާމަލާތް ކުރެވޭ މިންވަރު ވަކި ލިމިޓަކަށް ކަނޑައެޅުމެވެ. މިއީ ރުފިޔާ ކާޑުތަކުން ކުރާ މުއާމަލާތްތަކަށް ބޭންކުން ޑޮލަރު ވިއްކާ އަދަދު ވަކި އުސޫލެއްގެ ދަށުން ހަމަޖެއްސުމުގެ ގޮތުން ކުރާ ކަމެކެވެ.
ނަމަވެސް، ޕްރައިމަރީ އެކައުންޓްގެ ގޮތުގައި ޑޮލަރު އެކައުންޓް ބޭނުންކުރާ ކާޑުތަކުން ކުރާ އެއްވެސް މުއާމަލާތަކަށް މި ލިމިޓްތަކުގެ އަސަރެއް ނުކުރާނެއެވެ. މީގެ ސަބަބުން އޮންލައިންކޮށް ވިޔަފާރިކުރާ ގިނަ އަދަދެއްގެ ކަސްޓަމަރުންނަށް އެމީހުންގެ ޑޮލަރު އެކައުންޓް މެދުވެރިކޮށް އެއްވެސް ދަތިކަމެއް ނެތި މުދަލަށް ފައިސާ ދެއްކުމުގެ މަގު ފަހިވެގެންދާނެ ކަމަށް ބޭންކުން ބުނެއެވެ.
މި ނިންމުމަކީ އޮންލައިންކޮށް ވިޔަފާރިކުރާ ފަރާތްތަކަށް ލިބިގެންދާނެ ބޮޑު ލުޔެއްގެ ގޮތުގައި ބެލެވެއެވެ. ހާއްސަކޮށް ޓީމޫ އާއި ޝީއިން ފަދަ ސައިޓްތަކަކީ ދިވެހިންގެ މެދުގައި ވަރަށް މަގުބޫލު ސައިޓްތަކަކަށް ވުމާއެކު، ޑޮލަރު އެކައުންޓް ބޭނުންކުރާ ފަރާތްތަކަށް މީގެ ފައިދާ ވަރަށް ބޮޑަށް ކުރާނެއެވެ.
