ތިލަދުންމަތީ އުތުރުބުރީ ތުރާކުނު ކައުންސިލުން ރަށުގެ ރައްޔިތުން ބޭނުންވާ ކަންކަމާއި ރައްޔިތުންނަށް އެންމެ މުހިންމު ކަންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އާ ހިއްސާކުރައްވައިފިއެވެ.
ރައީސް، ތުރާކުނު ކައުންސިލާ ބައްދަލުކުރައްވާފައި ވަނީ މިއަދު ހަވީރު އެ ރަށު ސްކޫލުގައެވެ.
މި ބައްދަލުކުރެއްވުމުގައި ތުރާކުނު ކައުންސިލުން ވަނީ ރަށުގައި ޒަމާނީ ފެންވަރަށް މަގު ހެދުމަށް ބޭނުންވާ ކަމަށާއި ދިވެހިރާއްޖޭގެ އިސްލާމީ ބިނާއެއް ރަށުގައި ގާއިމުކުރުމަށް ބޭނުންވާ ކަމަށާއި ކުޅިވަރުގެ ދާއިރާއިން ޒުވާނުން ބޭނުންވާ ކަންކަން ހިއްސާކުރައްވާފައެވެ. އަދި ތުރާކުނު ކައިރީގައި އޮންނަ ވަނގާރު އެ ރަށުގެ އިހުތިސާސުގެ ތެރެއަށް ލުމަށް ބޭނުންވާ ކަމަށާއި ކައުންސިލް އިދާރާ އާއި ސްކޫލުގެ ޖާގައިގެ ދަތިކަމާއި ރަށަށް އަރާ ބަނދަރުގައި ހުރި ދަތިކަމުގެ އިތުރުން ބިން ހިއްކުމުގެ މަޝްރޫޢު ކުރިއަށް ގެންދިއުމަކީ ރަށުގެ ރައްޔިތުން ވަރަށް ބޭނުންވާ ކަމެއް ކަމުގައި ކައުންސިލުން ފާހަގަކުރެއްވިއެވެ.
އެ ކަންކަމުގެ އިތުރުން ތުރާކުނުގައި ދިމާވާ ކަރަންޓުގެ މައްސަލަ ފާހަގަކުރައްވައި، ޒަމާނީ ފެންވަރުގައި ކަރަންޓު ދެވޭނެ ގޮތެއް ބޭނުންވާ ކަމަށާއި ރަށުގެ ޞިއްޙީ މަރުކަޒުގައި ހުރި ގޮންޖެހުންތައް ކައުންސިލުން ރައީސް އާ ހިއްސާކުރެއްވިއެވެ.
ތުރާކުނު އަންހެނުންގެ ތަރައްޤީއަށް މަސައްކަތްކުރާ ކޮމިޓީންވެސް ވަނީ އެ ކަނބަލުންގެ ކަންބޮޑުވުންތައް ރައީސް އާ ހިއްސާކުރައްވާފައެވެ. އެގޮތުން ބަޖެޓުގެ ދަތިކަން ތުރާކުނު އ.ތ.މ ކޮމިޓީން ފާހަގަކުރެއްވިއެވެ.
މި ބައްދަލުކުރެއްވުމުގައި ރައީސް ދެއްކެވި ވާހަކަފުޅުގައި، ކައުންސިލުން ފާހަގަކުރެއްވި ކަންކަމަށް ހައްލު ހޯއްދަވައިދެއްވުމަށް ކަމާ ގުޅުންހުރި މުއައްސަސާތަކާ ގުޅިގެން މަސައްކަތްޕުޅު ކުރައްވާނެ ކަމުގައި ވިދާޅުވިއެވެ. ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން ވަނީ ކައުންސިލުން ފާހަގަކުރެއްވި ކަންކަމުގައި ސަރުކާރުން ކުރައްވަމުން ގެންދަވާ މަސައްކަތްތަކުގެ އެންމެފަހުގެ މަޢުލޫމާތު ހިއްސާކުރައްވާފައެވެ.
