ރާއްޖެއިން ބޭރުގެ ފަރާތްތަކަށް ދައްކަންޖެހޭ ބޮޑެތި ލޯނުތަކެއް ކުރު މުއްދަތެއްގެ ތެރޭގައި ދައްކައި ޚަލާޞްކުރުމާ ގުޅިގެން، ދިވެހިރާއްޖެއިން ޖަޕާނަށް ކަނޑައަޅުއްވާފައިވާ ސަފީރު އަދި، ކުރީގެ ޔޫތު މިނިސްޓަރު އަޙްމަދު މަޚުލޫފް ރައީސުލްޖުމްހޫރިއްޔާ ޑރ. މުޙައްމަދު މުއިއްޒަށް ވަރަށް ބޮޑަށް ތައުރީފް ކުރައްވައިފިއެވެ.
މަޚުލޫފް ކުރެއްވި ސޯޝަލް މީޑިއާ ޕޯސްޓެއްގައި ވިދާޅުވީ، ދައުލަތުގައި ފައިސާ ނެތް ކަމަށާއި، ދަރަނި އަދާކުރާނެ ގޮތެއް ނުވަތަ ދުވަހެއް ނޭނގޭ ކަމަށް ބުނެ ބައެއް ފަރާތްތަކުން އިއްޔެއާ ހަމައަށްވެސް ވަރަށް ބޮޑަށް ފާޑުކިޔަމުންދިޔަ ކަމަށެވެ. ނަމަވެސް އެ ހުރިހާ ވާހަކަތަކަކަށް ހައްލު ހޯއްދަވައިދެއްވައި، ރައީސް މުއިއްޒު ވަނީ ޤައުމުގެ މާލީ ހާލަތު ބަދަލުކޮށްދެއްވާފައި ކަމަށް އޭނާ ފާހަގަކުރެއްވިއެވެ.
ކޮންމެ ސަރުކާރަކުން ނެގި ކަމުގައިވިޔަސް، ހާލަތާ ގުޅޭގޮތުން ލޯނު ނެގުމަކީ މައްސަލައެއް ކަމަށް ނުދެކޭ ކަމަށް މަޚުލޫފް ވިދާޅުވިއެވެ. އެހެންނަމަވެސް، އެ ލޯނުތައް އަދާކުރުމުގެ ބުރަ ދަޢުލަތަށް ކުރިމަތިވި މި ނާޒުކު ވަގުތު، ރައީސް މުޢިއްޒު ވަނީ ކުރު މުއްދަތެއްގެ ތެރޭގައި 1 ބިލިއަން ޑޮލަރުގެ ދަރަނިން ދިވެހި ރައްޔިތުން ސަލާމަތްކޮށްދެއްވާފައި ކަމަށް އޭނާ ވިދާޅުވިއެވެ.
”މިދަރަނިތައް އަދާނުކުރެވުނުނަމަ، ރާއްޖެއަށް ކުރިމަތިވާނެ ދަތިތަކާ ގޮންޖެހުންތައް އަންދާޒާވެސް ކޮށްނުލެވޭނެ،“ މަހުލޫފް ވިދާޅުވިއެވެ.
މި ކާމިޔާބީއަށްޓަކައި ރައީސް މުއިއްޒަށް ޝުކުރު އަދާކުރައްވަމުން، މަޚުލޫފް ވަނީ މިއީ ދިވެހި ހުރިހާ ރައްޔިތުންނަށް ލިބުނު ބޮޑު ކާމިޔާބީއެއްގެ ގޮތުގައި ސިފަކުރައްވައި، ރައްޔިތުންނަށް މަރުޙަބާ ދަންނަވާފައެވެ.
ފައިސާ ނެތް، ދަރަނި އަދާކުރާނެގޮތެއް ނެތް، އަދާކުރެވޭނެ ދުވަހެއް ނޭގެ، ފައިސާ ހޯދާނެގޮތެއް ނެތް. މިއީ ބައެއް ފަރާތްތަކުން އިއްޔެއާއި ހަމައަށްވެސް ވަރަށް އަޑުހަރުކޮށް ކިޔަމުންދިޔަ ލަވައެއް.
ކޮންމެ ސަރުކާރަކުން ނެގިޔަސް، ހާލަތާގުޅޭގޮތުން ލޯނު ނެގުމަކީ މައްސަލައެއްކަމަށް އަޅުގަނޑު… pic.twitter.com/wbiP1xAvpK
— Ahmed Mahloof (@AhmedMahloof) April 24, 2026
ރައީސް ޑރ. މުޢިއްޒުގެ ސަރުކާރުން އިޤްތިޞާދީ އިސްލާޙީ ފިޔަވަޅުތައް އަޅަމުންދާ މި ދަނޑިވަޅުގައި، ބޭރުގެ ދަރަނިތައް ދެއްކުމަކީ ރާއްޖޭގެ ކްރެޑިޓް ރޭޓިން ރަނގަޅުވެ، ބައިނަލްއަޤުވާމީ މާލީ އިދާރާތަކުގެ އިތުބާރު ލިބިގެންދާނެ ކަމެއް ކަމަށް އިޤްތިޞާދީ މާހިރުންވެސް ފާހަގަކުރެއެވެ.
