ޓެކްސީ ދަތުރުތަކުގެ އަގު ބޮޑުކަމުގެ ޝަކުވާ ލިބިފައިވާ ކަމަށާއި، ދަތުރުތަކުގެ އަގަށް ބަދަލު ގެންނާނީ މަޝްވަރާ ކުރަންޖެހޭ ފަރާތްތަކާއެކު މަޝްވަރާ ކުރެއްވުމަށްފަހުގައި ކަމަށް އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.
މިނިސްޓަރު ސަޢީދު މި މޭރުމުން ވިދާޅުވީ ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ. މިނިސްޓަރު ސަޢީދު ވިދާޅުވީ، ދަތުރުފަތުރުގެ ދާއިރާގެ މެންޑޭޓާއި ހަވާލުވުމަށްފަހު މި މައްސަލައިގައި ޑްރައިވަރުންގެ ފަރާތުން ސިޓީތައް ލިބިފައިވާ ކަމަށާއި ޓެކްސީ ދަތުރުތަކުގެ އަގުތަކަށް ބަދަލެއް ގެނެސްދިނުމަށް އެދި ޑްރައިވަރުން ސިޓީ ފޮނުވާފައިވާ ކަމަށެވެ.
މި މައްސަލައާއި ގުޅިގެން ގޮތެއް ނިންމުމުގެ ކުރިން ކަމާ ގުޅުން ހުރި ފަރާތްތަކާއެކު މަޝްވަރާ ކުރަންޖެހޭ ކަމަށާއި ވަކިން ހާއްސަކޮށް ކެބިނެޓުގައި މިކަމާ ގުޅޭގޮތުން މަޝްވަރާތައް ކުރަންޖެހޭ ކަމަށް މިނިސްޓަރު ވަނީ ފާހަގަކުރައްވައިފައެވެ.
މިނިސްޓަރު ސަޢީދު ވަނީ ޓެކްސީ ގަވާއިދާއި ދަތުރުފަތުރާ ގުޅޭ އެހެން ގަވާއިދުތައް ތަންފީޒުވުމުގެ މައްސަލައަށް ވެސް އަލިއަޅުއްވާލައްވައިފައެވެ. އެގޮތުން ގަވާއިދުގެ ތެރެއިން ކަމެއް ކުރަން ހިމެނިފައިވާނަމަ އެކަން ތަންފީޒުކުރަންޖެހޭ ކަމަށާއި ގޮންޖެހުންތަކެއް ހުރިނަމަ އެކަންކަން ވެސް ހައްލު ކުރަންޖެހޭ ކަމަށް މިނިސްޓަރު ވިދާޅުވިއެވެ.
މި މަސައްކަތް ކުރުމަށް ދަތުރުފަތުރުގެ ދާއިރާގައި ހުރި މައްސަލަތައް ދެނެގަތުމަށް ހުރިހާ ސިޓީތަކެއް ހިމެނޭހެން ހުރިހާ ސަރަހައްދަކުން ކޮންސަލްޓޭޝަން ބައްދަލުވުންތަކެއް ބާއްވައި މިކަމަށް ހައްލު ހޯދުމަށް މަސައްކަތް ކުރައްވާނެ ކަމަށް މިނިސްޓަރު ވަނީ އިތުރަށް ވިދާޅުވެފައެވެ.
