މިއަދު ފާހަގަކުރަމުންދާ ބައިނަލްއަގުވާމީ މަސައްކަތްތެރިންގެ ދުވަހުގެ ނުވަތަ މޭ ޑޭގެ މުނާސަބަތުގައި، ކުރީގެ ރައީސް އިބްރާހިމް މުހައްމަދު ސޯލިހު ރާއްޖޭގެ ހުރިހާ މަސައްކަތްތެރިންނަށް ދުވަހުގެ ހެޔޮއެދުމާއި ތަހުނިޔާ ފޮނުއްވައިފިއެވެ.
ސޯޝަލް މީޑިއާގައި ކުރެއްވި ޕޯސްޓެއްގައި ރައީސް ސޯލިހު ވިދާޅުވީ، މަސައްކަތްތެރިންގެ ހައްގުތައް ހިމާޔަތްކޮށް، އެފަރާތްތަކަށް ގަދަރުވެރި ދިރިއުޅުމެއް ހޯދައިދިނުމަކީ އެމް.ޑީ.ޕީގެ އަބަދުވެސް އެންމެ އިސް އަމާޒު ކަމަށެވެ. މި އަމާޒަށް ވާސިލުވުމަށްޓަކައި އެމް.ޑީ.ޕީގެ ސިޔާސަތުތަކުގެ ދަށުން ގިނަގުނަ ކާމިޔާބީތަކެއް ހޯދިފައިވާކަން އެމަނިކުފާނު ފާހަގަކުރެއްވިއެވެ.
މޭ ޑޭގެ ތަހުނިޔާ ހުރިހާ ދިވެހި މަސައްކަތްތެރިންނަށް އަރިސްކުރަން.
މަސައްކަތްތެރިންގެ ހައްޤުތައް ހިމާޔަތްކޮށް ގަދަރުވެރި ދިރިއުޅުމެއް ހޯދައިދިނުމަކީ އަބަދުވެސް @MDPSecretariatގެ އިސް އަމާޒެކެވެ. މިގޮތުން ރާއްޖޭގައި ފުރަތަމަ ފަހަރަށް އެންމެ ކުޑަ އުޖޫރަ ކަނޑައަޅައި، 6 މަހުގެ…
— Ibrahim Mohamed Solih (@ibusolih) May 1, 2026
އެގޮތުން، ރާއްޖޭގެ ތާރީޚުގައި ފުރަތަމަ ފަހަރަށް އެންމެ ކުޑަ އުޖޫރަ ނުވަތަ މިނިމަމް ވޭޖް ކަނޑައެޅުމާއި، ދައުލަތުގެ މުވައްޒަފުންނަށް 6 މަސްދުވަހުގެ މެޓާނިޓީ ލީވް ތައާރަފްކުރުމަކީ މަސައްކަތްތެރިންގެ ހައްގުގައި އެޅުނު މުހިންމު ފިޔަވަޅުތަކެއްގެ ގޮތުގައި އެމަނިކުފާނު ސިފަކުރެއްވިއެވެ. މީގެ އިތުރުން، ފަތުރުވެރިކަމުގެ ދާއިރާގައި މަސައްކަތްކުރާ މުވައްޒަފުންނަށް ސާވިސް ޗާޖު ކަށަވަރުކޮށްދެވުނީވެސް އެމް.ޑީ.ޕީގެ ހަރުދަނާ ސިޔާސަތުތަކުގެ ސަބަބުންކަމަށް އިބޫ ސޯލިހު ވިދާޅުވިއެވެ.
ރައީސް ސޯލިހު އިތުރަށް ވިދާޅުވީ، މަސައްކަތުގެ މާހައުލަކީ ނަފްސާނީ ގޮތުން ދުޅަހެޔޮ އަދި ރައްކާތެރި ތަނަކަށް ހެދުމަށް އެމް.ޑީ.ޕީން އަބަދުވެސް މަސައްކަތް ކުރާނެ ކަމަށެވެ. އަދި މަސައްކަތްތެރިންގެ ހައްގުގައި ކުރަމުންދާ މި މަސައްކަތުގައި އެމަނިކުފާނާއި އެމް.ޑީ.ޕީ އަބަދުވެސް ސާބިތުކަމާއެކު ދެމިތިބޭނެކަމުގެ ޔަގީންކަން ދިވެހި ހުރިހާ މަސައްކަތްތެރިންނަށް ވަނީ އަރުވާފައެވެ.
