ނިމިދިޔަ އެމްޑީޕީ ސަރުކާރުގައި މަސްވެރިން ކުރިމަތިލާންޖެހުނީ ނުއުފުލޭވަރުގެ ތަކުލީފުތަކާ ކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާއު ވިދާޅުވެއްޖެއެވެ.
މެންބަރު ޝުޖާއު މި މޭރުމުން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގައި ތިނަދޫ ދެކުނު ދާއިރާގެ މެންބަރު މުޙައްމަދު އަލްސަން ހުށަހަޅުއްވާފައިވާ ބިލަށް ބަހުސްކުރައްވަމުންނެވެ. މި ބިލަށް ބަހުސްކުރައްވަމުން ޝުޖާއު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެން މަސްވެރިންނާއި މެދު އިހުމާލުވެފައި އޮތް އޮތުން ނިމުމަކަށް ގެންނަވާފައިވާ ކަމަށެވެ.
އެކަމުގެ ހެއްކެއްގެ ގޮތުން ޝުޖާއު ފާހަގަކުރެއްވީ، ނިމިދިޔަ އެމްޑީޕީ ސަރުކާރުން ރިޔާސީ އިންތިހާބު ބޯމަތިވެފައިވަނިކޮށް މަހުގެ އަގަށް ގެނައި ބަދަލެވެ. އެގޮތުން އެ ދުވަސްވަރު މަސް ކިލޯއެއް ގަންނަ އަގު 20 ރުފިޔާއާއި 25 ރުފިޔާއާއި ދެމެދުގެ އަގުތަކަކަށް ބޮޑުކުރި ކަމަށާއި ނަމަވެސް މަސްވެރިންނަށް ދޭންޖެހޭ ”ބައި ރުފިޔާ“ ވެސް ކުރީ ސަރުކާރަށް ދެވިފައިނުވާ ކަމަށެވެ.
”2023 ގެ ރިޔާސީ އިންތިހާބު ބޯމަތިވެފައި ވަނިކޮށް ރައީސް އިބްރާހިމް މުޙައްމަދު ޞާލިޙް އެމަނިކުފާނު ހެޔޮފުޅުކަން ކަމަށް ދައްކަންވެގެން މަސްވެރިންނަށް މަސް ކިލޯއެއް ގަންނަ އަގު 25 ރުފިޔާއަށް ބޮޑުކކޮށް 20 ރުފިޔާއިން މަތިކޮށް މިކަހަލަ ޗަރުކޭސް ކުޅެމުން ދިޔައީ، އޭގެ ބޭނުމަކަށްވީ މަސްވެރިންގެ ވޯޓު ހޯދުން އެހެންނަމަވެސް ނަތީޖާއަކަށްވެގެން ދިޔައީ ބާނާ އެއްވެސް މަހަކަށް މަސްވެރިންނަކަށް ފައިސާއެއް ނުދެވޭ އެމްޑީޕީ ވެރިކަމުގައެއް،“ – މެންބަރު ޝުޖާއު ވިދާޅުވިއެވެ.
ރައީސް މުއިއްޒު ވެރިކަމާ ހަވާލުވެވަޑައިގަތް އިރު 900 މިލިއަނަށްވުރެ ގިނަ ރުފިޔާ މަސްވެރިންނަށް ނުދީ އޮތްކަން ފާހަގަކުރައްވަމުން ޝުޖާއު ވިދާޅުވީ، ކުރު މުއްދަތެއްގެ ތެރޭގައި އެ ފައިސާ ވެސް މަސްވެރިންނާ ހަވާލުކޮށް ނިންމާފައިވާ ކަމަށެވެ.
މަސްވެރިންނަށް އެންމެ ގިނަ ކަންކަން ކޮށްދިނީ އެމްޑިޕީން ކަމަށް ބުނެ އެ ޕާޓީގެ އިސް ފަރާތްތަކުން ދައްކަމުން އަންނަ ވާހަކަތަކަށް ރައްދުދެއްވަމުން ޝުޖާއު ވިދާޅުވީ، 2023 ވަނަ އަހަރު އެމްޑީޕީގެ މެނިފެސްޓޯގައި ހިމެނި ގޭދޮށު މަސްފެކްޓްރީއެއް ރާއްޖޭގެ އެއްވެސް ސަރަހައްދަކުން ފެންނަން ނެތް ކަމަށާއި އަދި ރާއްޖޭގެ ކަނޑުގެ ސަރަހައްދުގައި އެޅުނު ޕްލެޓްފޯމެއް ވެސް ފެންނަން ނެތް ކަމަށެވެ.
ޝުޖާއު އިތުރަށް ވިދާޅުވީ އަދުގެ ސަރުކާރުން މަސައްކަތް ކުރާނީ މަސްވެރިންނަށް ބޭނުންވާ ކަންކަން ވެސް ފަހިކޮށްދީގެން ކަމަށާއި އެގޮތުން މަސްވެރިންގެ އެންމެ ބޮޑު އެއް ކަންބޮޑުވުން ކަމުގައިވާ ބާނާ މަހަށް ފައިސާ ނުލިބޭ މައްސަލަ ހައްލުކޮށް، 48 ގަޑިއިރު ތެރޭގައި މަސްވެރިންނަށް ފައިސާ ލިބޭނެގޮތް މިހާރު ހަމަޖެހިފައިވާ ކަމަށެވެ.
