ފުލުހުންގެ ޚިދުމަތުގައި އަންހެނުންގެ އަދަދު އިތުރުވުމަކީ ހަމައެކަނި މިންތީގެ ހަމަހަމަކަން ގާއިމުކުރުން ނޫންކަމަށާއި، މިއީ ގައުމުގެ އަމަން ބެލެހެއްޓުމުގެ މަސައްކަތަށް ލިބޭ ވަރަށް ބޮޑު ކުރިއެރުމެއްކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ.
އެކަމަނާ މިފަދައިން ވިދާޅުވީ، 2026 އިން 2028 އަށް އައްޔަންކުރެއްވި ”މޯލްޑިވްސް ވިމެން އިން ޕޮލިސިންގ“ ކޮމިޓީ އިފްތިތާޙްކޮށްދެއްވުމަށް ރޭ އިސްކަންދަރު ކޮށީގައި ބޭއްވި ޚާއްޞަ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ. މި ރަސްމިއްޔާތަށް އެކަމަނާ ވަޑައިގަތުމުން، އެކަމަނާގެ ޝަރަފުގައި ފުލުހުންގެ އޮނަރ ގާޑެއް ވަނީ އަރުވާފައެވެ.
މި ރަސްމިއްޔާތުގައި ވާހަކަފުޅު ދައްކަވަމުން ފަސްޓްލޭޑީ ވިދާޅުވީ، ފުލުހުންގެ ތެރޭގައި އަންހެން އޮފިސަރުންގެ ބައިވެރިވުން ބޮޑުވުމަކީ މުޖުތަމަޢުގެ އިތުބާރު އިތުރުވެ، ޚާއްޞަކޮށް ޖިންސީ އަނިޔާއާއި ގެވެށި އަނިޔާ ފަދަ ނާޒުކު މައްސަލަތަކަށް ދެވޭ އިޖާބަ ހަރުދަނާވާނެ ކަމެއް ކަމަށެވެ. އަދި އަންހެނުން ހަމައެކަނި އިދާރީ މަސައްކަތްތަކުގައި ތިބުމުގެ ބަދަލުގައި، ފްރަންޓްލައިން އޮޕަރޭޝަންތަކާއި، ތަޙުޤީޤީ ދާއިރާ އަދި ޓެކްނިކަލް ދާއިރާތަކުން ކުރިއަށް ދިއުމަށް އެކަމަނާ ގޮވާލެއްވިއެވެ.
ރާއްޖޭގެ ތަޢުލީމީ އަދި ޞިއްޙީ ދާއިރާގައި އަންހެނުންގެ ނިސްބަތް މަތިވި ނަމަވެސް، ފުލުހުންގެ ޚިދުމަތުގައި އަންހެނުންގެ އަދަދު މަދުކަން ފާހަގަކުރައްވައި، އެ އަދަދު އިތުރުކުރުމަށް ޚާއްޞަ އިސްކަމެއް ދިނުމަށް އެކަމަނާ އިލްތިމާސްކުރެއްވިއެވެ. މީގެ އިތުރުން، އަންހެން އޮފިސަރުންނަށް ޢާއިލީ ޒިންމާތަކާއެކު ވަޒީފާގައި ދެމިތިބެވޭނެ ފަދަ ދެމެހެއްޓެނިވި ސިޔާސަތުތަކެއް ތަންފީޒުކުރުމުގެ މުހިންމުކަންވެސް އެކަމަނާ ފާހަގަކުރެއްވިއެވެ.
މި ރަސްމިއްޔާތުގައި ރައީސުލްޖުމްހޫރިއްޔާގެ އަނބިކަނބަލުން ވަނީ ”މޯލްޑިވްސް ވިމެން އިން ޕޮލިސިންގ“ ކޮމިޓީގެ އައު ލޯގޯ އިފްތިތާޙްކޮށްދެއްވައި، އެ ކޮމިޓީގެ ތިންވަނަ ދައުރުގެ މެންބަރުންނަށް ހަނދާނީ ފިލާ ޙަވާލުކޮށްދެއްވާފައެވެ. އަދި ކޮމިޝަނަރ އޮފް ޕޮލިސް އަޙްމަދު މުޙައްމަދު ވަނީ އެކަމަނާއަށް ލޯގޯގެ ރަމްޒީ ހަނދާނީ ޓޯކަނެއް ވެދުމަށް އަރުވާފައެވެ.
މި ރަސްމިއްޔާތުގައި ދައުލަތުގެ ވަޒީރުންނާއި، އިސްވެރިންގެ އިތުރުން ބޭރު ގައުމުތަކުގެ ޑިޕްލޮމެޓުންނާއި ފުލުހުންގެ އިސްވެރިން ބައިވެރިވެވަޑައިގެންނެވިއެވެ. އެކަމަނާގެ ވާހަކަފުޅު ނިންމަވާލެއްވީ، ދިވެހި ފުލުހުންގެ ޚިދުމަތަކީ ގައުމުގެ އަމާންކަމުގެ މައިބަދަ ކަމަށާއި، ފުލުހުން އަދާކުރަނީ އަންނަން އޮތް ޖީލުތަކަށްޓަކައި ކުރާ މަތިވެރި ގައުމީ ޚިދުމަތެއްކަން ހަނދާންކޮށްދެއްވަމުންނެވެ.
