ނިމިދިޔަ މާރިޗު މަހުގެ ކަރަންޓު ބިލް ބޮޑުވެފައިވާ ކަމަށް ރައްޔިތުންގެ ތެރެއިން ގިނަ ބަޔަކު ޝަކުވާ ކުރަމުންދާ ދަނޑިވަޅެއްގައި، ފެނަކަ ކޯޕަރޭޝަން ލިމިޓެޑުން ރަސްމީ ބަޔާނެއް ނެރެ، ކަރަންޓު ބިލް ތައްޔާރުކޮށްފައިވަނީ ކަނޑައެޅިފައިވާ ޤަވައިދުތަކާ ޚިލާފަށް ނޫން ކަމަށް ހާމަކޮށްފިއެވެ.
ފެނަކައިން ނެރުނު ބަޔާނުގައި ބުނެފައިވަނީ، ކޮންމެ މަހެއްގައިވެސް ކަރަންޓު ބިލް ތައްޔާރުކުރެވެނީ ކަނޑައެޅިފައިވާ ރިވިންގ ފަރާތްތަކެއް ލައްވައި ކަމަށާއި، ބިލަށް ގެންނަ ކޮންމެ ބަދަލެއްވެސް ގެންނަނީ ކަނޑައެޅިފައިވާ އުޞޫލުތަކާ އެއްގޮތަށް ކަމަށެވެ. އަދި ބިލް ތައްޔާރުކުރުމުގައި ކުންފުނިން ޢަމަލުކުރަމުންދަނީ ޚިދުމަތްދިނުމުގައި ޢަމަލުކުރަންޖެހޭ ޤާނޫނާއި ޤަވައިދުތަކާ އެއްގޮތަށް ކަމަށްވެސް ބަޔާނުގައި ފާހަގަކޮށްފައިވެއެވެ.
މިކަމާ ގުޅިގެން ފެނަކައިން ވަނީ، ތައްޔާރުކޮށްފައިވާ ބިލެއްގައި މައްސަލައެއް ހުރި ކަމަށް ޝައްކު ކުރެވިއްޖެ ނަމަ، ކުންފުންޏަށް ރިޕޯޓްކުރުމަށް ގޮވާލައި، ބިލް ޗެކްކޮށްދިނުމުގެ ފުރިހަމަ އެހީތެރިކަން ފޯރުކޮށްދެވޭނެ ކަމަށްވެސް ހާމަކޮށްފައެވެ.
މީގެ އިތުރުން، ފެނަކައިން ވަނީ ރައްޔިތުންނަށް ހަނދާންކޮށްދިނުމުގެ ގޮތުން، މާރިޗާއި، އޭޕްރީލް، އަދި މެއި މަހަކީ ކޮންމެ އަހަރެއްގައިވެސް ކަރަންޓު ބޭނުންކުރެވޭ މިންވަރު އެންމެ ގިނަ ދުވަސްވަރު ކަމަށްވާތީ، ކަރަންޓު ބޭނުންކުރެއްވުމުގައި ސަމާލުވެ ވަޑައިގެންނެވުމަށް ވެސް އިލްތިމާސްކޮށްފައެވެ.
