މަސްވެރިންނަށް ހާއްސަކޮށް ރާއްޖޭގެ ނުވަ ސަރަހައްދަކުން ހެޔޮ އަގުތަކެއްގައި ތެޔޮ ލިބޭނެ އިންތިޒާމު ހަމަޖައްސާފައިވާ ކަމަށް ފިޝަރީޒް މިނިސްޓަރު އަހްމަދު ޝިޔާމް ވިދާޅުވިއެވެ.
މިނިސްޓަރު ޝިޔާމް މި މޭރުމުން ވިދާޅުވީ، މެދުއިރުމަތީގައި މިހާރު ހިނގަމުން އަންނަ ހަނގުރާމައާއި ގުޅިގެން ރާއްޖެއަށް ދިމާވެދާނެ ދަތިތައް ދެނެގަނެ އެކަންކަމަށް ހައްލު ހޯދުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކުލަވާފައިވާ މިނިސްޓަރުންގެ ހާއްސަ ކޮމިޓީގެ ފަރާތުން އިއްޔެ ބޭއްވި ނޫސްވެރިންގެ ބައްދަލުވުމުގައި މައުލޫމާތުދެއްވަމުންނެވެ.
މިނިސްޓަރު ޝިޔާމް ވިދާޅުވީ ތެލަށް ކުރާ ހޭދަ ބޮޑުވެއްޖެނަމަ އެކަމުގެ އުނދޫތައް ކުރިމަތިވަނީ ހަމައެކި މަސްވެރި އާއިލާތަކަށް ނޫން ކަމަށާއި، އެކަމުގެ ސަބަބުން ހުރިހާ ރައްޔިތުންނަށް ދަތިތަކާއި ކުރިމަތިލާންޖެހޭ ކަމަށެވެ. ކަން މިހެން އޮތް އިރު ސަރުކާރުން އަބަދުވެސް މަސައްކަތްކުރާނީ މަސްދޯނިތައް މަސް ކަނޑުތަކަށް ނުކުމެ މަސްވެރިކަން ކުރެވޭނެ މަގުތައް ފަހިކޮށްދިނުމަށް ކަމަށް މިނިސްޓަރު ވިދާޅުވިއެވެ.
މީގެ ކުރިން މަސްވެރިންނަށް ހާއްސަކޮށް ހެޔޮ އަގުތަކެއްގައި ތެޔޮ ފޯރުކޮށްދެމުންދިޔައީ އެންމެ ހަތަރު ސަރަހައްދަކުން ކަން ފާހަގަކުރައްވައި މިނިސްޓަރު ވިދާޅުވީ، މިހާރު ރާއްޖޭގެ އިތުރު ނުވަ ސަރަހައްދަކުން ހެޔޮ އަގުތަކެއްގައި ތެޔޮ ފޯރުކޮށްދޭން ފެށިފައިވާ ކަމަށެވެ. އަދި އިތުރު ތިން އަތޮޅަކުން ތެޔޮ ލިބޭނެ އިންތިޒާމުތައް ހަމަޖައްސަމުންދާ ކަމަށް އޭނާ ވިދާޅުވިއެވެ.
”މިއަދު އަޅުގަނޑުމެން މި ވާހަކަ ދައްކާއިރު އިތުރު ނުވަ ސަރަހައްދަކުން މިވަނީ ތެޔޮ ފޯރުކޮށްދޭން ފެށިފައި. ދެން މި ވަގުތު މަސްވެރިކަން އޮތް އަތޮޅުތަކަށް ބަލާއިރު ލ، ތ، މ، މި ތިން އަތޮޅަށް ސޮލިއުޝަންއެއް ހޯދުމުގެ މަސައްކަތް މި ދަނީ ކުރަމުން،“ – މިނިސްޓަރު ވިދާޅުވިއެވެ.
މަސްވެރިންނަށް ހެޔޮ އަގުގައި ތެޔޮ ލިބޭނެ ސަރަހައްދުތައް:
• ހއ. އިހަވަންދޫ
• ހދ. ހަނިމާދޫ
• ށ. މިލަންދޫ
• ބ. އޭދަފުށި
• ފ. ނިލަންދޫ
• ކ. ހިންމަފުށި
• ރ. ދުވާފަރު
• ދ. ކުޑަހުވަދޫ
• ޅ. ފެލިވަރު
• ގއ. ކޫއްޑޫ
• ފުވައްމުލައް ސިޓީ
• އައްޑޫ ސިޓީ ހުޅުމީދޫ
• ހުޅުމާލެ ޖެޓީ
ފާހަގަކޯށްލެވޭ ގޮތުގައި މި ސަރުކާރުން އަންނަނީ މަސްވެރިންނަށް ދިމާވާ ގޮންޖެހުންތައް ހައްލުކޮށްދިނުމަށް މަސައްކަތްތަކެއް ކޮށްދީ، މަސްވެރިން އެދޭ ގޮތަށް ކަންކަން ކޮށްދެވޭނެ ގޮތްތަށް ހޯދައި ބަލަމުންނެވެ.
