ށ. ފޯކައިދޫގައި މަސައްކަތްކުރާ ފުލުހެއްގެ ސައިކަލުގައި ރޯކޮށްލި މައްސަލަ ދިވެހި ފުލުހުންގެ ޚިދުމަތުން ސީރިއަސް މައްސަލައެއްގެ ގޮތުގައި ތަހުގީގު ކުރަން ފަށައިފިއެވެ.
ފުލުހުންގެ ޚިދުމަތުން ހާމަކުރި ގޮތުގައި، މި ހާދިސާ ހިނގާފައިވަނީ 2026 އޭޕްރީލް 27 ވީ އާދީއްތަ ދުވަހުގެ ރޭ 22:30 އެހައިކަންހާއިރުއެވެ. ތަހުގީގުން މިހާތަނަށް ލިބިފައިވާ މައުލޫމާތަށް ބަލާއިރު، މިއީ އެ ފުލުސް އޮފިސަރަށް އަމާޒުކޮށްގެން ގަސްދުގައި ހިންގާފައިވާ ނުރައްކާތެރި އަމަލެއް ކަމަށް ފުލުހުން ބުނެއެވެ.
މި ހާދިސާގައި ސައިކަލު ބޭނުންނުކުރެވޭ ވަރަށް މުޅިން އަންދާލާފައިވާއިރު، ސައިކަލު ހުރި ގޭގެ ގޭޓު ހިމެނޭހެން އެ ގޭގެ ބައެއް ސަރަހައްދުތަކަށް ވެސް އެކިވަރުގެ ގެއްލުންތައް ލިބިފައިވާ ކަމަށް ފުލުހުން މައުލޫމާތު ދެއެވެ.
ފުލުހުންގެ ޚިދުމަތުން ނެރުނު ބަޔާނެއްގައި، ގާނޫނު ތަންފީޒުކުރާ މުވައްޒަފުންނަށް އަމާޒުކޮށް ހިންގާ ބިރުދެއްކުމުގެ މިފަދަ އަމަލުތައް ހަރުކަށި އިބާރާތުން ކުށްވެރިކޮށްފައިވެއެވެ. އަދި މިއީ މުޅި މުޖުތަމައުގެ ސަލާމަތާއި ރައްކާތެރިކަމަށް އޮތް ބޮޑު ގޮންޖެހުމެއް ކަމުގައި އެ މުއައްސަސާއިން ދެކެއެވެ.
”ކުށްކުރާ ފަރާތްތަކުން ފުލުހުންގެ ވާޖިބަށް ހުރަސްއަޅައި، ބިރުދެއްކުމަށް ހިންގާ މިފަދަ ފިނޑި އަމަލުތަކުގެ ސަބަބުން، ގާނޫނު ތަންފީޒުކުރުމުގައި ފުލުހުން ކުރަމުންދާ މަސައްކަތަށް އެއްވެސް މަޑުޖެހުމެއް ނާންނާނެ،“ ފުލުހުންގެ ބަޔާނުގައި ވެއެވެ.
މީގެ އިތުރުން، ފުލުހުންނަށް އަނިޔާކުރުމާއި ބަދަލުހިފުމުގެ ރޫހުގައި ހިންގާ ކޮންމެ އަމަލަކާ މެދު ފަސްޖެހުމެއް ނެތި ގާނޫނީ އެންމެ ހަރުކަށި ފިޔަވަޅު އަޅާނެ ކަމުގެ ޔަގީންކަން ފުލުހުން ވަނީ ރައްޔިތުންނަށް އަރުވާފައެވެ. މި އަމަލު ހިންގި ފަރާތްތައް ހޯދައި، އެ ފަރާތްތަކާ މެދު ގާނޫނީ ފިޔަވަޅު އެޅުމުގެ މަސައްކަތް މިހާރު ދަނީ ހަލުވި މިނެއްގައި ކުރަމުންނެވެ.
ދިވެހި ފުލުހުންގެ ޚިދުމަތުން ބުނީ، ގާނޫނު ނަގަހައްޓައި، ފުލުހުންގެ ރައްކާތެރިކަން ކަށަވަރުކޮށް، ގައުމުގައި އަމާންކަން ގާއިމުކުރުމުގައި އެ މުއައްސަސާ އަބަދުވެސް ސާބިތުކަމާއެކު ދެމިއޮންނާނެ ކަމަށެވެ.
