ދިވެހިރާއްޖެ މިއަދު މިދެކޭ ތަރައްޤީއާއި ކުރިއެރުންތައް ގެނެސްދިނީ މަސައްކަތްތެރިން ކަމަށާއި، މާދަމާގެ އުންމީދުތައް ޙަޤީޤަތަކަށް ހަދައިދެވޭނީވެސް ހީވާގި މަސައްކަތްތެރިންނަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ބައިނަލްއަޤްވާމީ މަސައްކަތްތެރިންގެ ދުވަހުގެ މުނާސަބަތުގައި ރައީސުލްޖުމްހޫރިއްޔާ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، އަމިއްލަ ނަފްސާއި އާއިލާގެ ފުދުންތެރިކަމަށްޓަކައި އަދި ޤައުމުގެ ލާބައާއި މަންފާއަށްޓަކައި ކޮންމެ ދާއިރާއެއްގައި ބުރަ މަސައްކަތްކުރާ ކޮންމެ މަސައްކަތްތެރިއަކީވެސް ޝަރަފުވެރިއެއް ކަމަށެވެ. އަދި އެއީ މި ޤައުމުން އަބަދުވެސް އަގުވަޒަންކުރާނެ ޚިދުމަތްތެރިންކަން އެމަނިކުފާނު ފާހަގަކުރެއްވިއެވެ.
މަސައްކަތްތެރިންގެ ދުވަހުގެ ތަހުނިޔާ ރާއްޖޭގެ ހުރިހާ މަސައްކަތްތެރިންނަށް ފޮނުއްވަމުން ރައީސް ވިދާޅުވީ، ޤައުމުގެ ކުރިމަގު ބިނާކުރުމުގައި މަސައްކަތްތެރިން ކުރާ ހިތްވަރުގަދަ މަސައްކަތްތަކަށްޓަކައި އިޚްލާޞްތެރިކަމާއެކު ޝުކުރު ދަންނަވާ ކަމަށެވެ.
އަމިއްލަ ނަފްސާއި ޢާއިލާގެ ފުދުންތެރިކަމަށްޓަކައި، އަދި ޤައުމުގެ ލާބައާއި މަންފާއަށްޓަކައި ކޮންމެ ދާއިރާއެއްގައި ބުރައުފުލާ މަސައްކަތްތެރިއަކީވެސް ޝަރަފްވެރިއެއް. މި ޤައުމުން އަގުވަޒަން ކުރާނެ ޚިދުމަތްތެރިއެއް.
ބައިނަލްއަޤްވާމީ މަސައްކަތްތެރިންގެ ދުވަހުގެ ތަހުނިޔާ އަރިސްކުރަނީ،…
— Dr Mohamed Muizzu (@MMuizzu) May 1, 2026
ކޮންމެ އަހަރެއްގެ މޭ މަހުގެ 1 ވަނަ ދުވަހަކީ ބައިނަލްއަޤްވާމީ ގޮތުން ފާހަގަކުރާ މަސައްކަތްތެރިންގެ ދުވަހެވެ. މި ދުވަހުގެ މުނާސަބަތުގައި ރާއްޖޭގެ އެކި ކަންކޮޅުތަކުގައި މަސައްކަތްކުރާ ފަރާތްތަކުގެ އަގުވަޒަންކުރުމުގެ ގޮތުން ތަފާތު ޝުޢޫރުތައް ދަނީ ފާޅުކުރަމުންނެވެ.
