އަހަރަކަށްވުރެ ކުރު މުއްދަތަކަށް ރަށްވެހިވެފައިވީ ނަމަވެސް، 15 އަހަރަށްވުރެ ދިގު މުއްދަތަކަށް މާލެ ސިޓީގައި ދިރިއުޅެފައިވާނަމަ ”ބޯހިޔާވަހިކަން އެންމެނަށް“ ސިޔާސަތުގެ ދަށުން ދޫކުރާ ގޯއްޗާއި ފުލެޓަށް އެދި ހުށަހެޅޭނެ ގޮތަށް ހައުސިންގ މިނިސްޓްރީން އިސްލާހެއް ގެނެސްފިއެވެ.
މިކަން ހާމަކޮށް ހައުސިންގ މިނިސްޓްރީން އެކްސްގައި ހިއްސާކޮށްފައިވާ ޕޯސްޓެއްގައި ބުނެފައިވަނީ، މާލެ ސިޓީގައި އެއް އަހަަަރަށްވުރެ ކުރު މުއްދަތަކަށް ރަށްވެހިވެފައިވާ ފަރާތްތަކަށް ވެސް ގޯއްޗާއި ފުލެޓަށް އެދި ފޯމު ހުށަހެޅޭނެހެން އިސްލާހުތަކެއް ގެނެެސްފައިވާ ކަމަށެވެ. އެފަދަ ފަރާތްތަކުން މާލެ ސިޓީގައި ދިރިއުޅޭތާ 15 އަހަރުވެފައިވާ ފަރާތްތަކުގެ ކެޓަގަރީއަށް ޝަރުތު ފުރިހަމަވާނަމަ، އެޕްލައިކުރެވޭނެ ކަމަށް އެ މިނިސްޓްރީން ވަނީ ބުނެފައެވެ.
1 އަހަރަށްވުރެ ކުރުމުއްދަތަކަށް މާލޭގައި ރަށްވެހިވެފައިވާ ފަރާތްތަކަށް ބޯހިޔާވަހިކަން އެންމެންނަށް ސިޔާސަތުގެ ދަށުން ހިންގާ ޕްރޮގްރާމްތަކަށް އެޕްލައިކުރެވޭގޮތަށް ފޯމަށް ބަދަލުގެނައުން pic.twitter.com/TifxSXRrVM
— Ministry of Infrastructure, Housing and Urban Dev. (@MIHUDmv) May 3, 2026
ހައުސިންގ މިނިސްޓްރީން ބުނެފައިވަނީ ގޯއްޗާއި ފުލެޓަށް އެދި ހުށަހަޅާއިރު، މެދުނުކެނޑި މާލެ ސިޓީގައި ދިރިއުޅޭތާ 15 އަހަރުވެފައިވާ ފަރާތެއްކަން އެނގޭނެ ލިޔެކިއުމުގެ އިތުރުން ރަށްވެހިވި ތާރީހް އަންގައިދޭ ލިޔުމެއް ހުށަހަޅަންޖެހޭނެ ކަމަށެވެ.
މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމަށް އަދުގެ ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ރަސްމާލެއާއި ގިރާވަރު ފަޅު ހިއްކުމުގެ މަސައްކަތް ހަލުވި ދުވެލީގައި ކުރަމުން އަންނައިރު ހުޅުމާލެ ތިންވަނަ ފިޔަވަހި ހިއްކުމުގެ މަސައްކަތް މިހާރު ވަނީ އެއްކޮށް ނިންމާލައިފައެވެ.
ހިއްކަމުން އަންނަ ސަރަހައްދުތަކުން ޖުމުލަ 15،000 އަށްވުރެ ގިނަ ގޯއްޗާއި 7،900 އަށްވުރެ ގިނަ ފުލެޓް މި ދައުރުގެ ތެރޭގައި ދޫކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދެކެވެ. އަދި މިއީ މިހާތަނަށް ސަރުކާރަކުން ހިންގާ ބޯހިޔާވަހިކަމުގެ އެންމެ ބޮޑު މަޝްރޫއުކަން ވެސް ފާހަގަކޮށްލެވެއެވެ.
