އާސަންދަ ނިޒާމުގެ ދަށުން ބޭސް ލިބުމުގައި ދަތިތަކެއް އެބަހުރި ކަމަށާއި، މިކަން މިހެން ދިމާވަނީ ބޭހުގެ ބްރޭންޑުތައް އަވަސް އަވަހަށް ބަދަލުވާތީ ކަމަށް އާސަންދަ ކުންފުނީގެ މެނޭޖިންގ ޑިރެކްޓަރު އާމިނަތު ޒީނިޔާ މިއަދު ވިދާޅުވެއްޖެއެވެ.
ޒީނިޔާ މި މޭރުމުން ވިދާޅުވީ ރައްޔިތުންގެ މަޖިލީހުގެ ސަރުކާރު ހިއްސާވާ ކުންފުނިތަކާ ބެހޭ ކޮމިޓީ (އެސްއޯއީ ކޮމިޓީ) ގައި ވާހަކަދައްކަވަމުންނެވެ. އެގޮތުން ބޭސް ލިބުމުގައި އަދި ބޭހަށް އާސަންދަ ދިނުމުގައި ދިމާވާ އެންމެ ބޮޑު އެއް ގޮންޖެހުމަކީ އެ ބޭހެއްގެ، އެތެރެކުރާ ބްރޭންޑްތައް އަވަސް އަވަހަށް ބަދަލުވުން ކަމަށް އޭނާ ވިދާޅުވިއެވެ.
އާސަންދަ ދެނީ ރަޖިސްޓްރީވެފައިވާ ބްރޭންޑްތަކުގެ ބޭހަށް އެކަނިކަން ފާހަގަކުރައްވަމުން ޒީނިޔާ ވިދާޅުވީ، ބޭހުގެ ބްރޭންޑްތައް އަވަސް އަވަހަށް ބަދަލުވުމުން އެ ބްރޭންޑަކީ އާސަންދައިގައި ރަޖިސްޓްރީކޮށްފައިވާ ބްރޭންޑަށް ނުވުމުން އާސަންދަ ލިބުމަށް ދަތިވާ ކަމަށެވެ.
”މި ވާގޮތަކީ ބޭސް ސިޓީ ހިފައިގެން ދިޔައީމަ މި ބުނަނީ ތި ބޭހެއް އާސަންދައަކުން ދޫކުރެވޭކަށް ނެތޭ، ބަލައިލާއިރު މި އިންނަނީ މި ބޭހެއް ނީނދޭ އަޅުގަނޑުމެންނާއެކު އެ މީހުންގެ ރެޖިސްޓާވެފައި އިން ލިސްޓަށް ލައިފައެއް، އެ ފާމަސީއެއްގެ ވެސް ޒިންމާއެއް އެއީ އެ އެއްޗެހިތައް ސްކީމްގެ ތެރެއިން ޕްރޮވައިޑްކޮށްދިނުމަށް ލިސްޓަށްލުން އަސްލު އެ އަގުތަކާއެކޮށް ލާންޖެހޭނީ، ބްރޭންޑް އެހާ އަވަހަށް ބަދަލުވާއިރުގައި އޭގެ އެއްވެސް ކޮންޓްރޯލެއް ނެތް،“ – ޒީނިޔާ ވިދާޅުވިއެވެ.
ބޭހުގެ އަގުތައް ކޮންޓްރޯލް ކުރުމުގައި ދިމާވާ ދަތިތަކަށް އަލިއަޅުވާލައްވަމުން ޒީނިޔާ ވިދާޅުވީ. ބައެއް ފާމަސީތަކުން ހެޔޮ އަގުގައި ބޭސް ވިއްކުމަށްފަހު، ބޮޑު އަގުގައި އާސަންދައަށް ބިލްކުރާ ކަމަށެވެ. އަދި ހޯލްސޭލް ރޭޓް ކޮންޓްރޯލް ކުރާނެ ނިޒާމެއް ނެތުމުގެ ސަބަބުން 500 އާއި 600 އިންސައްތައިގެ ބޮޑު ފައިދާއެއް ލައިފައި ބޭސް ވިއްކާކަން މީގެ ކުރިން ބެލި ބެލުމުން އެނގިފައިވާ ކަމަށް އޭނާ ވިދާޅުވިއެވެ.
ޒީނިޔާ އިތުރަށް ވިދާޅުވީ މިކަންކަން ހައްލުކުރުމަށް ”ބަލްކް ޕްރޮކިއުމަންޓް“ އުސޫލުގެ ދަށުން ބޭސް ގެނައުމުގެ މަސައްކަތްތައް ކުރެވުނު ނަމަވެސް، އެގޮތަށް ގެނެވުނީ ވަރަށް މަދު އަދަދެއްގެ ބޭސް ކަމަށާއި އެއީ އަމިއްލަ ވިޔަފާރިތަކަށް ވެސް ދަތިވާ ކަމެއް ކަމަށެވެ.
