އަހަރުގެ މިހާތަނަށް ކްރޫޒްލައިންތަކުން ރާއްޖެއަށް ޒިޔާރަތްކުރި ފަތުރުވެރިންގެ އަދަދު 178 އިންސައްތަ އިތުރުވެފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.
ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން މި މަހުގެ 22 ވަނަ ދުވަހުގެ ނިޔަލަށް ރާއްޖެއަށް ޖުމުލަ 758،753 ފަތުރުވެރިން ވަނީ ޒިޔާރަތްކޮށްފައެވެ. އޭގެ ތެރެއިން 748،402 ފަތުރުވެރިން ރާއްޖެއަށް ޒިޔާރަތްކޮށްފައިވަނީ ވައިގެމަގުންނެވެ. ބާކީ 10،351 ފަތުރުވެރިން ރާއްޖެއަށް ޒިޔާރަތްކޮށްފައިވަނީ ކަނޑުމަގުންނެވެ.
ކްރޫޒްލައިންތަކުން ރާއްޖެއަށް ޒިޔާރަތްކުރި ފަތުރުވެރިންގެ އަދަދު 10،351 އަށް އަރާފައިވާއިރު، މިއީ އަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ %1.4 އެވެ. މިދިޔަ އަހަރުގެ މިހާތަނަށް ކްރޫޒްލައިންތަކުން ރާއްޖެއަށް ޒިޔާރަތްކޮށްފައިވަނީ އެންމެ 3،753 ފަތުރުވެރިންނެވެ. އެހެންކަމުން މިއީ 178 އިންސައްތައިގެ ކުރިއެރުމެކެވެ.
އަހަރުގެ މިހާތަނަށް ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރި ގައުމުތަކަކީ:
• ޗައިނާ: 111،380 ފަތުރުވެރިން
• ރަޝިއާ: 95،645 ފަތުރުވެރިން
• އިނގިރޭސިވިލާތް: 70،288 ފަތުރުވެރިން
• އިޓަލީވިލާތް: 63،144 ފަތުރުވެރިން
• ޖަރުމަނުވިލާތް: 51،113 ފަތުރުވެރިން
ރާއްޖެއަކީ އަބަދު ވެސް ކްރޫޒްލައިންތަކުގެ މެދުގައި މަގުބޫލު މަންޒިލެއް ކަމަށްވާތީ ކޮންމެ އަހަރަކު ވެސް ގިނަ އަދަދެއްގެ ފަތުރުވެރިންނާއެކު ރާއްޖެއަށް ކްރޫޒްލައިންތައް އަންނަކަން ފާހަގަކޮށްލެވެއެވެ.
