މީޑިއާތަކަކީ މާލީގޮތުން މިނިވަން އަދި ބާރުވެރި ތަންތަނަށް ހެދުމަކީ އަމާޒެއްކަމަށް މޯލްޑިވްސް މީޑިއާ އެންޑް ބްރޮޑްކާސްޓިން ކޮމިޝަން (އެމްއެމްބީސީ) އިން ބުނެފިއެވެ.
ދުނިޔޭގެ ނޫސްވެރިކަމުގެ މިނިވަންކަމުގެ ދުވަހުގެ ތަހުނިޔާ ފޮނުވާ އެ ކޮމިޝަނުން ނެރުނު ބަޔާނުގައި ބުނީ މި އަހަރުގެ ނޫސްވެރިކަމުގެ ދުވަސް ފާހަގަކުރާއިރު ނޫސްވެރިކަމުގެ އިންޑެކްސްގައި ރާއްޖެއަށް ލިބިފައިވަނީ 108 ކަމަށާއި އެ ދަރަޖަ މަތިކުރަން މަސައްކަތްތަކެއް ކުރަމުން އަންނަކަމަށެވެ.
މިއަހަރުގެ ނޫސްވެރިންގެ ދުވަހުގެ ޝިޢާރުގެ ގޮތުގައި ޔުނެސްކޯއިން ކަނޑައަޅާފައިވާ ޝިއާރަކީ ”ސުލްހަވެރި މުސްތަގުބަލެއް ބައްޓަންކުރުން: އިންސާނީ ހައްގުތަކާއި، ތަރައްގީއާއި ސަލާމަތަށްޓަކައި ނޫސްވެރިކަމުގެ މިނިވަންކަން ކުރިއެރުވުން“އެވެ.
އެމްއެމްބީސީން ބުނީ މި ޝިއާރަށް ފިކުރު ހިންގާއިރު، ގަބޫލުކުރަންޖެހޭ އަސާސީ އެއް ހަގީގަތަކީ ނޫސްވެރިކަމުގެ މިނިވަންކަމަކީ ހަމައެކަނި ލިޔެލާ ލިޔުމެއް ނޫންކަމަށާއި އެއީ މުޖުތަމައުގެ ސުލްހައިގެ ދަންމަރެއްކަމަށެވެ. އަދި އެއީ އިންސާނީ ހައްގުތަކުގެ ދިފާއީ އައްޑަނައިގެ އިތުރުން ތަރައްގީގެ ފެހި މަގުތައް ކޮށައިދޭ އުސޫލުތަކެއްކަމަށެވެ.
އެމްއެމްބީސީން ބުނީ މީޑިއާތަކަކީ މާލީ ގޮތުން މިނިވަން އަދި ބާރުވެރި ތަންތަނަށް ހެދުމަކީ އެ ކޮމިޝަންގެ އެންމެ ބޮޑު އެއް އަމާޒުކަމަށާއޮ ނޫސްވެރިންގެ ރައްކާތެރިކަމާއި، ބޭނުންވާ ޒަމާނީ ތަމްރީނުތައް ހޯދައިދިނުމަކީވެސް ހާއްސަ އިސްކަމެއްދޭ ކަމެއް ކަމަށެވެ.
އެމްއެމްބީސީން ވަނީ މައުލޫމާތު ފެތުރުމުގައި، އެ ކޮމިޝަނުން ކަނޑައަޅާފައިވާ އަހުލާގީ މިންގަނޑާއި އެއްގޮތްވާގޮތުގެމަތިން އަމަލުކުރުމަށް މީޑިއާތަކަށް ހަނދާންކޮށްދީފައެވެ.
