ހިރިގަލުން ބިނާ ކޮށްފައިވާ ފަސް އާސާރީ މިސްކިތެއް ދުނިޔޭގެ ތަރިކައިގެ ލިސްޓުގައި ހިމެނުމަށް ހުށަހަޅާފައިވާ ކަމަށް ހެރިޓޭޖް މިނިސްޓަރު ހީނާ ވަލީދު ވިދާޅުވެއްޖެއެވެ.
މިނިސްޓަރު ހީނާ މި މޭރުމުން ވިދާޅުވީ ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ހެރިޓޭޖް މިނިސްޓްރީގެ މަސައްކަތްތަކާއި ގުޅޭގޮތުން މައުލޫމާތުދެއްވަމުންނެވެ. މިނިސްޓަރު ވިދާޅުވީ ދުނިޔޭގެ ތަރިކައިގެ ލިސްޓުގައި ރާއްޖޭގެ ހިރިގަލު މިސްކިތްތަައް ހިމެނުމަށް ނޮމިނޭޝަން ފައިލް ތައްޔާރުކޮށް މި އަހަރުގެ ޖަނަވަރީ މަހުގެ ތެރޭގައި ޔުނެސްކޯއަށް ހުށަހަޅާފައިވާ ކަމަށެވެ.
އެގޮތުން ތަރިކައިގެ ލިސްޓުގައި ހިމެނުމަށް އެދި ޔުނެސްކޯއަށް ހުށަހަޅާފައިވާ ފަސް މިސްކިތަކީ:
- މާލޭގެ ހުކުރު މިސްކިތް
- ހއ. އިހަވަންދޫ ހުކުރު މިސްކިތް
- ރ. މީދޫ ބާ މިސްކިތް
- އދ. ފެންފުށީ ހުކުރު މިސްކިތް
- ލ. އިސްދޫ ހުކުރު މިސްކިތް
މީގެ އިތުރުން މި ލިސްޓުގައި މާލޭ ބަންޑާރަ މިސްކިތުގެ ނަން ހިމަނާފައި ނުވަނީ ކީއްވެތޯ ނޫސްވެރިއަކު ކުރި ސުވާލަކަށް ޖަވާބުދެއްވަމުން ހީނާ ވިދާޅުވީ، އެކަމުގައި މަޝްވަރާ ކުރަންޖެހޭ ފަރާތްތަކާއެކު މަޝްވަރާތައް ކުރެވެމުން އަންނަ ކަމަށެވެ.
މިނިސްޓަރު ހީނާ ވިދާޅުވީ، މި މިސްކިތްތައް އިތުރަށް ދިރާސާކުރުމަށްޓަކައި އާސާރީ ތަންތަނާއި ތަކެތި ހިމާޔަތްކުރުމަށް ހާއްސަ އިންޓަރނޭޝަނަލް ކައުންސިލް އޮން މޮނިއުމެންޓްސް އެންޑް ސައިޓްސްގެ ޓީމެއް އަންނަ ސެޕްޓެމްބަރު މަހު ރާއްޖެއަށް އަންނާނެ ކަމަށާއި، އެ ޓީމުން ރާއްޖެ އައިސް, މިސްކިތްތަކަށް ޒިޔާރަތްކޮށް އެތަންތަން ހުރި ނެތް ގޮތް ބަލައި މޮނިޓަރ ކުރުމަށް ހަމަޖެހިފައިވާ ކަމަށެވެ.
