ދައުލަތުގެ ބަޖެޓާ ގުޅޭ އެއްވެސް ވާހަކައެއް ދައްކަން އިދިކޮޅު އެމްޑީޕީން ލަދުގަންނަންޖެހޭނެ ކަމަށް ޙައްޖު ކޯޕަރޭޝަނުގެ މެނޭޖިންގ ޑިރެކްޓަރު މުޙައްމަދު ޝަކީލް ވިދާޅުވެއްޖެއެވެ.
ޝަކީލް މި މޭރުމުން ވިދާޅުވީ އެމްޑީޕީއަށާއި އެ ޕާޓީގެ ޗެއަރޕާސަން އަދި ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާއަށް ފާޑުވިދާޅުވެ، އެކްސްގައި ހިއްސާކުރެއްވި ޕޯސްޓެއްގައެވެ. އެގޮތުން ޕާޓީގައި ފައިސާ ނެތް ކަމަށް ބުނެ އޭނާ ވަނީ އެމްޑީޕީގެ އެތެރޭގެ އިންތިހާބު ފަސްކުރުމަށް ނިންމައިފައެވެ.
އެކަން އެހެން ދިމާވީ ދައުލަތުގެ ބަޖެޓުން މި އަހަރަށް ދޭން ބުނި ފައިސާ އެ ޕާޓީއަށް ލިބިފައިނުވާތީ ކަމަށް ބުނެ އޭނާ ވަނީ ވާހަކަތަކެއް ދައްކައިފައެވެ.
ދައުލަތުގެ ބަޖެޓުން އެމްޑީޕީއަށް ލިބެންޖެހޭ ކޮން ފައިސާއެއްގެ ވާހަކައެއްތޯ ގަޕޯ ތިޔަ ވިދާޅުވަނީ؟ ތިޔަ ވިދާޅުވާ ދައުލަތުގެ ބަޖެޓު ފާސްކުރަން ގަޕޯ އަދި އެމްޑީޕީގެ އެއްވެސް މަޖިލިސް މެންބަރަކު ވޭތުވެދިޔަ ތިން އަހަރު ވޯޓެއް ދިނިންތޯ؟ ދައުލަތުގެ ބަޖެޓާ ގުޅޭ އެއްވެސް ވާހަކައެއް…
— Mohamed Shakeel 🇲🇻 (@schakyyl) May 2, 2026
ޣަފޫރުގެ މި ވާހަކަތަކާއި ގުޅިގެން އެކްސްގައި ހިއްސާކުރެއްވި ޕޯސްޓެއްގައި ޝަކީލް ވަނީ، އެބާވަތުގެ ވާހަކަތަކަކީ ބަޖެޓަށް ވޯޓު ނުދޭ މީހުން ދައްކަންޖެހޭ ވާހަކަތަކެއް ނޫން ކަމަށް ވިދާޅުވެ، އެމްޑީޕީން އެ ދައްކަނީ ދައުލަތުގެ ބަޖެޓުން އެމްޑީޕީއަށް ލިބެންޖެހޭ ކޮން ފައިސާއެއްގެ ވާހަކަތޯ ސުވާލުއުފައްދަވައިފައެވެ.
މީގެ އިތުރުން ދައުލަތުގެ ބަޖެޓު ފާސްކުރަން ޗެއަރޕާސަން ޣަފޫރާއި އެމްޑީޕީގެ އެއްވެސް މަޖިލިސް މެންބަރަކު ވޭތުވެދިޔަ ތިން އަހަރު ވޯޓު ދިނިންތޯ ސުވާލުކުރައްވަމުން ޝަކީލް ވަނީ ބަޖެޓްގެ ވާހަކަދައްކަން އެމްޑީޕީއަށް ނިސްބަތްވާ މަޖިލީހުގެ މެމްބަރުން ލަދުގަންނަންޖެހޭނެ ކަމަށް ވިދާޅުވެފައެވެ.
އެމްޑީޕީގެ އެތެރޭގެ އިންތިހާބު ބާއްވަން ބޭނުންވާ ފައިސާ ނެތް ކަމަށް ބުނެ އެ ޕާޓީގެ އިސްވެރިން ދައްކަމުން އަންނަ ވާހަކަތަކާއި ގުޅިގެން ކުރީގެ ރައީސް މުޙައްމަދު ނަޝީދުގެ ފެކްޝަނަށް ނިސްބަތްވާ ބޭފުޅުން ވަނީ ޕާޓީގެ އެތެރޭގެ އިންތިހާބު ބޭއްވުން އަވަސްކުރުމަށް ގޮވާލައިފައެވެ. މީގެ އިތުރުން އެ ފެކްޝަނުން ވަނީ އެމްޑީޕީގެ އެތެރޭގެ އިންތިހާބަށް ބޭނުންވާ ފައިސާ ހޯދުމުގެ މަސައްކަތް ވެސް ފަށައިފައެވެ.
