ދުނިޔޭގެ ނިސްބަތުން ބަލާއިރު ވެސް ރާއްޖެއަށް ވުރެ ބޮޑަށް އަސާސީ ހައްގުތައް ކަށަވަރުވެފައިވާ ގައުމެއް މަދުވާނެ ކަމަށް ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސްޕަރސަން މުޙައްމަދު ޙުސައިން ޝަރީފް (މުންދު) ވިދާޅުވެއްޖެއެވެ.
މުންދު މި މޭރުމުން ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްތަށިފުޅުގައި ޒިނޭގެ ދޮގު އިލްޒާމު އަޅުވައި ”އަދަދު“ ނޫހުން ގެނެސްދީފައިވާ ”އައިޝާ“ ޑޮކިއުމެންޓްރީއާއި ގުޅިގެން އެމްއެމްޓީވީގެ ”ބޮޑު ޚަބަރު“ ޕްރޮގްރާމުގައި ވާހަކަދައްކަވަމުންނެވެ.
މުންދު ވިދާޅުވީ، ރާއްޖޭގެ ގާނޫނުއަސާސީން ދިވެހި ކޮންމެ ރައްޔިތަކަށް ވެސް ހައްގުތަކެއް ކަށަވަރުކޮށްދީފައިވާ ކަމަށާއި، ދުނިޔޭގެ ނިސްބަތުން ބަލާއިރު ވެސް ރާއްޖެއަށް ވުރެ ބޮޑަށް އަސާސީ ހައްގުތައް ކަށަވަރުވެފައިވާ ގައުމެއް މަދުވާނެ ކަމަށެވެ.
”ކޮންމެ ދިވެހި ރައްޔިތަކަށް ވެސް ލިބިދޭ ހައްގުތަކެއް އެބަވޭ، ސިޔާސީ ހައްގުތަކެއް އެބަވޭ، އެއްވެ އުޅުމުގެ މިނިވަންކަން އޮވޭ އަޅުގަނޑުމެންނަށް، ހިޔާލު ފާޅުކުރުމުގެ މިނިވަންކަން އޮވޭ، އަޅުގަނޑުމެންނަށް އާއިލާއެއް ހެޔޮގޮތުގައި ތަރުބިއްޔަތުކޮށްގެން ގެންގުޅުމާއި އަޅުގަނޑުމެންގެ ގެދޮރުވެރިކަމާއި ގެދޮރުގެ ހުރުމަތާއި އަދި އަޅުގަނޑުގެ އަމިއްލަ ނަފްސު ދިފާއުކުރުމުގެ ހައްގާއި މިކަހަލަ ހައްގުތަކެއް އަޅުގަނޑުމެންގެ ރާއްޖޭގައި އެންމެ ފުޅާ ދާއިރާއެއްގައި ދުނިޔޭގައި ވަކި އަޅުގަނޑުމެންގެ ރާއްޖެއަށްވުރެ އަސާސީ ހައްގާއި ބެހޭ ބައި ފުޅާ ގައުމެއް މަދުވާނެ، ނެތޭ ދެންނެވިއަސް ދޮގަކަށް ނުވާނެ،“ – މުންދު ވިދާޅުވިއެވެ.
ރާއްޖެއަކީ ސައްތައިން ސައްތަ މުސްލިމުންކަން ފާހަގަކުރައްވައި މުންދު ވިދާޅުވީ، ސަރުކާރު ހިންގުމާއި ހިސާބުން ފެށިގެން އާންމު ދިރިއުޅުމާއި ހަމައަށް ކަންކަން ބައްޓަންކުރަންޖެހޭނީ އިސްލާމީ ޝަރީއަތުގެ މަތިވެރި އަސާސްތަކުގެ މަތީގައި ކަމަށެވެ. އެގޮތުން މީހެއްގެ ބޮލުގައި ޒިނޭގެ ދޮގު ތުހުމަތު ނުވަތަ ޤަޒުފުކޮށްފި ނަމަ، ގާނޫނީ ގޮތުން އެޅޭނެ ފިޔަވަޅުތަކެއް ގާނޫނުއަސާސީގައި ބަޔާންކޮށްފައިވާ ކަމަށާއި، އެފަދަ އަމަލުތައް ކުރުމަކީ ކުށެއްކަން ގާނޫނުއަސާސީން އެނގެން އޮންނަ ކަމަށެވެ.
ރައީސުލްޖުމްހޫރިއްޔާއަށް، ރައްޔިތުންގެ މަޖިލީހުގެ މެންބަރަކަށް ނުވަތަ ސިޔާސީ ޕާޓީއެއްގެ ލީޑަރަކަށް ވީތީ، ގާނޫނާއި ގަވާއިދުތަކުން އަދި އިލާހީ ގާނޫނުގެ ތެރެއިން މިފަދަ ކަންކަމުގައި އިސްތިސްނާ ނުވާނެކަން ފާހަގަކުރައްވަމުން މުންދު އިތުރަށް ވިދާޅުވީ، މީޑިއާތަކާއި ނޫސްވެރިން ވީތީ ގާނޫނާއި ގަވާއިދުތަކުން އިސްތިސްނާ ނުވާނެ ކަމަށެވެ.
