ރައީސް ޑރ. މުހައްމަދު މުއިއްޒުގެ ސަރުކާރުގެ ކެބިނެޓަށް މި ފަހުން ގެންނެވި ބޮޑެތި ބަދަލުތަކާއެކު ސަރުކާރު ވާނީ ވަރުގަދަ ކަމަށް ސަރުކާރުގެ ޗީފް ސްޕޯކްސްޕާސަން މުހައްމަދު ހުސައިން ޝަރީފް (މުންދު) ވިދާޅުވެއްޖެ އެވެ.
ކައުންސިލް އިންތިހާބާއި ރެފެރެންޑަމްގެ ވޯޓަށް ފަހު، ސަރުކާރުގެ ބައެއް ވަޒީރުން އިސްތިއުފާ ދެއްވަން ރައީސް އެންގެވުމުން އެ ވަޒީރުން އިސްތިއުފާ ދެއްވުމުން އާ ކެބިނެޓް އެކުލަވާލައި 15 އަށް އަދަދު ވަނީ މަދުކޮށްފައެވެ. ބައެއް ވަޒީރުން އަލަށް އައްޔަނުކުރެއްވިއިރު، ކުރިންވެސް ތިއްވެބި ބައެއް ވަޒީރުން މެންޑޭޓް އިތުރުކުރައްވައި އަލުން އައްޔަނު ކުރެއްވިއެވެ.
ދައުރު ނޫހުން ގެނެސްދިން ”އެއްބަސްވެ ދެ ބަސްވަމާ“ ޕްރޮގްރާމްގައި މުންދު ވިދާޅުވީ، ކެބިނެޓަށް ބަދަލުތަކެއް ގެންނެވީ ސަރުކާރުގެ ރީފޯމް އެޖެންޑާގެ ތެރެއިން ކަމަށެވެ.
ކެބިނެޓަށް އައި ބަދަލާއެކު، ސަރުކާރު ފެންނާނީ ކޮންގޮތަކަށްތޯ ސުވާލުކުރުމުން މުންދު ވަރަށް ކުރުކޮށް ވިދާޅުވީ“ ސްޓްރޯންގް ވާނީ“ ކަމަށެވެ.
އެކަމުގެ ތަފްސީލު ދެއްވަމުން މުންދު ވިދާޅުވީ، ކެބިނެޓް ކުޑަކޮށް ބައެއް މިނިސްޓްރީތަކުގެ މެންޑޭޓަށް ގުޅުންހުރި ބަދަލުތަކެއް ގެނައުމުން ކުރިން އުނދަގުލުންވާ ކަންކަން ފަސޭހައިންވާނެކަން ރައްޔިތުން ގަބޫލުކުރާނެ ކަމަށެވެ.
މުންދު ވިދާޅުވީ، މީގެ ކުރިން މިނިސްޓްރީތަކުގެ މަސައްކަތް ބައްޓަންކުރެވިފައި އޮތީ، ވައުދުތައް ފުއްދުމަށްވުރެ އެހެން ބައެއް ކަންކަމަށް އިސްކަންދެވޭ ފަދަ ގޮތަކަށް ކަމަށެވެ. ނަމަވެސް ކައުންސިލް އިންތިހާބާއި ރެފަރެންޑަމްގެ ވޯޓުގެ ނަތީޖާއާއެކު، ބަދަލުތަކެއް ސަރުކާރަށް ގެންނަން ޖެހޭ ކަމަށް ރައްޔިތުން ބުނެފައިވާ ކަމަށާއި އެ ސަބަބާހުރެ ރައީސް މުއިއްޒު މިހާރު ވަނީ ރައްޔިތުންގެ ވިންދާ އެއްގޮތަށް ބަދަލުތައް ގެނައުމުގެ މަސައްކަތް ފައްޓަވާފައި ކަމަށެވެ.
”މިހާރު ވަޒީރުންނަށް ރައީސް ވަނީ ވަރަށް ކްލިއާ އިންސްޓްރަކްޝަނެއް ދެއްވާފައި. އެއީ މެނިފެސްޓޯއަށް ފޯކަސް ކުރައްވާށޭ“ މުންދު ވިދާޅުވިއެވެ.
މުންދު ވިދާޅުވީ، ރެފެރެންޑަމްއިން ބަލިވި ނަމަވެސް، އެއީ ރައްޔިތުންގެ ތާއީދު ސަރުކާރަށް ނެތުން ނޫން ކަމަށެވެ.
މުންދު އިތުރަށް ވިދާޅުވީ، ރެފެރެންޑަމްގެ ވޯޓާއި ކައުންސިލްސިލް އިންތިހާބުގެ ވޯޓު އެކުގައި ބޭއްވުމުންވެސް، ނަތީޖާއަށް އަސަރުތަކެއް ކުރި ކަމަށެވެ.
