ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގެ މެނޭޖިންގ ޑިރެކްޓަރު ކަމުގެ މަގާމަށް ޑރ. ޢަލީ އަޒްވަރު އައްޔަންކުރައްވައިފިއެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން މީސް މީޑިއާ މިއަދު ހިއްސާކޮށްފައިވާ ޕޯސްޓެއްގައި ބުނެފައިވަނީ، ސްޓެލްކޯގެ މެނޭޖިންގ ޑިރެކްޓަރުގެ މަގާމަށް ޑރ. އަޒްވަރު އައްޔަންކުރެއްވީ މިއަދުގެ ވަގުތެއްގައި ކަމަށެވެ. އެމްޑީގެ މަގާމަށް އައްޔަންކުރެއްވުމުގެ ކުރިން ޑރ. އަޒްވަރު ހުންނެވީ އެ ކުންފުނީގެ ޑެޕިއުޓީ މެނޭޖިންގ ޑިރެކްޓަރުގެ މަގާމުގައެވެ.
ސްޓެލްކޯގެ އެމްޑީގެ މަގާމު ހުސްވުމާ ގުޅިގެން އެ ކުންފުނި ހިންގުމާ ވަގުތީގޮތުން ހަވާލުވެ ހުންނެވީ ވެސް އެ ބޭފުޅާއެވެ.
ފާހަގަކޮށްލެވޭ ގޮތުގައި ޑރ. އަޒްވަރު ވަނީ މީގެ ކުރިން ސްޓެލްކޯގެ ޗީފް އޮޕަރޭޓިން އޮފިސަރު (ސީއޯއޯ) ގެ މަގާމާއި، ރައީސުލްޖުމްހޫރިއްޔާ އައްޔަނުކުރައްވާ އެގްޒެކެޓިވް ޑައިރެކްޓަރެއްގެ ހައިސިއްޔަތުން އެ ކުންފުނީގެ ބޯޑު މެންބަރުކަން ވެސް ކުރައްވައިފައެވެ. އެހެންކަމުން އޭނާއަކީ އެ ކުންފުނި ހިންގުމުގެ ތަޖުރިބާ ލިބިވަޑައިގެންފައިވާ ބޭފުޅެކެވެ.
ސްޓެލްކޯގެ އެމްޑީގެ މަގާމު ހުސްވީ، އެ މަގާމުގައި ކުރިން ހުންނެވި ޙުސައިން ފަހުމީ މިދިޔަ އަހަރުގެ ސެޕްޓެމްބަރު މަހުގެ ހަތްވަނަ ދުވަހު މަގާމުން ވަކިކުރެއްވުމާ ގުޅިގެންނެވެ. އެހެންކަމުން އެ ކުންފުނީގެ އެމްޑީގެ މަގާމު މިހާތަނަށް ވެސް އޮޮތީ ހުސްކޮށެވެ.
