އިދިކޮޅު އެމްޑީޕީން ރޭ މާލޭގައި ކުރިއަށް ގެންދިޔަ މުޒާހަރާގެ ތެރެއިން މާލެ ސިޓީގެ މޭޔަރު އާދަމް އާޒިމަށް އަމާޒުކޮށް ދިން ހަމަލާއަށް 24 ގަޑިއިރު ވެގެން ދިޔައިރުވެސް، އެކަން މާލެ ސިޓީ ކައުންސިލުން ކުށްވެރިކޮށްފައި ނުވާތީއާއި ފުލުހަށް ހުށަހަޅާފައި ނުވާތީ ސަރުކާރުން ކަންބޮޑުވުން ފާޅުކޮށްފިއެވެ.
މި ހާދިސާ ހިނގުމާއެކު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އެކަން ހަރުކަށި އިބާރާތުން ކުށްވެރިކުރައްވާފައެވެ. މީގެ އިތުރުން ރާއްޖޭގެ ސިޔާސީ ގިނަ ޕާޓީތަކަކުން ވެސް މި ހަމަލާ ކުށްވެރިކޮށްފައިވެއެވެ. ނަމަވެސް، ހާދިސާ ހިނގިތާ ގިނަ ވަގުތުތަކެއް ވެގެންދިޔައިރުވެސް، އާޒިމް ނިސްބަތްވެވަޑައިގަންނަވާ އެމްޑީޕީގެ ފަރާތުން ނުވަތަ މާލެ ސިޓީ ކައުންސިލުން ވެސް މި މައްސަލަ ރަސްމީކޮށް ފުލުހަށް ހުށަހަޅާފައި ނުވާކަން ސަރުކާރުން ފާހަގަކުރެއެވެ.
މިކަމާ ގުޅޭގޮތުން މައުލޫމާތު ދެއްވަމުން ރައީސުލްޖުމްހޫރިއްޔާގެ އޮފީހުގެ ތަރުޖަމާނު މުޙައްމަދު ޙުސައިން ޝަރީފް (މުންދު) ވިދާޅުވީ، މިފަދަ ނުރައްކާތެރި ހާދިސާއެއް ހިނގާދިޔައިރުވެސް އެއްވެސް ރަސްމީ ފަރާތަކުން ފުލުހުންނަށް މައުލޫމާތު ހިއްސާކޮށްފައި ނުވާތީ ހިތާމަކުރައްވާ ކަމަށެވެ. މުޖުތަމައުގެ ސަލާމަތާއި ރައްކާތެރިކަން ކަށަވަރުކުރުމުގެ ގާނޫނީ މަސްއޫލިއްޔަތު އޮތް ފުލުހުންގެ މުއައްސަސާއަށް މިފަދަ ކަންކަން ރިޕޯޓުނުކުރުމަކީ ފުލުހުންގެ ޒިންމާ އަދާކުރުމަށް އެޅޭ ހުރަހެއް ކަމަށް އޭނާ ވިދާޅުވިއެވެ.
މުންދު އިތުރަށް ވިދާޅުވި ގޮތުގައި، މީސް މީޑިއާގައި ދައުރުވި ވީޑިއޯ ފުލުހުންނަށް ފެނުނު ހިސާބުން، ފުލުހުންގެ އަމިއްލަ އިސްނެގުމުގެ މަތިން މިހާރު ވަނީ މި މައްސަލަ ތަހުގީގު ކުރަން ފަށާފައެވެ.
މީގެ އިތުރުން، ދައުލަތުގެ އިސް މަގާމުތަކުގައި ތިއްބަވާ ބޭފުޅުންގެ ސެކިއުރިޓީއާ ގުޅޭގޮތުން ވާހަކަ ދައްކަވަމުން ތަރުޖަމާނު ވިދާޅުވީ، މާލެ ސިޓީގެ މޭޔަރަކީ އެދިވަޑައިގެންފިނަމަ ސެކިއުރިޓީ ލިބޭނެ ފަރާތެއް ކަމަށެވެ. އަދި ފުލުހުން އަބަދުވެސް ”ތްރެޓް އެސެސްމަންޓް“ ހަދަމުންދާ ކަމަށާއި، އެއްވެސް ބޭފުޅަކަށް ނުރައްކަލެއް އޮތްކަން ފާހަގަކުރެވިއްޖެނަމަ ފުލުހުން އިސްވެ ސެކިއުރިޓީ ހަމަޖައްސައިދޭނެ ކަމުގެ ޔަގީންކަން އޭނާ ދެއްވިއެވެ.
މި ހާދިސާއާ ގުޅިގެން އާންމުންގެ ފާޑުކިޔުން އެމްޑީޕީއަށް ވަނީ ވަރަށް ބޮޑަށް އަމާޒުވެފައެވެ. ސޯޝަލް މީޑިއާގައި ގިނަ ބަޔަކު ބުނަމުންދަނީ، މިއީ ސިޔާސީ މަންފާއެއް ހޯދުމަށް އެ ޕާޓީން ރާވައިގެން ހިންގާފައިވާ ކަމެއް ކަމަށް ތުހުމަތު ކުރެވޭ ކަމަށެވެ. މާޒީގައިވެސް މިފަދަ ހަމަލާތަކަކީ އެމްޑީޕީގެ އެކްޓިވިސްޓުން ލައްވައި ކުރުވާ ކަންކަން ކަމަށް ތުހުމަތުކުރާ ފަރާތްތަކުން ބުނަމުންދަނީ، މި މައްސަލަ ފުލުހަށް ހުށަނޭޅުމަކީ އެ ޕާޓީގެ އިޚްލާޞްތެރިކަމާ މެދު ސުވާލު އުފެދޭ ކަމެއް ކަމަށެވެ.
