ވޮޝިންގޓަން: އެމެރިކާގެ ރައީސް ޑޮނަލްޑް ޓްރަމްޕާއި، އެމަނިކުފާނުގެ އަނބިކަނބަލުން މެލަނިއާ ޓްރަމްޕް އަދި ކެބިނެޓްގެ އިސް ބޭފުޅުން ބައިވެރިވެވަޑައިގެންނެވި ”ވައިޓް ހައުސް ކޮރެސްޕޮންޑެންޓްސް ޑިނަރ“ ކުރިއަށް ދަނިކޮށް ދިން ބަޑީގެ ހަމަލާގައި ރައީސް ޓްރަމްޕަށާއި އެމަނިކުފާނުގެ އަރިސް އެއްވެސް ބޭފުޅަކަށް އަނިޔާއެއް ލިބިފައެއް ނުވާކަމަށް ޓްރަމްޕްގެ ސެކިޔުރިޓީ ޓީމުން ބުނެފިއެވެ.
މި ހާދިސާއާ ގުޅިގެން ބޭއްވި ނޫސްވެރިންގެ ބައްދަލުވުމެއްގައި ރައީސް ޓްރަމްޕް ވިދާޅުވީ، ގިނަ އަދަދެއްގެ ހަތިޔާރާއެކު ހުރި މީހަކު ސެކިއުރިޓީ ޗެކްޕޮއިންޓަށް ހަމަލާދީ ވަންނަން މަސައްކަތް ކޮށްފައިވާ ކަމަށާއި، ނަމަވެސް ސީކްރެޓް ސާވިސްގެ އޮފިސަރުން ވަނީ ވަގުތުން އެމީހާ ހުއްޓުވާފައި ކަމަށެވެ. ޓްރަމްޕް ވަނީ އެ މީހާއަކީ ”ވަރަށް ބަލި މީހެއް“ ކަމަށާއި އެމެރިކާގެ ގާނޫނުއަސާސީއަށް ހަމަލާދިން ”މުޖުރިމެއް“ ގެ ގޮތުގައި ސިފަކޮށްފައެވެ.
މި ހަމަލާގައި ސީކްރެޓް ސާވިސްގެ އޮފިސަރެއްގެ ގަޔަށް ބަޑިޖަހާފައިވީ ނަމަވެސް، އޭނާ ލައިގެން ހުރި ބުލެޓްޕްރޫފް ވެސްޓުގެ ސަބަބުން ފުރާނަ ސަލާމަތްވެފައިވާ ކަމަށާއި އޭނާގެ ހާލު ރަނގަޅު ކަމަށް ރައީސް ވިދާޅުވިއެވެ. ”މިއީ ފާއިތުވި ދެތިން އަހަރު ތެރޭގައި ގާތިލަކު ހަމަލާދޭން އުޅުނު ފުރަތަމަ ފަހަރެއް ނޫން،“ ޓްރަމްޕް ވިދާޅުވިއެވެ. އަދި މިފަދަ ހާދިސާތަކުގެ އަލީގައި، ހުރިހާ އެމެރިކާ ރައްޔިތުންވެސް އެމީހުންގެ މެދުގައި ހުރި ތަފާތުތައް ސުލްހަވެރިކަމާއެކު ހައްލުކުރުމަށް އެމަނިކުފާނު ގޮވާލެއްވިއެވެ. މި ހަމަލާގެ އަމާޒަކީ ޓްރަމްޕްތޯ ނޫސްވެރިއަކު ސުވާލުކުރުމުން ޓްރަމްޕް ބުނީ ”އެހެން ކަމަށް ލަފާކުރެވޭ“ ކަމަށެވެ.
ސީކްރެޓް ސާވިސްއިން ބުނި ގޮތުގައި މި ބަޑީގެ ހަމަލާ ދީފައިވަނީ ސެކިއުރިޓީ ބަލައި ފާސްކުރާ ”ސްކްރީނިންގ އޭރިއާ“ ގައެވެ. އަދި މިހާރު އެކަކު ހައްޔަރުކޮށްފައިވާ ކަމަށާއި، މި ހާދިސާ ހިނގަން މެދުވެރިވި ސަބަބު ތަހުގީގު ކުރަމުންދާ ކަމަށް އެ އިދާރާއިން ބުންޏެވެ. ނޫސްވެރިންގެ ބައްދަލުވުމުގެ ކުޑައިރުކޮޅެއް ކުރިން ޓްރަމްޕް ވަނީ ”ޓްރުތް ސޯޝަލް“ ގައި ހަމަލާދިން މީހާ ބިންމަތީގައި އޮތް ފޮޓޯއަކާއި، އޭނާ ސެކިއުރިޓީ ފޫއަޅުވާލާފައި ދުވާ މަންޒަރު ފެންނަ ސީސީޓީވީ ފުޓޭޖެއް އާންމުކުރައްވާފައެވެ.
މި މައްސަލައާ ގުޅިގެން ޑިސްޓްރިކްޓް އޮފް ކޮލަމްބިއާގެ އެޓަރނީ ޖީނީން ފެރިސް ޕިރޯ ވިދާޅުވީ، ހައްޔަރުކުރި މީހާގެ މައްޗަށް ހަތިޔާރު ބޭނުންކޮށްގެން ކުށެއް ކުރުމާއި ފެޑެރަލް އޮފިސަރުންނަށް ނުރައްކާތެރި ހަތިޔާރަކުން ހަމަލާދިނުމުގެ ދައުވާ އުފުލާނެ ކަމަށެވެ. އެފް.ބީ.އައިގެ ޑިރެކްޓަރު ކާޝް ޕަޓޭލް ވިދާޅުވީ ތަހުގީގު ޓީމުތަކުން އެމީހާގެ ފަސްފަހަތް ބަލަން ފަށާފައިވާ ކަމަށާއި، މިކަމާ ގުޅޭ އެއްވެސް މައުލޫމާތެއް އެނގޭ ފަރާތެއްވާނަމަ އެކަން ހިއްސާކުރުމަށް އެދޭ ކަމަށެވެ.
އެމެރިކާގެ މީޑިއާތަކުން ރިޕޯޓްކޮށްފައިވާ ގޮތުގައި މި ހަމަލާ ދިނުމުގެ ތުހުމަތުގައި ހައްޔަރުކޮށްފައިވަނީ ކެލިފޯނިއާގެ ޓޮރެންސްއަށް ނިސްބަތްވާ އުމުރުން 31 އަހަރުގެ ކޯލް ތޯމަސް އެލަން އެވެ.
