ރައީސް ސޯލިހްގެ ވެރިކަމުގައި ދިވެހި ދައުލަތް އޮތީ, މީގެ ކުރިން ރާއްޖެ ނުދަރާ ވަރަށް ދަރުވާލާފައި ކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އަދި ޕީއެންސީގެ ނައިބު ރައީސް އިބްރާހިމް ޝުޖާއު ވިދާޅުވެއްޖެއެވެ.
މެންބަރު ޝުޖާއު މި މޭރުމުން ވިދާޅުވީ އެކްސްގައި ހިއްސާކުރެއްވި ޕޯސްޓެއްގައެވެ. ޝުޖާއު ވިދާޅުވީ، ރައީސް ސޯލިހް ވެރިކަމުން ފައިބާވަޑައިގަތީ ރާއްޖޭގެ ތާރީހުގައި ދިވެހި ދައުލަތް ނުދަރާވަރަށް ދަރުވާލައި، ރާއްޖޭގެ ކަނޑުގެ ބައެއް ސިއްރު ސިޓީފުޅަކުން ދޫކޮށްލައްވާފައި ކަމަށެވެ.
ރައީސް ސޯލިހްގެ ވެރިކަމުގައި ރާއްޖޭގެ ތާރީޚްގައި ނުދަރާވަރަށް ދިވެހި ދަޢުލަތް ދަރުވައި،ރާއްޖޭގެ ކަނޑުގެ ބައެއް ސިއްރު ސިޓީފުޅަކުން ދޫކޮށްލައްވައި ރާއްޖޭގެ މަގުތަކުގައި ބޮންގޮވައި ތިމާގެ އަމިއްލަ ޕާޓީ އަކީ ވަގުންގެ ނެޓްވޯކެއް ކަމަށް ވިދާޅުވެ،ޕާޓީ ދޫކުރައްވައި ނުކުމެވަޑައިގެން…
— Ibrahim Shujau (@IbrahimShujaau) April 26, 2026
މީގެ އިތުރުން ޝުޖާއު ވަނީ ކުރީގެ ރައީސް ނަޝީދަށް ވެސް ވަރަށް ބޮޑަށް ފާޑު ވިދާޅުވެފައެވެ. އެގޮތުން ނިމިދިޔަ އެމްޑީޕީ ވެރިކަމުގައި ރާއްޖޭގެ މަގުތަކުގައި ބޮންގޮވައި، ތިމާގެ އަމިއްލަ ޕާޓީ އަކީ ވަގުންގެ ނެޓްވޯކެއް ކަމަށް ވިދާޅުވެ، ޕާޓީ ދޫކުރައްވައި ނުކުމެވަޑައިގެން އެހެން ސިޔާސީ ޕާޓީއެއް އުފައްދަވައި ސިޔާސީ މަސައްކަތްޕުޅު އެ ޕާޓީގެ ތެރެއިން ނަޝީދު ފެއްޓެވިކަން ޝުޖާއު ފާހަގަކުރެއްވިއެވެ.
މި ހުރިހާ ކަމެއް ހިނގައި ދިޔަ ދުވަސްވަރު، ރައީސް ނަޝީދާއެކު މަސައްކަތްޕުޅު ކުރެއްވި ހުރިހާ މެމްބަރުން ތިއްބެވީ ރައްޔިތުންގެ މަޖިލީހުގައިކަން ފާހަގަކުރައްވަމުން ޝުޖާއު ވަނީ، ގައުމަށް ހެޔޮއެދިވަޑައިގެން ނަޝީދާއި ނަޝީދާއެކު މަސައްކަތް ކުރެއްވި މެމްބަރުން މަޖިލީހުގެ މެމްބަރުކަމުން އެދުވަސްވަރު އިސްތިއުފާ ނުދެއްވީ ކީއްވެތޯ ސުވާލު އުފައްދަވައިފައެވެ.
ފާހަގަކޮށްލެވޭ ގޮތުގައި އެމްޑީޕީގެ އެތެރޭގެ އިންތިހާބާ ދިމާކޮށް އަތޮޅުތެރޭގެ ރަށްރަށަށް ވަޑައިގެން ނަޝީދު ގެންދަވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި މި ސަރުކާރުގެ އިތުރުން ޕީއެންސީއާއި ގުޅޭގޮތުން އެތަކެއް ދޮގު ވާހަކަތަކެއްދައްކަވަމުންނެވެ. އެގޮތުން ރައްޔިތުންގެ މަޖިލީހުގެ ޕީއެންސީއަށް ނިސްބަތްވާ މެންބަރުންނަކީ ރައްޔިތުންނަށް ހެޔޮއެދޭ ބައެއްކަމަށްވާނަމަ މިހާރުން މިހާރަށް އިސްތިއުފާދެއްވަންޖެހޭ ކަމަށް ވެސް ނަޝީދު ވަނީ ވިދާޅުވެފައެވެ.
