ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްތަށިފުޅުގައި ޒިނޭގެ ދޮގު ތުހުމަތު އަޅުވައި ”އަދަދު“ ނޫހުން ގެނެސްދިން ”އައިޝާ“ ޑޮކިއުމެންޓްރީއާއި ގުޅިގެން ފުލުހުން ފަށާފައިވާ ތަހުގީގަކީ ރައީސްގެ އެންގެވުމަކަށް ހިންގާ ތަހުގީގެއް ނޫން ކަމަށް ރައީސުލްޖުމްހޫރިއްޔާގެ އޮފީހުގެ ތަރުޖަމާނު މުޙައްމަދު ޙުސައިން ޝަރީފް (މުންދު) ވިދާޅުވެއްޖެއެވެ.
މުންދު މި މޭރުމުން ވިދާޅުވީ ”ޕްރެސަރ ވިތު ދަ ސްޕޮކްސް“ ގެ ނަމުގައި ޓެލެވިޒަން މޯލްޑިވްސްގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުންނެވެ. މި ބައްދަލުވުމުގައި ވާހަކަދައްކަވަމުން މުންދު ވިދާޅުވީ، ރާއްޖޭގެ ގާނޫނުތަކާއި ގަވާއިދުތަކުގެ ދަށުން ބަލަންޖެހޭ މައްސަލަތައް ތަހުގީގުކުރުމުގެ ފުރިހަމަ އިހުތިޔާރު އޮންނަނީ ދިވެހި ފުލުހުންގެ ހިދުމަތަށާއި، އެންޓި ކޮރަޕްޝަން ކޮމިޝަން (އޭސީސީ) ފަދަ މުއައްސަސާތަކަށް ކަމަށެވެ.
އަދި މިފަދަ ތަހުގީގެއް ހިންގަން އެ މުއައްސަސާތަކަށް އެންގުމުގެ ގާނޫނީ ބާރު އޮންނަނީ ޕްރޮސެކިއުޓަރ ޖެނެރަލްގެ (ޕީޖީ) އޮފީހަށް ކަމަށް އޭނާ ފާހަގަކުރެއްވިއެވެ. މީގެ އިތުރުން ”އަދަދު“ ނޫހުގެ ޑޮކިއުމެންޓްރީގެ މައްސަލައާއި ގުޅިގެން ދެ ކަމެއް ބަލަމުން އަންނަ ކަމަށާއި، އޭގެ ތެރޭގައި ގަޒްފުގެ މައްސަލައެއް ވެސް ހިމެނޭ ކަމަށް މުންދު ވަނީ ވިދާޅުވެފައެވެ.
”އަދަދު ނޫހުން އާންމުކުރި ކޮންޓެންޓަކީ ގާނޫނީ ހުދޫދުގެ ތެރެއިން ދީފައިވާ ނޫސްވެރިކަމުގެ މިނިވަންކަމުގެ އިންފާރުން ބޭރުން ކޮށްފައިވާ ކަމެއް ކަމަށް ބަލައި ފުލުހުން އެ މައްސަލަ ތަހުގީގު ކުރަމުންދަނީ، އަދި މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނުން ވެސް އެ ނޫހުގެ ކޮންޓެންޓާ ގުޅޭ މައްސަލައެއް ދަނީ ބަލަމުން،“ – މުންދު ވިދާޅުވިއެވެ.
މީގެ އިތުރުން ބައެއް ނޫސްތަކުން މި ހަބަރު ރިޕޯޓުކުރުމުގައި، މި ހަފުތާގައި ބޭއްވި ނޫސްވެރިންގެ ބައްދަލުވުމުގައި ”އަދަދު“ ނޫހުގެ ނޫސްވެރިއަކު ކުރި ސުވާލަކާ ގުޅިގެން ރައީސް ދެއްވި ޖަވާބާ ގުޅުވައިގެން ފުލުހުން ފިޔަވަޅު އެޅި ކަމަށް ބުނާ ބުނުމަކީ ހަގީގަތާ ހިލާފު ދޮގު ވާހަކައެއް ކަމަށް ފާހަގަކުރައްވައި މުންދު ވިދާޅުވީ، ފުލުހުން ”އަދަދު“ ނޫސް ހިންގާ އޮފީހަށް ވަދެ، ކޯޓު އަމުރެއްގެ ދަށުން ބަލައި ފާސްކުރަން ފެށީ އެ ބައްދަލުވުމުގެ މާ ކުރިން ޕީޖީ އޮފީހުން އެދިގެން ކަން ފުލުހުން ކަށަވަރުކޮށްދީފައިވާ ކަމަށެވެ.
މީގެ އިތުރުން މި މަހުގެ 14 ވަނަ ދުވަހު މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނުން ވެސް މި މައްސަލަ ބަލަން ފަށާފައިވާ ކަމަށް މުންދު ވަނީ އިތުރަށް ވިދާޅުވެފައެވެ.
