ފަހަރި ކައިރިއަށް ބަރަހަނާކޮށް ދިޔަ ގދ. ވާދޫ މީހަކު، ޖަލަށްލާން އެ ރަށު ކޯޓުން ހުކުމްކޮށްފި އެވެ.
ގދ. ވާދޫގައި، މިދިޔަ ޑިސެމްބަރު މަހު ހިނގި މި ހާދިސާއަކީ، ދިވެހި ފިރިހެނަކު، އޭނާގެ އެއްބަނޑު ބޭބެގެ އަންހެނުން، ނުވަތަ އޭނާގެ ފަހަރި، ގޭ ބަދިގޭގައި އުޅެނިކޮށް، ބަރަހަނާކޮށް ބަދިގެއަށް ދިޔަ މައްސަލަ އެވެ.
މި މައްސަލައިގައި އެ މީހާއަށް ކުރީ ބޭއަދަބީ ގޮތުގައި ޖިންސީ ގުނަވަން ހާމަކުރުމުގެ ކުށުގެ ދައުވާއެވެ.
އެ މައްސަލައިގައި ދައުވާ ލިބޭ ފަރާތުން އެ ކުށަށް އިއުތިރާފުވެފައިވާތީ އެ މައްސަލަ ކުރިއަށްގެންދިޔައީ އަވަސް ނިޔާގެ މައްސަލައެއްގެ ގޮތުގައެވެ.
އެހެންކަމުން، އެ ކުށުގެ އަސާސީ އަބަދު ލުއިކޮށް ކޯޓުން އެ މީހާއަށް އިއްވީ، ތިން މަހާއި 18 މަސް ދުވަހުގެ ޖަލު ހުކުމެކެވެ.
އެއީ އަސާސީ އަބަދު ކަމަށްވާ ހަތަރު މަހާއި 24 ދުވަހުން އެއް ދަރަޖަ ލުއިކޮށް ކަނޑައެޅި ހުކުމެކެވެ. ނަމަވެސް ދައުވާ ލިބުނު މީހާ، ދެ މަސް ދުވަހު ބަންދުކޮށްފައި ހުރުމުން އެ މުއްދަތު އަދަބުން އުނިކުރުމުން ތަންފީޒު ކުރަން ޖެހޭ އަދަބަކީ އެއް މަހާއި 18 ދުވަހުގެ ޖަލު ހުކުމެކެވެ.
