މިއަދު ހޮރްމޫޒް ކަނޑުއޮޅިއަށް ވަންނަން އުޅުނު އެމެރިކާގެ ހަނގުރާމަމަތީ މަނަވަރަކަށް މަޖުބޫރުކޮށް، އަނބުރާ ފޮނުވާލާފައިވާނޭ ކަމަށް އީރާނުގެ ރިވޮލިއުޝަނަރީ ގާޑާއި ގުޅުން އޮންނަ އެޤައުމުގެ ނޫސްތަކުން ރިޕޯޓުކޮށްފިއެވެ. ނަމަވެސް މިސައިލް ހަމަލާއެއް ދީފައިވާ ކަމަށް ފެތުރުނު ރިޕޯޓުތައް އެމެރިކާގެ ސެންޓްރަލް ކޮމާންޑުން ވަނީ ވަގުތުން ދޮގުކޮށްފައެވެ.
އެމެރިކާގެ ސެންޓްރަލް ކޮމާންޑުން ބުނި ގޮތުގައި، އެމީހުންގެ ސިފައިން ދަނީ ރައީސް ޑޮނާލްޑު ޓުރަމްޕުގެ ”ޕްރޮޖެކްޓް ފްރީޑަމް“ އަށް އެއްބާރުލުން ދެމުންނެވެ. މިއީ އެމެރިކާ-އިސްރާއީލުން އީރާނާ ދެކޮޅަށް ކުރާ ހަނގުރާމައިގެ ސަބަބުން ގަލްފު ސަރަހައްދުގައި ތާށިވެފައިވާ މުދާ އުފުލާ ބޯޓުފަހަރުތަކަށް މަގުދައްކައިދީ ނެރުމަށާއި، އީރާނުގެ ބަނދަރުތައް ބަންދުކުރުމަށް ހިންގާ މަޝްރޫއެކެވެ.
މީގެ އިތުރުން އެމެރިކާގެ ސެންޓްރަލް ކޮމާންޑުން ކުރި އެހެން ޓުވީޓެއްގައި ބުނެފައިވަނީ ”ޕްރޮޖެކްޓް ފްރީޑަމް“ ފެށިފަހުން އެމެރިކާގެ ދިދަ ޖަހާފައިވާ މުދާ އުފުލާ ދެ އުޅަނދެއް ކާމިޔާބުކަމާއެކު ހޮރްމޫޒް ކަނޑުއޮޅި ހުރަސްކޮށްފައިވާ ކަމަށެވެ.
