މެދުއިރުމަތީގައި މިހާރު އޮތް ވަގުތީ ސުލްޙަ ނިމުމަކަށް އައިސްދާނެކަމަށް އީރާނުގެ އަސްކަރިއްޔާއިން ރަސްމީކޮށް ތައްޔާރުވާން ފަށައިފިއެވެ. އީރާނުގެ ހަތިޔާރުއެޅި ބާރުތަކުން ނެރުނު އައު ބަޔާނެއްގައި ވަނީ، އެމެރިކާއާއި އިޒްރޭލުން އީރާނާ ދެކޮޅަށް ކުރާ ހަނގުރާމަ އަލުން ފެށުމަކީ މިހާރު ”ވަރަށް އެކަށީގެންވާ ކަމެއް“ ކަމަށް ބުނެ، ހަނގުރާމައަކަށް ތައްޔާރުވުމަށް އިންޒާރުދީފައެވެ.
އިތުބާރު ގެއްލުމާއި އެއްބަސްވުންތަކާ ޚިލާފުވުން
އަލްޖަޒީރާއިން ރިޕޯޓުކޮށްފައިވާ ގޮތުގައި، އީރާނުގެ އަސްކަރިއްޔާގެ އިސްވެރިން ބުނެފައިވަނީ ހަނގުރާމަ އަލުން ފެށުމާ ގާތަށް ގޮސްފައިވަނީ ”އެމެރިކާއަކީ އެއްވެސް އެއްބަސްވުމަކަށް ނުވަތަ މުޢާހަދާއަކަށް ޙުރުމަތްތެރިކޮށްހިތާ ބައެއް ނޫންކަން ހެކިތަކުން ސާބިތުވާތީ“ ކަމަށެވެ.
މިއީ މިދިޔަ މަހު ޕާކިސްތާނު މެދުވެރިވެގެން އިސްލާމްއާބާދުގައި ބޭއްވި ސުލްޙައިގެ މަޝްވަރާތައް އެއްކޮށް ފެއިލްވުމާ ގުޅިގެން، ޑިޕްލޮމެޓިކް އިތުބާރު ގެއްލިފައިވާކަން ހާމަކޮށްދޭ ކަމެކެވެ. އެމެރިކާއިން އެއްބަސްވުންތަކާ ޚިލާފުވާކަމަށް ފާޅުގައި ތުހުމަތުކޮށް، އީރާނުގެ އަސްކަރިއްޔާއިން ދަނީ އަލުން ހަނގުރާމަ ފެށުމަށް އެ ޤައުމުގެ ރައްޔިތުން ނަފްސާނީ ގޮތުންނާއި ޢަމަލީ ގޮތުން ތައްޔާރުކުރުވަމުންނެވެ.
”ފައިނަލް ބްލޯ“ ޙަމަލާތަކަށް ތައްޔާރުވުން
ތެހެރާނުން މި ނުރައްކާތެރި އިންޒާރު ދީފައިމިވަނީ، އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ރައީސް ޑޮނަލްޑް ޓްރަމްޕަށް އީރާނަށް ދެވޭނެ އެންމެ ވަރުގަދަ ޙަމަލާތަކުގެ ”ފައިނަލް ބްލޯ“ އޮޕްޝަންތައް ހުށަހަޅާފައިވާކަމަށް ރިޕޯޓުކޮށްފައިވާ ދަނޑިވަޅެއްގައެވެ.
އީރާނުން ހުށަހެޅި ޑިޕްލޮމެޓިކް ކަންކަމާމެދު ހިތްހަމަނުޖެހޭކަމަށް ރައީސް ޓްރަމްޕް ބުނެފައިވާއިރު، މިހާރު އޮތް ވަގުތީ ސުލްޙައަކީ ހަމައެކަނި ނަމެއްގައި އޮތް އެއްޗެއްކަން ދަނީ ސާބިތުވަމުންނެވެ. އީރާނުގެ ވައިގެ ދިފާޢީ ނިޒާމުތަކުން މިހާރުވެސް ޖާސޫސީ ޑްރޯންތަކަށް ޙަމަލާދެމުންދާއިރު، ދެ ޤައުމުވެސް މިހާރު މިސްރާބު ޖަހާފައިވަނީ ވަރުގަދަ އަސްކަރީ ކުރިމަތިލުމަކަށެވެ.
