އިޒްރޭލާއި، ގަތަރާއި، ކުވައިތުގެ އިތުރުން ޔުނައިޓެޑް އަރަބް އެމިރޭޓްސް (ޔޫ.އޭ.އީ) އަށް 8.6 ބިލިއަން ޑޮލަރަށްވުރެ ގިނަ އަދަދެއްގެ އަސްކަރީ ސާމާނު ވިއްކުމަށް، ކޮންގްރެސްގެ މުރާޖައާއަކާ ނުލައި ރައީސް ޑޮނަލްޑް ޓްރަމްޕްގެ ސަރުކާރުން ހުއްދަ ދީފިއެވެ.
އެމެރިކާގެ ސެކްރަޓަރީ އޮފް ސްޓޭޓް މާކޯ ރޫބިއޯ، މި މިޤައުމުތަކަށް ވަޤުތުން ތަކެތި ވިއްކަންޖެހޭ ފަދަ ކުއްލި ނުރައްކަލުގެ ހާލަތެއް އޮތްކަމަށް ކަނޑައަޅާފައިވާ ކަމަށާއި، އެހެންކަމުން މި މުއާމަލާތްތަކުގައި ކޮންގްރެސްގެ މުރާޖާއަކަށް ބޭނުންވާ ޝަރުތުތައް އުނިކޮށްފައިވާ ކަމަށް ސްޓޭޓް ޑިޕާޓްމަންޓުން ބުނެފައިވެއެވެ.
މި އިޢުލާނުގައިވާ ގޮތުން، ގަތަރަށް 4.01 ބިލިއަން ޑޮލަރުގެ ޕެޓްރިއަޓް އެއަރ އެންޑް މިސައިލް ޑިފެންސް ރިޕްލެނިޝްމަންޓް ޚިދުމަތާއި، 992.4 މިލިއަން ޑޮލަރުގެ އެޑްވާންސްޑް ޕްރިސިޝަން ކިލް ވެޕަން ސިސްޓަމްސް (APKWS) ވިއްކުމަށް ވަނީ ހުއްދަ ދީފައެވެ.
އެމެރިކާއާއި އިޒްރޭލުން ފެބްރުއަރީ 28 ވަނަ ދުވަހު އީރާނަށް ހަމަލާދީފައިވާއިރު، އީރާނުން ވަނީ ބަދަލުގައި އިޒްރޭލަށާއި އެމެރިކާގެ އަސްކަރީ މަރުކަޒުތައް ހުރި ގަލްފުގެ ގައުމުތަކަށް ހަމަލާދީފައެވެ. އީރާނަށް ދިން ހަމަލާތަކާއި ލުބުނާނަށް އިޒްރޭލުން ދެމުންދާ ހަމަލާތަކުގައި މިހާތަނަށް އެތައް ހާސް ބަޔަކު މަރުވެ، އެތައް މިލިއަން ބަޔަކު ވަނީ ހާލުގައި ޖެހިފައެވެ.
