ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްތަށިފުޅުގައި ޒިނޭގެ ދޮގު ތުހުމަތު އަޅުވައި ”އަދަދު“ ނޫހުން ގެނެސްދިން ”އައިޝާ“ ޑޮކިއުމެންޓްރީީގެ މައްސަލައާއި ގުޅިގެން ހަޔަރ އެޑިއުކޭޝަން މިނިސްޓްރީގެ ކުރީގެ ޕޮލިޓިކަލް ޑިރެކްޓަރު އައިޝަތު އީޝާ އަޝްރަފްގެ ޕާސްޕޯޓު ހިފަހައްޓައިފިއެވެ.
ހުސްވި މާރިޗު މަހުގެ 28 ވަނަ ދުވަހުގެ ރޭ ”އަދަދު“ ނޫހުން ނެރުނު މި ޑޮކިއުމެންޓްރީގެ މައްސަލައިގައި ފުލުހުން ވަނީ ޖިނާއީ ތަހުގީގެއް ފަށައި މިކަމުގައި ޝާމިލުވި އެންމެންގެ މައްޗަށް ފިޔަވަޅު އަޅަން ފަށައިފައެވެ. އެގޮތުން ހުޅުމާލޭގައި އީޝާ ދިރިއުޅެމުންދިޔަ އެޕާޓްމަންޓަށް ފުލުހުން މިއަދު ގޮސް، އީޝާއަށް ވަނީ ޕާސްޕޯޓް ހިފެހެއްޓުމަށް ކްރިމިނަލް ކޯޓުން ނެރުނު އަމުރު ރައްދުކޮށްދީފައެވެ.
ކްރިމިނަލް ކޯޓުން އީޝާގެ ޕާސްޕޯޓް އަދި ޓްރެވެލް ޑޮކިއުމަންޓްތައް ހިފެހެއްޓުމަށް އަމުރުކޮށްފައިވަނީ އިއްޔެއިން ފެށިގެން އަންނަ ޖުލައި މަހުގެ 26 ވަނަ ދުވަހުގެ ނިޔަލަށެވެ. ކޯޓު އަމުރުން އެނގޭ ގޮތުގައި އީޝާގެ މައްޗަށް ފުލުހުން ކުރާ ތުހުމަތަކީ ޑޮކިއުމަންޓްރީ ތައްޔާރުކުރުމުގައި އޭނާގެ ބައިވެރިވުން އޮތުމެވެ. މީގެ އިތުރުން އީޝާ ރާއްޖެއިން ފުރައިގެން ފިލަން އުޅޭ ކަމަށް ފުލުހުންގެ އިންޓެލިޖެންސް މައުލޫމާތު ލިބިފައިވާ ކަމަށްވެސް ކޯޓު އަމުރުގައި ވަނީ ފާހަގަކޮށްފައެވެ.
މި މައްސަލައާއި ގުޅިގެން ”އެކި އެމްވީ“ ގެ ފަރާތުން ފުލުހުންގެ ބަހެއް ހޯދައިލުމަށް ފުލުހުންގެ މީޑިއާ އޮފިޝަލަށް ގުޅާލުމުން ފޯނަށް ޖަވާބުނުދެއްވާތީ ފުލުހުންގެ ބަހެއް ލިބޭގޮތް ވެފައިނުވި ނަމަވެސް، ސޯޝަލް މީޑިއާގައި އީޝާ ހިއްސާކޮށްފައިވާ ޕޯސްޓުތަކުން މިކަން މިހާރު ވަނީ ކަށަވަރުވެފައެވެ.
މި މައްސަލައާއި ގުޅިގެން ފުލުހުން ރޭގެ ވަގުތެއްގައި ވަނީ އަދަދު ނޫސް ހިންގާ އޮފީހަށް ވަދެ، އެ ތަނުގައި ހުރި ސާމާނު ފުލުހުންގެ ބެލުމުގެ ދަށަށް ގެންގޮސްފައެވެ. މީގެ އިތުރުން އަދަދު ނޫހުގެ ސީއީއޯ ޙުސައިން ފިޔާޒު މޫސާ އާއި އެ ނޫހުގެ މެނޭޖިންގ އެޑިޓަރު ޙަސަން މުޙައްމަދުގެ ޕާސްޕޯޓް ވެސް ވަނީ ކޯޓު އަމުރެއްގެ ދަށުން ތިން މަސްދުވަހަށް ހިފަހައްޓައިފައެވެ.
ފާހަގަކޮށްލެވޭ ގޮތުގައި ”އަދަދު“ ނޫހުން ގެނެސްދިން ”އައިޝާ“ ޑޮކިއުމެންޓްރީގައި އިންޓަރވިއުދިން އަންހެން މީހާ ވަނީ އޭނާއަކީ ޒިނޭ ކުރާ މީހެއްކަމަށް އެއްބަސްވެ، މިކަމުގައި އޭނާއަށް އާންމު ރައްޔިތުންގެ ސަޕޯޓު ބޭނުންވާ ކަމަށް ބުނެފައެވެ. މި މައްސަލައާއި ގުޅިގެން ގިނަ ބައެއްގެ ފާޑުކިޔުން ”އައިޝާ“ އަށް ވަނީ އަމާޒުވެފައެވެ. މީގެ އިތުރުން ޒިނޭކުރާ މީހާއާއި ޤަޒުފުކުރާ މީހާގެ މައްޗަށް އިސްލާމީ ޝަރީއަތުގައި ކަނޑައަޅުއްވާފައިވާ ހައްދު އޭނާގެ މައްޗަށް ގާއިމުކުރުމަށް ގިނަ ބަޔަކު އަންނަނީ ގޮވާލަމުންނެވެ.
