ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަންގައި ކޮންގްރެސް ޕާޓީގެ ފަރާތުން ވާދަކުރާނެ ކެންޑިޑޭޓަކު ހޮވުމަށް މިއަދު ބޭއްވި ޕްރައިމަރީގައި އެ ދާއިރާގެ ކުރީގެ މެންބަރު މުޙައްމަދު ސިނާން ކާމިޔާބު ހޯއްދަވައިފިއެވެ.
ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި އިލެކްޝަންގައި ކޮންގްރެސް ޕާޓީގެ ފަރާތުން ވާދަކުރާނެެ ކެންޑިޑޭޓަކު ހޮވުމަށް މިއަދު ބޭއްވި ޕްރައިމަރީގައި ކޮންގްރެސް ޕާޓީގެ ފަރާތުން ސިނާނާއެކު އިތުރު ކެންޑިޑޭޓަކު ވަނީ ވާދަކުރައްވައިފައެވެ. އެއީ ހިތަދޫ މޫލެކެޑެ ދާއިރާގެ ކައުންސިލަރުގެ މަގާމުގައި ހުންނެވި އަޙްމަދު ސަޢީދު (ސޮޑާ) އެވެ.
މި އިންތިހާބުގައި ސަޢީދުގެ މައްޗަށް ސިނާން ކުރި ހޯއްދެވީ އެންމެ 27 ވޯޓުގެ ތަފާތަކުންނެވެ. އެގޮތުން ސިނާނަށް 226 ވޯޓު ލިބިފައިވާއިރު ސަޢީދަށް ލިބިފައިވަނީ 199 ވޯޓެވެ. އިލެކްޝަން ކޮމިޝަނުން ހާމަކޮށްފައިވާ ގޮތުގައި އެ ފޮށިތަކަށް ވޯޓުލުމުގެ ހައްގު ލިބިގެންވަނީ ޖުމުލަ 727 މީހުންނަށެވެ.
ފާހަގަކޮށްލެވޭ ގޮތުގައި ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ގޮނޑި ސިނާނަށް ގެއްލިފައިވަނީ، އޭނާއާއި އިތުރު އެހެން މީހަކުވެގެން އިސްލާމިކް ބޭންކު މެދުވެރިކޮށް ނަގާފައިވާ ލޯނަކަށް ދައްކަންޖެހޭ 2.5 މިލިއަން ރުފިޔާ ނުދެއްކުމުން، މި މަހުގެ 12 ވަނަ ދުވަހު ސުޕްރީމް ކޯޓުން ކުރި ހުކުމާ ގުޅިގެންނެވެ.
ކޮންގްރެސް ޕާޓީން މި ގޮނޑިއަށް ކެންޑިޑޭޓަކު ހޮވުމަށް ޕްރައިމަރީއެއް ބޭއްވި ނަމަވެސް، އިދިކޮޅު އެމްޑީޕީގެ ފަރާތުން މި ބައި-އިލެކްޝަންގައި ވާދަކުރައްވަނީ އައްޑޫ ސިޓީގެ ކުރީގެ މޭޔަރު ޢަބްދުﷲ ޞާދިޤު (ސޯބެ) އެވެ. ސޯބެ ފިޔަވައި އެހެން ބޭފުޅަކު އެމްޑީޕީގެ ފަރާތުން މި ގޮނޑިއަށް ވާދަކުރައްވާފައި ނުވާތީ، ޕްރައިމަރީއަކާ ނުލައި އޭނާއަށް ވަނީ އެ ޕާޓީގެ ޓިކެޓު ކަށަވަރުވެފައެވެ.
ހިތަދޫ އުތުރު ދާއިރާގެ ބައި-އިލެކްޝަން ބޭއްވުމަށް އިލެކްޝަންސް ކޮމިޝަނުން ނިންމާފައިވަނީ އަންނަ ޖޫން މަހުގެ ހަވަނަ ދުވަހުއެވެ.
