ރައްޔިތުންގެ މަޖިލީހުގެ އިޖުތިމާއީ ކޮމިޓީއަށް ބަދަލުތަކެއް ގެނެސް އެ ކޮމިޓީގެ މެންބަރަކަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އަސްމާ ރަޝީދު ހަމަޖައްސަވައިފިއެވެ.
އިޖުތިމާއީ ކޮމިޓީއަށް ގެނެވުނު ބަދަލުތައް އިއުލާނުކުރައްވަމުން މިއަދު ބޭއްވި ޖަލްސާގައި މަޖިލީހުގެ ޢަބްދުއްރަޙީމް ޢަބްދުﷲ ވިދާޅުވީ އިޖުތިމާއީ ކޮމިޓީއަށް ރައްޔިތުންގެ މަޖިލީހުގެ ދުވާފަރު ދާއިރާގެ މެންބަރު މުޙައްމަދު ޢަލީގެ ބަދަލުގައި މާފަންނު މެދު ދާއިރާގެ މެންބަރު އަސްމާ ރަޝީދު ހަމަޖައްސާފައިވާ ކަމަށެވެ.
އިޖުތިމާއީ ކޮމިޓީގެ އިތުރުން ވެސް ހަތަރު ކޮމިޓީއެއްގައި އަސްމާ ހިމެނިވަޑައިގަންނަވައެވެ. އެ ހަތަރު ކޮމިޓީއަކީ، ހިއުމަން ރައިޓްސް އެންޑް ޖެންޑަރ ކޮމިޓީ، ގެދޮރުވެރިކަމުގެ ކޮމިޓީ، ގައުމީ ތަރައްގީއާއި ތަރިކައިގެ ކޮމިޓީގެ އިތުރުން އިޖުތިމާއީ ކޮމިޓީގެ ޖޮއިންޓް ކޮމިޓީއެވެ.
ފާހަގަކޮށްލެވޭ ގޮތުގައި ރައްޔިތުންގެ މަޖިލީހުގެ ކޮމިޓީތަކަށް މި ފަހުން ވެސް ވަނީ ބަދަލުތަކެއް ގެނެސްފައެވެ. އެގޮތުން މަޖިލީހުގެ އެންމެ ބާރުގަދަ އަދި އެންމެ ނުފޫޒުގަދަ ދެ ކޮމިޓީ ކަމަށްވާ ސަލާމަތީ ހިދުމަތްތަކުގެ ކޮމިޓީ (241 ކޮމިޓީ) އާއި މާލިއްޔަތު ކޮމިޓީއަށް މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަޙްމަދު ނާޒިމްގެ ބަދަލުގައި ފުވައްމުލަކު އުތުރު ދާއިރާގެ ޕީއެންސީގެ މެންބަރު ޙަމަދު ޢަބްދުﷲ ވަނީ ހަމަޖައްސައިފައެވެ.
މާލިއްޔަތު ކޮމިޓީއަށް ނާޒިމްގެ ބަދަލުގައި ހަމަޖެއްސީ މައްޗަންގޮޅި މެދު ދާއިރާގެ މެންބަރު އަޙްމަދު ޒަމީރުއެވެ. ނަމަވެސް އެންވަޔަރަމަންޓް އެންޑް ކްލައިމެޓް ކޮމިޓީއަށް ފުނަދޫ ދާއިރާގެ މެންބަރު އަޙުމަދު މަމްދޫޙްގެ ބަދަލުގައި ނާޒިމް ވަނީ ހަމަޖައްސައިފައެވެ.
