އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޗެއާޕާސަން ހޮވުމަށް ބާއްވާ އިންތިހާބާއި އެ ޕާޓީގެ ގައުމީ މަޖިލީހުގެ އިންތިހާބު ބާއްވާނެ ފައިސާ ޕާޓީގައި ނެތް ކަމަށް ވިދާޅުވެ، އެ އިންތިހާބުތައް ރިޔާސީ ޕްރައިމަރީގެ ފަހުން ބޭއްވުމަށް އެ ޕާޓީގެ ވަގުތީ ޗެއާޕާސަން އަބްދުލްޣަފޫރު މޫސާ (ގަޕޯ) ހުށަހަޅުއްވައިފިއެވެ.
ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރުކަން ވެސް ކުރައްވަމުން ގެންދަވާ ގަޕޯ މި ހުށަހެޅުން ހުށަހެޅުއްވީ އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕަށް ފޮނުއްވި މެސެޖެއްގައެވެ. އޭނާ ވިދާޅުވީ ޗެއާޕާސަން އިންތިހާބާއި ގައުމީ މަޖިލިސް އިންތިހާބު މިވަގުތު ބާއްވައިފިނަމަ ޕާޓީގެ އެތެރޭގެ މަސްލަހަތު ގެއްލި، އޭގެ ސަބަބުން ސަރުކާރު ޖަވާބުދާރީކުރުވުމުގެ މަސައްކަތަށް ހުރަސްތަކެއް ކުރިމަތިވެދާނެ ކަމަށެވެ.
އިންތިހާބު ފަސްކުރަން ޖެހޭ ދެވަނަ ސަބަބެއްގެ ގޮތުގައި ގަޕޯ ފާހަގަކުރެއްވީ މާލީ ދަތިކަމެވެ. އެގޮތުން ދައުލަތުގެ ބަޖެޓުން އެ ޕާޓީއަށް ލިބެންޖެހޭ ފައިސާ އަދިވެސް ލިބިފައި ނުވާކަން އޭނާ ފާހަގަކުރެއްވިއެވެ.
”މި އަހަރު ސަރުކާރުން ލިބެން ޖެހޭ އެއްވެސް ފައިސާއެއް ޕާޓީއަށް ލިބިފައި ނުވާތީ ޕާޓީ ހިންގުމަށާއި އިންތިހާބް ބާއްވާނެ އެއްވެސް ފައިސާ އެއް ޕާޓީއަކު ނެތެވެ،“ ގަޕޯގެ މެސެޖްގައިވެއެވެ.
މީގެ އިތުރުން، ޕާޓީ ހިންގުމަށް އިސް ފަރާތްތަކުން މަޝްވަރާކޮށްގެން ’އިންޓަރީމް އެރޭންޖްމަންޓެއް‘ ނުވަތަ ވަގުތީ އިންތިޒާމެއްގެ ދަށުން ކުރިއަށް ދިއުމަށް ވެސް ގަޕޯ ވަނީ ހުށަހަޅުއްވައިފައެވެ. ނަމަވެސް އެ އިންތިޒާމުގައި އޭނާ ނުހިމެނުމަށް ވަނީ އެދިވަޑައިގެންފައެވެ.
އެމްޑީޕީގެ ޗެއާޕާސަން ކަމުގެ މަގާމަށް ކުރީގެ ރައީސް މުހައްމަދު ނަޝީދާއި ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ގެންދަވަނީ ވަރަށް ފޯރިއާއެކު ކެމްޕެއިން ކުރައްވަމުންނެވެ. މައުލޫމާތު ލިބިފައިވާ ގޮތުގައި ކުރީގެ ރައީސް އިބްރާހިމް މުހައްމަދު ސޯލިހާއި ޕާޓީގެ ރައީސް އަބްދުﷲ ޝާހިދު އަދި ކުރީގެ ނައިބު ރައީސް ފައިސަލް ނަސީމް ހިމެނޭހެން ޕާޓީގެ ގިނަ ފެކްޝަންތަކުން ތާއީދު ކުރައްވަނީ މީކާއިލް އަށެވެ. ރައީސް ނަޝީދުގެ ފަޅީގައި ތިއްބެވީ ދަ ޑިމޮކްރެޓްސް އުފެއްދުމުގައި އިސްކޮށް އުޅުއްވި ބޭފުޅުންނާއި ކުރީގެ ބައެއް ވަޒީރުންނެވެ.
އެމްޑީޕީގެ ޗެއާޕާސަންގެ އިންތިހާބު މީގެކުރިން ވެސް ގައުމީ މަޖިލީހުން ވަނީ ފަސްކޮށްފައެވެ. މިދިޔަ ޑިސެމްބަރު މަހު ނިންމާފައި ވަނީ ލޯކަލް ކައުންސިލް އިންތިހާބުގެ ފަހުން އެމްޑީޕީގެ އެތެރޭގެ އިންތިހާބު ބޭއްވުމަށެވެ. ގަޕޯގެ މި ހުށަހެޅުމާ މެދު ގޮތެއް ނިންމާނީ އެ ޕާޓީގެ ގައުމީ މަޖިލީހުންނެވެ.
