މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން (އެމްއެމްބީސީ) ގެ އާ ގަވާއިދުތަކާއިއެކު ރާއްޖޭގައި ރަޖިސްޓްރީކޮށްގެން ހިންގާ ހުރިހާ މީޑިއާތަކެއް އެ ކޮމިޝަނުގައި ރަޖިސްޓްރީކުރުމަށް ހަމަސްދުވަހުގެ މުއްދަތެއް ދީފިއެވެ.
މީޑިއާތަކުން އަމަލުކުރަންޖެހޭ ގަވާއިދަށް އިސްލާހުތަކެއް ގެނެސް އަމަލުކުރަން ފެށީ އިއްޔެއެވެ. މި ގަވާއިދުގެ ނޫސް މަޖައްލާއެއް ރަޖިސްޓްރީ ކުރަން ހުށަހަޅާތާ 30 ދުވަހުގެ ތެރޭގައި ޖަވާބު ދޭންޖެހެއެވެ. ރަޖިސްޓްރީ ކުރަން ހުށަހަޅާއިރު އެޑިޓަރަކާއި މަސްއޫލުވެރި ފަރާތެއް ހުންނަންޖެހެއެވެ. މި ޤަވާއިދުގައި އެ ފަރާތްތަކުގައި ހުންނަންޖެހޭ ޝަރުތުތައް ވެސް ވަނީ ބަޔާންކޮށްފައެވެ.
މި ގަވާއިދުގައި ބަޔާންކޮށްފައިވާ ގޮތުގައި، ނޫސް މަޖައްލާއެއް ރަޖިސްޓްރީ ކޮށްދޭނީ ފަސް އަހަރު ދުވަހުގެ މުއްދަތަކަށެވެ. މި މުއްދަތު ހަމަވުމުން ރަޖިސްޓްރީ އާ ކުރަން ހުށަހަޅަންޖެހެއެވެ. އަލަށް ގެނެވުނު އިސްލާހުގައިވާ ގޮތުން ނޫސް މަޖައްލާ ޝާއިއުކުރުން ހުއްޓާލާތާ 12 މަސް ދުވަހުގެ ތެރޭގައި ރަޖިސްޓްރީ ބާތިލްވާނެއެވެ.
މި ގަވާއިދު ގެޒެޓްކުރެވި ޝާއިއު ކުރުމުން ކުރިން ރަޖިސްޓްރީކޮށްގެން ހިންގަމުންދާ އެންމެހައި ނޫސް މަޖައްލާތަކެއް ދިވެހި ސަރުކާރުގެ ގެޒެޓުގައި ޝާއިއުކުރާ ތާރީހުން ފެށިގެން ހަމަސްދުވަހުގެ ތެރޭގައި ރަޖިސްޓްރީގެ ރިކޯޑު އާކުރަންޖެހޭނެ ކަމުގައި ވަނީ ބަޔާންކޮށްފައެވެ. ރިކޯޑު އާ ނުކުރާ ނޫސް މަޖައްލާތަކުގެ ރަޖިސްޓްރީ ބާތިލުވާނެއެވެ.
މީގެ އިތުރުން ނޫސް މަޖައްލާތައް ރަޖިސްޓްރީ ކުރުމަށް ނަގާ ފީތަކާއި ބޭނުންވާނެ އެހެން މައުލޫމާތުތައް ވެސް އަލަށް ގެނެވުނު އިސްލާހުގައި ވަނީ ހިމަނައިފައެވެ. މި ގަވާއިދަށް އަމަލުކުރަން ފެށުމާއެކު ހުރިހާ ނޫސް މަޖައްލާތަކުން ވެސް ޖެހިގެން އަންނަ އަހަރުގެ ޖޫންގެ ކުރިން ނޫސް ހިންގި ގޮތުގެ އަހަރީ ރިޕޯޓު ހުށަހަޅަންޖެހޭނެ ކަމަށް ވަނީ ބަޔާންކޮށްފައެވެ.
އުސޫގައި ބަޔާންކޮށްފައިވާ ގޮތުގައި މި ރިޕޯޓް ހުށަނާޅާ މީޑިއާތައް ބޮޑު އަދަދަކުން ޖޫރިމަނާ ކުރެވޭނެއެވެ.
