ނޭޝަނަލް އޮއިލް ރިޒާވް ގާއިމުކުރުމުގެ މަޝްރޫއުގެ ދަށުން ފިއުލް ސްޓޯރޭޖު ތަރައްގީކުރުމަށް މާލެ ކައިރިން ދެ ފަޅެއް ބަލަމުން އަންނަ ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.
ޒަމީރު މި މޭރުމުން ވިދާޅުވީ މެދުއިރުމަތީގައި މިހާރު ހިނގަމުން އަންނަ ހަނގުރާމައިގެ ސަބަބުން ރާއްޖެއަށް ކުރިމަތިވެދާނެ ދަތިތަކާއި އެ ކަންކަން ހައްލުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އުފައްދަވާފައިވާ މިނިސްޓަރުންގެ ހާއްސަ ކޮމިޓީން ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.
މިނިސްޓަރު ވިދާޅުވީ ފިނޭންސް މިނިސްޓްރީ އާއި އިކޮނޮމިކް މިނިސްޓްރީ ގުޅިގެން އެސްޓީއޯ މެދުވެރިކޮށް، ނޭޝަނަލް އޮއިލް ރިޒާވް ގާއިމްކުރުމުގެ މަސައްކަތުގެ ތައްޔާރީތައް މިހާރު ފަށާފައިވާ ކަމަށެވެ. މި މަޝްރޫއުގެ ފުރަތަމަ ފިޔަވަހީގެ ދަށުން ފިއުލް ސްޓޯރޭޖް ތަރައްގީކުރުމަށް ހަމަޖެހިފައިވަނީ މާލެ ކައިރީ ސަރަހައްދެއްގައި ކަމަށާއި މިހާރު ކުރަމުން އަންނަ މަސައްކަތަކީ ފިއުލް ސްޓޯރޭޖް ތަރައްގީކުރުމަށް ތަނެއް ކަނޑައެޅުމުގެ މަސައްކަތް ކަމަށް އޭނާ ވިދާޅުވިއެވެ.
”މިހާރު ރޭވިފައި އޮތީ ތިން ފިޔަވައްސަކަށް ބަހާލައިގެން ކުރިއަށް ގެންދަން، ފުރަތަމަ ފިޔަވަހީގައި މާލެ ކައިރި ސަރަހައްދުން މި ވަގުތު އެސްޓީއޯ އިން ދެ ފަޅެއްގެ ދެ ރަށެއްގެ ކައިރީގައި އޮތް ފަޅުގެ ސަރަހައްދު ބަލަމުން އެބަދޭ، އެތަނުން ކުރަން ޖެހޭނެ ސާވޭ އިރާދަކުރެއްވިއްޔާ ވަރަށް އަވަހަށް ފަށާނެ އަންނަ ހަފުތާގައި، މިހާރު މެޕް ބަލައިގެން އައިޑެންޓިފައި ކޮށްފައި ވަނީ،“ މިނިސްޓަރު ޒަމީރު ވިދާޅުވިއެވެ.
މާލެއާއި ކައިރި ސަރަހައްދުގައި ތަރައްގީކުރުމަށް ހަމަޖެހިފައިވާ ފިއުލް ސްޓޯރޭޖުގެ ޑިޒައިނާއި މަޝްރޫއަށް ބޭނުންވާ ފައިސާ ހޯދާނެ ގޮތާއި މަޝްރޫއުގެ ފީސިބިލީޓީގެ މަސައްކަތް ކުރާނެ ގޮތް ވެސް ރާވައި، ދެ ހަފުތާއެއްހައި ދުވަހުގެ ތެރޭގައި ޕްލޭން އެކުލަވާލައި ނިންމައި ރައީސް މުޢިއްޒަށް ހުށަހަޅާނެ ކަމަށެވެ.
