ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ ރައީސްކަމުގެ މަގާމަށް މުޙައްމަދު ނިޒާރު އައްޔަންކުރައްވައިފިއެވެ.
ޕީސީބީގެ ރައީސްކަމުގެ މަގާމަށް ނިޒާރު އައްޔަންކުރައްވާފައި މިވަނީ އެ މަގާމުގައި ކުރިން ހުންނެވި މުޙައްމަދު އަނަސް މަގާމުން އިސްތިޢުފާދެއްވުމާ ގުޅިގެންނެވެ. ޕީސީބީން މައުލޫމާތު ދީފައިވާ ގޮތުގައި، އަނަސްގެ އިސްތިއުފާ މިހާރު ވަނީ ރަސްމީކޮށް ގަބޫލުކޮށްފައެވެ. އަދި އެ މަގާމުގައި ހުރެ އޭނާ ކޮށްދީފައިވާ ހިދުމަތްތަކަށް ޕީސީބީން ވަނީ ޝުކުރުއަދާކޮށްފައެވެ.
ފާހަގަކޮށްލެވޭ ގޮތުގައި މިއީ ޕީސީބީގެ އެންމެ މަތީ އިސްވެރިޔާގެ މަގާމު ނިޒާރު އަދާކުރައްވާ ފުރަތަމަ ފަހަރެއް ނޫނެވެ. އޭނާ ވަނީ މީގެ ކުރިން 2014 ވަނަ އަހަރުން ފެށިގެން 2019 ވަނަ އަހަރާއި ހަމައަށް މި މަގާމު ފުރުއްވައި، ސަރުކާރުގެ ކުންފުނިތަކުގެ ހިންގުން ހަރުދަނާކޮށް ގަވަރނަންސް އޮނިގަނޑުތައް އެކުލަވާލުމުގައި ވަރަށް މުހިއްމު ދައުރެއް އަދާކުރައްވައިފައެވެ.
މީގެ އިތުރުން އޭނާ ވަނީ، ދައުލަތުގެ ކުންފުނިތައް މޮނިޓަރކުރުމާއި، ބައިނަލްއަގުވާމީ ވިޔަފާރީގެ ރޮނގުން ތިރީސް އަހަރަށްވުރެ ދިގު މުއްދަތެއްގެ ފަންނީ ތަޖުރިބާ ވެސް ހާސިލުކުރައްވައިފައެވެ.
އަދި ހަމައެހެންމެ، ތައުލީމީ ރޮނގުން ވެސް ނިޒާރަކީ ފާހަގަކޮށްލެވޭ ބޭފުޅެކެވެ. އެގޮތުން އޭނާ ވަނީ އޮސްޓްރޭލިއާގެ ޔުނިވަރސިޓީ އޮފް ސައުތު އޮސްޓްރޭލިއާއިން ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓަރސް ޑިގްރީ (އެމްބީއޭ) ފުރިހަމަކުރައްވައިފައެވެެ. މީގެ އިތުރުން ކޯޕަރޭޓް ގަވަރނަންސްއާއި ގުޅޭ ބައިނަލްއަގުވާމީ ގިނަ ފޯރަމްތަކާއި މަތީ ފަންތީގެ ތަމްރީނުތަކުގައި ވެސް އޭނާ ބައިވެރިވެވަޑައިގެންފައިވެއެވެ.
