ސަލްޓަން ޕާކުގެ މަރާމާތުގެ މަސައްކަތްތައް ކުރިއަށްދާތީ ކޮންމެ ދުވަހެއްގެ އިރުއޮއްސި 18:00 އިން ފެށިގެން އެ ޕާކު އާންމުންނަށް ބަންދުވާނެ ކަމަށް ހައުސިންގ މިނިސްޓްރީން ބުނެފިއެވެ.
ހައުސިންގ މިނިސްޓްރީން އެކްސްގައި ހިއްސާކުރި ޕޯސްޓެއްގައި ބުނެފައިވަނީ، ސަލްޓަން ޕާކު މަރާމާތުކުރުމުގެ މަސައްކަތުގެ ދަށުން ކުރަންޖެހޭ މަސައްކަތްތައް ކުރުމަށްޓަކައި މިއަދުން ފެށިގެން ކޮންމެ ދުވަހަކު އިރުއޮއްސި 18:00 އިން ފެށިގެން އެ ސަރަހައްދު އާންމުންނަށް ވަގުތީގޮތުން ބަންދުވާނެ ކަމަށެވެ. މިކަމުގެ ސަބަބުން އާންމުންނަށް ދިމާވެދާނެ ދަތިތަކަށްޓަކައި އެ މިނިސްޓްރީން ވަނީ މައާފަށް އެދިފައެވެ.
މިދިޔަ ސަރުކާރުން ވީރާނާވާން ދޫކޮށްލާފައިވާ ސަލްޓަން ޕާކު މަރާމާތުކުރުމުގެ މަސައްކަތް މި ސަރުކާރުން ފެށީ މިދިޔަ 2025 ވަނަ އަހަރުގެ އޮގަސްޓް މަހުގެ ތެރޭގައެވެ. އެ ދުވަސްވަރު ސަލްޓަން ޕާކު ބަންދުކޮށްގެން މަރާމާތު ކުރުމަށްފަހު، މި އަހަރުގެ ފިޠުރު ޢީދު ދުވަހާއި ދިމާކޮށް އެ ޕާކު ވަނީ އަލުން ހުޅުވައިފައެވެ.
ނަމަވެސް މިހާރު ކުރިއަށްދަނީ އެ މަޝްރޫއުގެ ދަށުން ކުރިއަށްގެންދަންޖެހޭ އިތުރު މަސައްކަތްތަކެވެ.
ސަލްޓަން ޕާކު މަރާމާތުކުރުމުގެ މަސައްކަތުގެ ދަށުން މިހާތަނަށް ކުރެވުނު މަސައްކަތްތަކުގެ ތެރޭގައި ޕާކުގެ ވިއު ސްޓްރަކްޗަރ، ޓްރީހައުސް، ވޯކްވޭތައް އަދި ކުޑަކުދިން ކުޅޭ ސަރަހައްދުތައް މަރާމާތުކުރުން ހިމެނެއެވެ. މީގެ އިތުރުން، އިށީންދެލައިގެން ތިބޭނެ ބެންޗުތައް ހެދުމާއި، ކޮންކްރީޓް ފްލޯރ މަރާމާތުކުރުމުގެ އިތުރުން ގަރޑަން އަދި ސީސީޓީވީތައް ރަނގަޅުކުރުމުގެ މަސައްކަތްތައް ވެސް ކޮށްފައިވެއެވެ.
ސަލްޓަން ޕާކުގެ އިތުރުން މި ސަރުކާރުން އަންނަނީ މާލެ ސިޓީގެ އެހެން މައިޒާންތައް ވެސް މަރާމާތުކުރުމުގެ މަސައްކަތްތައް ކުރަމުންނެވެ. އެގޮތުން ސުނާމީ ބިނާ މައިޒާނާއި ޖުމްހޫރީ މައިދާން މަރާމާތުކުރުމުގެ މަސައްކަތް އެއްކޮށް ނިންމާލެވިފައިވާއިރު، ރަސްފަންނު މަރާމާތުކުރުމުގެ މަސައްކަތް މިހާރު ވެސް އަންނަނީ ކުރިއަށްގެންދަމުންނެވެ.
