ނަފްސާނީ ބަލި ތަހައްމަލްކުރަމުންދާ ފަރާތްތަކަށް އެހީތެރިކަން ފޯރުކޮށްދިނުމުގެ ގޮތުން އެ ފަރާތްތަކަށް ހާއްސަކޮށްގެން 1677 ހޮޓްލައިން ނަންބަރު ތައާރަފްކޮށްފިއެވެ.
ނޭޝަނަލް މެންޓަލް ހެލްތު ހެލްޕްލައިންގެ ހޮޓްލައިން ނަންބަރު 1677 ތައާރަފްކުރުމާއިއެކު މެދުކެނޑުމެއް ނެތި 24 ގަޑިއިރު ނަފްސާނީ އެހީތެރިކަން ފޯރުކޮށްދެމުން އަންނާނެއެވެ. މިކަމާ ގުޅިގެން ހެލްތް މިނިސްޓްރީން ނެރެފައިވާ ނޫސްބަޔާނެއްގައި ބުނެފައިވަނީ، ކޮންމެ އިންސާނެއްގެ ފުރާނައަކީ މަތިވެރި އަގުހުރި އަމާނާތެއް ކަމަށާއި، ދިރިއުޅުމުގެ ދަތުރުގައި ކޮންމެ މީހަކަށް ވެސް އުފަލާއި ހިތާމައިގެ ވަގުތުތަކާ ކުރިމަތިލާންޖެހޭނެ ކަމަށެވެ.
ކަން މިހެން އޮތުމާއެކު، މީސްމީޑިއާގައި ފަތުރާ ވާހަކަތަކާއި، ހިއްސާކުރާ މައުލޫމާތުތަކަކީ ނަފްސާނީ ގޮތުން ބަލިކަށިވެފައިވާ ފަރާތްތަކަށާއި، ވަކިވެދިޔަ ފަރާތްތަކުގެ އާއިލާތަކަށް ފޫނުބެއްދޭ ފަދަ އަސަރުތަކެއް ކުރުވާނެ ކަންތައްތަކެއް ކަމަށްވާތީ ހެލްތް މިނިސްޓްރީން ވަނީ އެކަން އެގޮތަށް ނުކުރުމަށް އިލްތިމާސްކޮށްފައެވެ.
ހެލްތް މިނިސްޓްރީން ބުނެފައިވަނީ، އާއިލާތަކާއި ރައްޓެހިން ގުޅިގެން އެކަކު އަނެކެއްގެ ހާލުބަލައި، އެއްވެސް ތަފާތުކުރުމެއް ނެތި އަޅާލުމުގެ އިތުރުން އަނެކާގެ ވާހަކަ ކަނުލާ އަޑުއެހުމަކީ ނުވަތަ ދެވޭ އޯގާތެރިކަމަކީ މީހެއްގެ ފުރާނަ ސަލާމަތްކުރުމަށް ލިބޭ ވަރަށް ބޮޑު ބާރަކަށް ވެގެންދާނެ ކަމަށެވެ.
މީގެއިތުރުން ގައުމެއްގެ ހައިސިއްޔަތުން، އެކަކު އަނެކެއްގެ ދުޅަހެޔޮކަން ރައްކާތެރިކުރުމަކީ އެންމެންގެ ޝާމިލު ޒިންމާއެއް ކަމަށާއި، ހަގީގަތެއް ނެތް ވާހަކަތައް ފެތުރުމުގެ ބަދަލުގައި ހަމްދަރުދީ އިސްކޮށް، ފާޑުކިޔުމުގެ ބަދަލުގައި އޯގާތެރިކަން، އަދި ބިރުވެރިކަމުގެ ބަދަލުގައި އުންމީދު ކުރިއަށް ނެރުމަށް ވެސް ހެލްތް މިނިސްޓްރީން ވަނީ އިލްތިމާސްކޮށްފައެވެ.
ނަފްސާނީ ދުޅަހެޔޮކަމަށް ދެވޭ ވަގުތީ އަދި ދާއިމީ ހިދުމަތްތައް އިތުރަށް ހަރުދަނާކުރުމަށް ފަންނީ ބޭފުޅުންނާއި، ކަމާ ގުޅުންހުރި މުއައްސަސާތަކާއެކު މަސައްކަތް ކުރަމުން އަންނަކަމަށް ހެލްތް މިނިސްޓްރީން ވަނީ އިތުރަށް ބުނެފައެވެ.
