އަންނަ 2027 ވަނަ އަހަރުގެ ނިޔަލަށް ތިލަމާލެ ބްރިޖުގެ މަސައްކަތް އެއްކޮށް ނިންމައި ބޭނުންކުރަން ފެށޭނެ ކަމަށް ހައުސިންގ މިނިސްޓަރު ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.
މިނިސްޓަރު މުއްޠަލިބް މި މޭރުމުން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ތިލަމާލެ ބްރިޖު ނިމޭނެ ތާރީހެއް ހާމަކޮށްދެއްވުމަށް އެދި މެންބަރަކު ކުރެއްވި ސުވާލަކަށް ޖަވާބުދެއްވަމުންނެވެ. މިނިސްޓަރު ވިދާޅުވީ ތިލަމާލެ ބްރިޖުގެ މަސައްކަތް ނިންމުން ވަރަށް ބޮޑަށް ދިގުލައިގެން ގޮސްފައިވާ ކަމަށެވެ.
ބްރިޖު ނިންމުން ލަސްވާ ސަބަބެއް ކަމުގައި މިނިސްޓަރު ފާހަގަކުރެއްވީ، މާލެއާއި ވިލިމާލެ ގުޅޭ ސަރަހައްދަކީ ކަނޑުގަދަ ސަރަހައްދަކަށްވުން ކަމަށެވެ. މީގެ އިތުރުން މަޝްރޫއު ކުރިއަށްގެންދާ ކޮންޓްރެކްޓަރު ކަމަށްވާ އެފްކޮންސްއަކީ މީގެ ކުރިން އެފަދަ މަސައްކަތެއްކޮށްފައިވާ ބަޔަކަށް ނުވާތީ މަސައްކަތް އިތުރަށް ދަސްކުރުމަށް ވަގުތު ބޭނުންވި ކަމަށް ވެސް މިނިސްޓަރު ވަނީ ވިދާޅުވެފައެވެ.
”އަޅުގަނޑުމެން ކަނޑައަޅާފައި އޮތް މުއްދަތުގައި އަދި މިދިޔަ ސަރުކާރުން ނިންމޭނެ ކަމަށް ކަނޑައަޅައި އިތުރަށް 30 ދުވަސް ދިނީމަ ވެސް އެ 30 ދުވަސް މާޗް މަހަށް ހަމަވެގެން ދިޔައިރު ނުވި,“ – މިނިސްޓަރު މުއްޠަލިބް ވިދާޅުވިއެވެ.
އެފްކޮންސް ޖޫރިމަނާކޮށް ފިޔަވަޅު އަޅައިފިނަމަ މަޝްރޫއު ހުއްޓިދާނެކަމުގެ ބިރު އޮތުމުން އަދިވެސް މަސައްކަތް ކުރަނީ ކޮންޓްރެކްޓަރަށް އިތުރު ވަގުތު ދީގެން ނަމަވެސް މަސައްކަތް ނިންމުމަށް ކަމަށް މިނިސްޓަރު މުއްޠަލިބް ވަނީ އިތުރަށް ވިދާޅުވެފައެވެ. މިނިސްޓަރު މި މޭރުމުން ވިދާޅުވެފައިވާއިރު ތިލަމާލެ ބްރިޖުގެ 72 އިންސައްތަ މަސައްކަތް މިހާރު ވަނީ ނިމިފައެވެ. ނަމަވެސް އަދިވެސް މަސައްކަތް ކުރިއަށްދާ މިންވަރު ލަސްކަމަށް ކަމާ ގުޅުން ހުރި ގިނަ ފަރާތްތަކުން ވެސް އަންނަނީ ބުނަމުންނެވެ.
ފާހަގަކޮށްލެވޭ ގޮތުގައި މިދިޔަ ހަފުތާގެ ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެސް ވަނީ ތިލަމާލެ ބްރިޖުގެ މަސައްކަތް އެކަށީގެންވާ ދުވެއްޔެއްގައި ކުރިއަށް ނުގޮސް، ލަސަވަމުންދިއުމަކީ އެކަމާ މެދު ސަރުކާރުން ނުހަނު ކަންބޮޑުވާކަމެއް ކަމަށް ވިދާޅުވެފައެވެ. އަދި މިކަމުގައި ސަރުކާރުން ކުރަންޖެހޭ ހުރިހާ މަސައްކަތެއް ކުރަމުން އަންނަ ކަމަށާއި މަސައްކަތް ކުރިއަށްގެންދާ ކޮންޓްރެކްޓަރުގެ އެދުމުގެ މަތިން މަސައްކަތް ނިންމުމަށް އިތުރު ވަގުތު ދީފައިވާ ކަމަށް ރައީސް ވިދާޅުވިއެވެ.
