ދޮގު އިލްޒާމު އަޅުވައި، މުޖުތަމައުގެ ތެރޭގައި ނަފްރަތާއި ފަސާދަ އުފައްދާ ނޫސްވެރިންގެ މައްސަލަ ބަލަންޖެހޭނެ ކަމަށް ކުރީގެ ފޮރިންގ މިނިސްޓަރު ޑރ. ޢަބްދުﷲ ޚަލީލް ވިދާޅުވެއްޖެއެވެ.
ޚަލީލް މި މޭރުމުން ވިދާޅުވީ، ”އަދަދު“ ނޫހުން ”އައިޝާ“ ގެ ނަމުގައި ޝާއިއުކުރި ޑޮކިއުމެންޓްރީއާއި ގުޅިގެން އެކްސްގައި ހިއްސާ ކުރެއްވި ޕޯސްޓެއްގައެވެ. މިނިވަން ނޫސްވެރިކަމުގެ ނަމުގައި، ބައެއް ނޫސްވެރިން އެތައް ބައެއްގެ ބޮލުގައި ދޮގު އިލްޒާމް އަޅުވައި، މުޖުތަމައު ތެރޭގައި ނަފްރަތާއި ފަސާދަ އުފައްދަމުން ދާއިރު އެކަންކަން ބަލަންޖެހޭނެކަން ފާހަގަކުރައްވަމުން ޚަލީލް ވިދާޅުވީ، މިފަދަ ނޫސްވެރިންގެ ސަބަބުން މުޖުތަމައުގައި އޮންނަންޖެހޭ އަދަބު އަހުލާގު ގެއްލި، އެކަކު އަނެކަކާ މެދު އޮންނަ އިތުބާރު ގެއްލެން މެދުވެރިވާ ކަމަށެވެ.
އަދިހަމައެހެންމެ މިފަދަ އަމަލުތަކުގެ ސަބަބުން ނޫސްވެރިކަމުގެ ދާއިރާއަށް ހުތުރު އަދި ނޭދެވޭ ބަސްތައް އަމާޒުވާ ކަމަށް ޚަލީލް ވިދާޅުވިއެވެ. މިފަދަ މައްސަލަތައް ދިމާވުމަށް މެދުވެރިވާ ސަބަބެއްކަމަށް އޭނާ ގަބޫލުކުރައްވަނީ ރާއްޖޭގައި ނޫސްވެރިއަކަށްވުމަށް އެއްވެސް މިންގަނޑެއް ނުވަތަ ޝަރުތެއް ކަނޑައެޅިފައި ނެތުމުންނެވެ.
”އަޅުގަނޑު ދެކޭ ގޮތުގައި މިފަދަ ވިޔާނުދާ ކަންކަން ނޫސްވެރިކަމުގައި ދިމާވަނީ ރާއްޖޭގައި ނޫސްވެރިއަކަށްވުމަށް އެއްވެސް މިންގަނޑެއް ޝަރުތެއް އަދި ފުރިހަމަ ކުރަންޖެހޭ ތަމްރީނެއް ވެސް ނެތުމުގެ ސަބަބުން، ގައުމެއްގެ ހަތަރުވަނަ ބާރަކީ ނޫސްވެރިކަން ކަމަށް ބުނެ އުޅޭއިރު އެ ބާރުގެ ވަޒީފާގައި ތިބެންވާނީ ވެސް އެކަށީގެންވާ ތަމްރީނު ލިބިފައިވާ ކަނޑައެޅޭ ޝަރުތުތަކެއް ފުރިހަމަވާ ހުނަރުވެރިން،“ – ޚަލީލް ވިދާޅުވިއެވެ.
ޚަލީލް އިތުރަށް ވިދާޅުވީ، ޒިންމާދާރު އަދި މިނިވަން ނޫސްވެރިކަމަކީ ގައުމުގެ އިޖްތިމާއި ފޭރާމުގެ މުހިންމު ގުނަވަނެއް ކަމަށްވާއިރު ނޫސްވެރިކަމުގެ ދާއިރާ މިހާރަށްވުރެ ބޮޑަށް ހަރުދަނާކުރުމަށް ފިޔަވަޅުތަކެއް އެޅުމަކީ މުހިއްމު ކަމެއް ކަމަށެވެ.
