ސްކޫލްތަކުގައި ބުލީކުރުން ހުއްޓުވޭނީ ގޭތެރެއާއި މުޖުތަމައަކީ އުފާވެރި އަދި ހިތްފަސޭހަ ވެއްޓަކަށް ބަދަލުކުރެވިގެން ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެއެވެ.
މިނިސްޓަރު މި މޭރުމުން ވިދާޅުވީ، ބުލީގެ މައްސަލަތަކާ ގުޅޭގޮތުން އާންމުންގެ މީހަކާ އެކު ދެކެވުނު ވާހަކަތަކަކަށްފަހު ފޭސްބުކްގައި ހިއްސާކުރެއްވި ޕޯސްޓެއްގައެވެ. ފޭސްބުކްގައި ހިއްސާކުރެއްވި ޕޯސްޓުގައި މިނިސްޓަރު ވިދާޅުވީ ކުޑަކުދިންނަކީ ވަށައިގެންވާ މާހައުލު ނަކަލުކުރާ ބައެއް ކަމަށެވެ. ކަން މިހެން އޮތް އިރު ކުލުނާއި އޯގާތެރިކަމެއް ނެތް މާހައުލެއްގައި ބޮޑުވާ ކުއްޖަކަށް އަބަދުވެސް ފެންނަނީ ނޭދެވޭ މަންޒަރުތަކެއް ކަމަށް މިނިސްޓަރު ވަނީ ވިދާޅުވެފައެވެ.
މިނިސްޓަރު ވިދާޅުވީ، އެކަކު އަނެކަކަށް މަލާމާތްކޮށް، ދަށްކޮށްލާ ބަސްތައް ބޭނުންކުރާ މުޖުތަމައެއްގެ ތެރޭގައި ބޮޑުވާ ކުއްޖާ އެފަދަ ފުރައްސާރަ ނަކަލުކޮށް، ސްކޫލުގެ މާހައުލުގައި އެކަން ތަކުރާރުކުރާ ކަމަށެވެ.
”ސޯޝަލް މީޑިއާގައްޔާއި އާންމު އެއްވުންތަކުގައި މީހުންގެ އަބުރަށް އަރައިގަތުމަކީ މިއަދު އަޅުގަނޑުމެންގެ ތެރޭގައި ”މުނިފޫހިފިލުވުން“ ކަމުގައި ވެއްޖެ، އިވޭ ކޮންމެ އަޑަކީ އަދި ފަތުރާލާ ކޮންމެ ވާހަކައަކީ ހަގީގަތެއް ނޫން، ނަމަވެސް ކަންކަމުގެ އަސްލު ބެލުމެއް ނެތި އަނެކާގެ ހިތަށް ލިބޭނެ އަނިޔާއަށް ވިސްނުމެއް ނެތް މުޖުތަމައަކުން ނުކުންނާނީ ނަފްސާނީ ގޮތުން ބަލިކަށި ޖީލެއް، މިއީ ދިވެހި ކޮންމެ ފަރުދަކު މިކަމާމެދު ފުންކޮށް ވިސްނައި އިސްލާހީ ފިޔަވަޅު އަޅަންޖެހިފައިވާ ކަމެއް،“ – މިނިސްޓަރު ޝަފީއު ވިދާޅުވިއެވެ.
ހެޔޮ ޖީލެއް ބިނާކުރުމަށްޓަކައި މުދައްރިސުން ކުރަމުން އަންނަނީ އާދައިގެ މަސައްކަތެއް ނޫންކަން ފާހަގަކުރައްވަމުން މިނިސްޓަރު ވިދާޅުވީ، ކުދިންނަށް ފިލާވަޅުތައް އުގަންނައިދިނުމުގެ އިތުރުން، މުޖުތަމައު ތެރެއިންނާއި ގޭތެރެއިން ކުދިންނަށް ފެންނަ ނޭދެވޭ އާދަތައް އިސްލާހުކުރުމަށް މުދައްރިސުން ބުރަ މަސައްކަތްތަކެއް ކުރައްވަމުން އަންނަ ކަމަށެވެ.
އަހަރެމެންނަކީ މުސްލިމުން ކަމަށްވާއިރު، އިސްލާމީ ރިވެތި އަހުލާގު ކުދިންނަށް އުނގަންނައިދިނުމަކީ، އަހަރެމެންގެ ބޮލުގައި އެޅިފައިވާ އެންމެ ބޮޑު ޒިންމާ ކަމަށާއި މީހަކަށް ދެރައެއް ދިނުމަކީ ނުވަތަ ދުލުންނާއި އަތުން ފުރައްސާރަކުރުމަކީ ބޮޑުވެގެންވާ ފާފައެއްކަން ތަކުރާރުކޮށް ކުދިންނަށް ބުނެދޭންޖެހޭ ކަމަށް މިނިސްޓަރު ވަނީ ވިދާޅުވެފައެވެ. މިފަދަ ކަންކަން ހުއްޓުވުމަށްޓަކައި ބަހާއި އަމަލުން ރިވެތި ނަމޫނާ އެ ކުދިންނަށް ދައްކަންޖެހޭ ކަމަށް ވެސް އޭނާ ވިދާޅުވިއެވެ.
މިނިސްޓަރު އިތުރަށް ވިދާޅުވީ، ކުދިންނަށް ހެޔޮ ނަމޫނާއެއް ނުދައްކައި، އެކަކު އަނެކަކަށް އޯގާތެރި ނުވެއްޖެ ކަމުގައިވާނަމަ، މާދަމާގެ ޖީލު އޮންނާނީ ނަފްސާނީ ގޮތުން ބަލިކަށި، ކުލުނާއި އޯގާތެރިކަމުން މަހުރޫމުވެފައިވާ މާހައުލެއްގައި ކަމަށެވެ.
