ށ. މިލަންދޫގައި ތަރައްޤީކުރާ އެއާޕޯޓަށް ބޭނުންވާ ބިން ހިއްކުމުގެ ބިޔަ މަޝްރޫޢު ކާމިޔާބުކަމާއެކު ނިންމާލައިފިކަން ރައީސުލްޖުމްހޫރިއްޔާގެ ސޯޝަލް މީޑިއާ މެދުވެރިކޮށް ހާމަކުރައްވައިފިއެވެ.
މި މަޝްރޫޢުގެ ދަށުން ބިން ހިއްކުމުގެ އަމަލީ މަސައްކަތް ފަށާފައިވަނީ 2026 އޭޕްރީލް 03 ވަނަ ދުވަހުއެވެ. އަދި މުޅި މަޝްރޫޢުގެ ބިން ހިއްކުމުގެ މަސައްކަތް އެއްކޮށް ނިންމާލާފައިވަނީ 2026 މޭ 04 ވަނަ ދުވަހުއެވެ. އެހެންކަމުން، މި ބިޔަ މަޝްރޫޢުގެ ބިން ހިއްކުމުގެ މަސައްކަތް ނިންމާލުމަށް ހޭދަވެފައިވަނީ އެންމެ 31 ދުވަހެވެ.
މި މަޝްރޫޢުގެ ތަފްޞީލަށް ބަލާއިރު، އެއާޕޯޓަށް ބޭނުންވާ 21 ހެކްޓަރުގެ ބިން މިހާރު ވަނީ އެއްކޮށް ހިއްކައި ނިންމާފައެވެ. މިއީ މި މަސައްކަތުގެ 100 އިންސައްތައެވެ. މީގެ އިތުރުން، ރަށުގެ މިހާރު އޮތް ބިމުން 4.9 ހެކްޓަރުގެ ސަރަޙައްދަކުން ގަސް ނެގުމުގެ މަސައްކަތް ކުރިއަށް ގެންގޮސްފައިވާއިރު، އެއާޕޯޓް މަޝްރޫޢުގެ ޖުމްލަ ސަރަޙައްދަކީ 25.90 ހެކްޓަރެވެ.
Sh. Milandhoo Airport Reclamation Completed.
– Commencement Date: 03rd April 2026
– Completion date: 04th May 2026
– Duration: 31 Days
– Reclaimation Total Area: 21 Ha
– Area Reclaimed: 21 Ha
– Percentage completed: 100%
– Tree Removal area existing island: 4.9Ha
– Total… pic.twitter.com/4OyqPYWOms— Dr Mohamed Muizzu (@MMuizzu) May 5, 2026
މިލަންދޫ އެއާޕޯޓަށް ބޭނުންވާ ބިން ހިއްކުމަށްޓަކައި ޖުމްލަ 1,134,534 ކިއުބިކް މީޓަރުގެ ވެލި ބޭނުންކޮށްފައިވެއެވެ. މި މަސައްކަތް ހަލުވި މިނެއްގައި ނިންމާލުމަށް ބޭނުންކޮށްފައިވަނީ ދުނިޔޭގެ އެންމެ ބޮޑު އެއް ޑްރެޖަރު ކަމަށްވާ ”ކުއީން އޮފް ދަ ނެދަލޭންޑްސް“ އެވެ. މި ބޯޓަކީ އެއްފަހަރާ 35,000 ކިއުބިކް މީޓަރުގެ ވެލި އުފުލުމުގެ ގާބިލުކަން ލިބިފައިވާ ބޯޓެކެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރަށްރަށުގެ ތަރައްޤީއަށް ކުރިއަށްގެންދަވާ މިފަދަ މަޝްރޫޢުތަކަކީ ރައްޔިތުންނަށް ބޭނުންވާ އަސާސީ ޚިދުމަތްތަކާއި ދަތުރުފަތުރުގެ ނިޒާމު ހަރުދަނާކުރުމަށް ކުރެވޭ މުހިންމު މަސައްކަތްތަކެކެވެ. މިލަންދޫ އެއާޕޯޓުގެ ބިން ހިއްކުމުގެ މަސައްކަތް ނިމުމަކީ އެ ސަރަޙައްދުގެ އިޤްތިޞާދީ އަދި އިޖުތިމާޢީ ކުރިއެރުމަށް ލިބުނު ބޮޑު ފުރުޞަތެކެވެ.
