ޕީޕަލްސް ނެޝަނަލް ފްރަންޓް (ޕީއެެންއެފް) އިން ސިޔާސީ ޕާޓީތަކުން ގެންގުޅެން ޖެހޭ އާންމު އިޖުތިމާއީ މިންގަނޑުތަކާ ހިލާފަށް ކުރަމުން އަންނަ މުޒާހަރާތަކާއި ގުޅިގެން ރައްޔިތުންގެ މަޖިލީހަށް ގަރާރެއް ހުށަހަޅައިފިއެވެ.
ވެރިކަން ކުރާ ޕާޓީ ޕީއެންސީގެ ފަރާތުން ރައްޔިތުންގެ މަޖިލީހަށް މި ގަރާރު ހުށަހެޅުއްވީ ހޮޅުދޫ ދާއިރާގެ މެންބަރު ޢަބްދުއްސައްތާރު މުޙައްމަދެވެ. މި ގަރާރުގައި ބަޔާންކޮށްފައިވާ ގޮތުގައި، ގާނޫނުއަސާސީން ކޮންމެ ދިވެހި ރައްޔިތަކަށް، ފިކުރުކުރުމާއި ހިޔާލު ފާޅުކުރުމާއި ސިޔާސީ ޕާޓީ އުފައްދައި ހަރަކާތްތެރިވުމުގެ ހައްގު ދީފައިވަނީ އިސްލާމްދީނުގެ ރިވެތި އުސޫލުތަކާ އެއްގޮތަށް، އެހެން މީހުންގެ އަބުރަށް އިހުތިރާމުކޮށް، ގައުމީ މަސްލަހަތު އިސްކޮށްގެން ކަމަށެވެ.
މީގެ އިތުރުން، ސިޔާސީ ޕާޓީގެ ގާނޫނުގެ 45 ވަނަ މާއްދާއާއި ހިލާފަށް، ބައެއް ސިޔާސީ ޕާޓީތަކުން ސިޔާސީ ހަރަކާތްތައް ހިންގައި، މަސްލަހަތު ނަގާލައި ގާނޫނުގައި ކަނޑައަޅައިފައިވާ އުސޫލުތަކާއި ހިލާފަށް ހަރަކާތްތައް ހިންގަމުންދިޔުމުގެ ސަބަބުން މާލޭގައި ދިރިއުޅޭ ރައްޔިތުންނަށް އެކަމުގެ ސަބަބުން ދަތިވާކަމަށް މި ގަރާރުގައި ބަޔާންކޮށްފައިވެއެވެ. ހަމައެހެންމެ މިފަދަ ހަރަކާތްތައް ހުއްޓުވައި, ހަރަކާތްތައް ހިންގާ ފަރާތްތަކާއި މެދު ހަރުކަށި ފިޔަވަޅު އެޅުމަށް މި ގަރާރުގައި ވަނީ ގޮވާލައިފައެވެ.
ޕީއެެންއެފްއިން ގާނޫނީ އިމުގެ ބޭރުން މުޒާހަރާތަކާއި އެއްވުންތައް ބާއްވަމުން އަންނާތީ އެ ޕާޓީއާއި މެދު ފިޔަވަޅުއަޅާނެ ކަމަށް އިލެކްޝަންސް ކޮމިޝަނުން ވެސް ވަނީ ބުނެފައެވެ.
