އަފްޣާނިސްތާނުގެ އުތުރުގައިވާ ޖޫޒްޖާން ޕްރޮވިންސްގެ އާމޫ ދަރްޔާ އޮއިލް ފީލްޑުގެ ޒަމްރަދު ސައި ސަރަހައްދުގެ ފަސް ވަޅަކުން ތެޔޮ ނެގުމުގެ މަސައްކަތް ފަށާފައިވާ ކަމަށް އެ ޤައުމުގެ މިނިސްޓްރީ އޮފް މައިންސް އެންޑް ޕެޓްރޯލިއަމް އިން މިއަދު ނެރުނު ބަޔާނެއްގައި ބުނެފިއެވެ.
އެ ބަޔާނުގައިވާ ގޮތުން މި ވަޅުތަކުން މިހާރު ދުވާލަކު ގާތްގަނޑަކަށް 500 ކިއުބިކް މީޓަރުގެ ތެޔޮ އުފައްދައެވެ. ހަމައެކަނި ވޭތުވެދިޔަ ހަ މަސްދުވަހުގެ ތެރޭގައި، ޒަމްރަދު ސައި ސަރަހައްދުގައި 400 ކިލޯމީޓަރުގެ އައު ސީޒްމިކް ސާވޭތަކެއް ހަދާފައިވާއިރު، މީގެ ސަބަބުން އިތުރު ތެލާއި ގޭސް ހުރި ތަންތަން ވަނީ ފެނިފައެވެ.
އަފްޣާނިސްތާނުގެ އިންޖިނޭރުން ތިން އަހަރު ވަންދެން ކުރިއަށްގެންދިޔަ ފުޅާ ޖިއޮލޮޖިކަލް ސާވޭތަކާއި، ދިރާސާތަކާއި އަދި ބޯހޯލް ކޮނުމުގެ މަސައްކަތްތަކަށްފަހު، އެ ސަރަހައްދުގައި ހުރި 12 ވަޅުގެ ތެރެއިން ފަސް ވަޅަކުން މިހާރު ވަނީ ކަންކަންބެލުމުގެ ގޮތުން ތެޔޮ ނަގަން ފަށާފައެވެ.
އަފްޣާނިސްތާނުގެ އިދާރާތަކުން ބުނި ގޮތުގައި، އަފްޣާނިސްތާނުގެ މާހިރުން މެދުވެރިކޮށް ގުދުރަތީ ވަސީލަތްތައް ނިޒާމީ ގޮތެއްގައި ބެލެހެއްޓުމަށާއި އޭގެ ބޭނުން ހިފުމަށްޓަކައި ފުރިހަމަ ރޭވުންތަކެއް މިހާރު ދަނީ ތަންފީޒު ކުރަމުންނެވެ.
