އިދިކޮޅު އެމްޑީޕީން ސިލްސިލާކޮށް މާލޭ ސިޓީގައި ކުރިއަށްގެންދާ މުޒާހަރާތަކުގެ ތެރެއިން ރޭ ކުރިއަށް ގެންދިޔަ މުޒާހަރާގައި، މީހަކު އައިސް މާލޭ ސިޓީގެ މޭޔަރު އާދަމް އާޒިމްގެ މޭގައި އަތްލާ ކޮށްޕާލުމާ ގުޅިގެން އެއީ ސަރުކާރުން ދުރާލާ ރާވައިގެން ދިން ވަރުގަދަ ހަމަލާއެއްގެ ގޮތުގައި މޭޔަރު އާޒިމް އެކަން ސިފަކުރައްވައިފިއެވެ.
އެމްޑިޕީން ރޭ ކުރިއަށްގެންދިޔަ މުޒާހަރާގައި ބައިވެރިވަމުން ދަނިކޮށް، މީހަކު އައިސް މޭޔަރު އާޒިމްގެ މޭމަތީގައި އަތްއަޅައި ކޮށްޕާލިއެވެ. އެ ވަގުތު އާޒިމް ކައިރީގައި ތިބި މީހުން ވަނީ އޭނާގެ ހިމާޔަތުގައި އެ މީހާއަށް ބަދަލުގައި ހަމަލާދީ މާރާމާރީ ހިންގާފައެވެ. މުޒާހަރާ ނިންމާލުމަށްފަހު މީޑިއާތަކަށް ދެއްވި އިންޓަރވިއުއެއްގައި އާޒިމް ވިދާޅުވީ، މާލޭ ސިޓީގައި ކޮންމެ ރެއަކު މުޒާހަރާ ކުރަނީ ސަރުކާރުން ކުރާ ކަންކަން ގޯސްވީމާ އެ ކަންކަން އިސްލާހުކުރުމަށް ކަމަށެވެ.
”މުޒާހަރާގެ ތެރެއިން ގުރޫޕަކުން އައިސް އަޅުގަނޑު މޭމަތީގަ ޖެހީ. ދެން އެވަގުތު ކައިރީގަ ތިބިމީހުން އަޅުގަނޑަށް ހިމާޔަތްދިން. އަޅުގަނޑު ޤަބޫލުކުރަނީ މިއީ ސަރުކާރުން ރާވައިގެން ކުރިކަމެކޭ“ – އާޒިމް ވިދާޅުވިއެވެ.
މި ހާދިސާއާ ގުޅިގެން ”އެކި އެމްވީ“ ގެ ފަރާތުން މޭޔަރު އާޒިމާއި އެމްޑީޕީގެ އިސް ފަރާތްތަކަށް ގުޅާލުމުން އެ ފަރާތްތަކުން ފޯނަށް ޖަވާބު ނުދެއްވާތީ މިކަމުގައި އެ ފަރާތްތަކުގެ ބަހެއް ލިބޭގޮތް ވަނީ ނުވެފައެވެ.
މޭޔަރު އާޒިމަށް ހަމަލާދިން މައްސަލައާ ގުޅިގެން އާޒިމްގެ އިތުރުން އެމްޑީޕީގެ އިސް ފަރާތްތަކުން އެކަމަކީ ސަރުކާރުން ރާވައިގެން ކުރި ކަމެއްގެ ގޮތުގައި ދޭހަވާ ގޮތަށް ވާހަކަދައްކަވަމުން އަންނާތީ ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސްޕަރސަން މުޙައްމަދު ޙުސައިން ޝަރީފް (މުންދު) ވިދާޅުވީ، މޭޔަރު އާޒިމް އެ ހައްދަވަނީ އިތުރުފުޅެއް ކަމަށާއި، ސިޔާސީ ހަރަކާތެއްގެ ތެރެއިން އެއްވެސް ފަރާތަކަށް ވަކިން ހާއްސަކޮށް މޭޔަރު އާޒިމް ފަދަ ރައްޔިތުން ހޮވާފައި ހުންނެވި ބޭފުޅަކަށް އެފަދަ ހަމަލާއެއް ދިނުން ކުށްވެރިކުރައްވާ ކަމަށެވެ.
”ހަމަލާ ދިނީ ސަރުކާރުންނޭ މޭޔަރު އެ ވިދާޅުވި ވާހަކަ އެއީ ވަރަށް ދަށުދަރަޖައިގެ ވާހަކައެއް، ކަނޑައެޅިގެން އެއީ އިތުރުފުޅެއް،“ – މުންދު ވިދާޅުވިއެވެ.
ސަރުކާރުގެ ބޮލުގައި މިފަދަ ބޮޑު ބަދުނާމެއް އެޅުވުމުގެ ސަބަބުން މޭޔަރު އާޒިމަށް ވަނީ ގިނަ ބައެއްގެ ފާޑުކިއުންތައް ވެސް އަމާޒުވެފައެވެ. ވަކިން ހާއްސަކޮށް ފުލުހުންގެ ތަހުގީގަކާ ނުލައި، ރައްޔިތުން އިންތިހާބުކޮށްފައިވާ މަގާމެއްގައި ހުރެމެ މޭޔަރު އާޒިމް މިފަދަ ވާހަކަތައް ދެއްކުމަކީ އެއްވެސް ހާލެއްގައި ބަލައިގަނެވޭނެ ކަމެއް ނޫން ކަމަށާއި މިކަމުގައި މޭޔަރު އާޒިމް މައާފަށް އެދިވަޑައިގަންނަވަން ޖެހޭ ކަމުގައި ވެސް ގިނަ ބަޔަކު އަންނަނީ ބުނަމުންނެވެ.
މީގެ އިތުރުން މިކަމަކީ މޭޔަރު އާދަމް އާޒިމް ދުރާލާ ކުރިން ރާވައިގެން ”ސިމްޕަތީ ހޯދަން ކުޅެފައިވާ ޑްރާމާ“ އެއް ކަމަށް ބުނެ މީސް މީޑިއާގެ އެކި މަންސަތަކުގައި ވެސް ވަރަށް ގިނަ ފަރާތްތަކުން ވަނީ މޭޔަރަށް ވަރަށް ބޮޑަށް ފާޑުކިޔަމުންނެވެ.
