”ޓެކްސީ ނަފާ“ ލޯނު ސްކީމްގެ ދަށުން ދޫކޮށްފައިވާ ކާރުތައް ރަޖިސްޓަރީ ނުކުރެވި ލަސްވާ މައްސަލައާއި، އެކަމުގެ ސަބަބުން ލޯނު ނެގި ފަރާތްތަކަށް ކުރިމަތިވަމުންދާ ތަކުލީފުތަކަށް އަވަސް ހައްލެއް ހޯއްދަވައިދެއްވާނެ ކަމުގެ ޔަގީންކަން އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ދެއްވައިފިއެވެ.
މިނިސްޓަރު ސަޢީދު މިހެން ވިދާޅުވީ، ހއ. ދިއްދޫ، މުތީގެ، އާދަމް ސަލީމް ސޯޝަލް މީޑިއާ މެދުވެރިކޮށް މިނިސްޓަރަށް ފޮނުއްވި ހާއްސަ ސިޓީއަކަށް ދެއްވި ޖަވާބުގައެވެ.
އާދަމް ސަލީމް ފޮނުއްވި ސިޓީގައި ފާހަގަކުރައްވާފައިވަނީ، ގްރޭޓަރ މާލޭ ސަރަހައްދުގައި ޓެކްސީ ވިޔަފާރި ފެށުމަށް ދޫކުރި މި ލޯނުގެ ދަށުން ލިބުނު ކާރުތައް ރަޖިސްޓަރީ ނުކުރެވި ގިނަ ދުވަސްވަމުންދާ ކަމަށެވެ. އަދި ކާރުތައް ރަޖިސްޓަރީ ނުވެ، ވިޔަފާރި ނުފެށި އޮތް ނަމަވެސް، ލޯނު ދޫކުރި ފަރާތްތަކުން ލޯނު އަނބުރާ ދެއްކުމަށް ތަކުރާރުކޮށް ބާރު ފޯރުވަމުންދާ ކަމުގެ ކަންބޮޑުވުން އޭނާ ވަނީ ފާޅުކުރައްވާފައެވެ.
މި މައްސަލައިގައި އާދަމް ސަލީމް ހުށަހަޅާފައިވާ މައިގަނޑު ކަންތައްތަކުގެ ތެރޭގައި:
- ކާރުތައް ރަޖިސްޓަރީ ވަންދެން ލޯނު ދެއްކުން ފަސްކޮށްދިނުން (މޮރެޓޯރިއަމްއެއް ހަމަޖެއްސުން).
- ރަޖިސްޓްރޭޝަންގެ ކަންކަން އަވަސްކުރުމަށް ޓްރާންސްޕޯޓް މިނިސްޓްރީއާ ގުޅިގެން މަސައްކަތް ކުރުން.
- ރަޖިސްޓްރޭޝަން ލަސްވަނީ ސަރުކާރުގެ އިދާރާތަކުން ކުރަންޖެހޭ ކަންކަން ލަސްވުމުން ކަމަށްވާތީ، އޭގެ ޒިންމާ ލޯނު ނެގި ފަރާތްތަކުން އުފުލަން ނުޖެހޭ ގޮތް ހެދުން.
މި ސިޓީއަށް ރައްދު ދެއްވަމުން މިނިސްޓަރު ސަޢީދު ވިދާޅުވީ، ސިޓީގައި ފާހަގަކޮށްފައިވާ ކަންކަމަކީ އިންސާފުވެރިކަމާއެކު ބަލަންޖެހޭ ކަންތައްތަކެއް ކަމަށާއި، އެކަންކަމަށް އެންމެ އަވަސް ހައްލެއް ހޯއްދަވައިދެއްވުމަކީ އެމަނިކުފާނުގެ އިސް ވާޖިބެއް ކަމުގައި ދެކެވަޑައިގަންނަވާ ކަމަށެވެ. އަދި ޓްރާންސްޕޯޓް ދާއިރާގެ ކަންކަން ބަލަހައްޓަވާ މަސްއޫލުވެރިންނަށް މި މައްސަލަ ބައްލަވައިދެއްވުމަށް މިހާރު ދަންނަވާފައިވާނެ ކަމަށްވެސް މިނިސްޓަރު ވިދާޅުވިއެވެ.
بسم الله الرحمن الرحيم
އަލްފާޟިލް އާދަމް ސަލީމް (މުތީގެ / ހއ.ދިއްދޫ) އަށް،
ވެދުން ސަލާމަށް ފަހު ދަންނަވަމެވެ.އަޅުގަނޑަށް އެޑްރެސްކުރައްވާ މީސްމީޑިއާގައި ޝާއިޢުކުރެއްވި ސިޓީއާ ގުޅިގެން ދަންނަވަމެވެ.
އެ ސިޓީގައި ފާހަގަކުރައްވާފައިވާ ކަންކަން އިންސާފުވެރިކަމާއެކުގައި ބަލައި،… https://t.co/jxAbbDL1np
— Mohamed Saeed (@em_saeed) April 24, 2026
މިނިސްޓަރު އިތުރަށް ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ އަމާޒަކީ ރައްޔިތުންގެ އަޑުއަހައި، ރައްޔިތުންނަށް ދިމާވާ މިފަދަ ދަތިތަކަށް ގާނޫނާއި ގަވާއިދުގެ ތެރެއިން އަވަސް ހައްލުތަކެއް ހޯދައިދިނުން ކަމަށެވެ.
މި ސްކީމަކީ އާންމު ރައްޔިތުންގެ ދިރިއުޅުމުގެ ހާލަތު ރަނގަޅުކުރުމަށް ތައާރަފްކުރި ސްކީމަކަށް ވާއިރު، އިދާރީ މައްސަލަތަކާ ހުރެ ރައްޔިތުންނަށް އިތުރު ތަކްލީފުތަކެއް އުފުލަންޖެހުމަކީ ސަރުކާރުން ބޭނުންވާ ގޮތް ނޫންކަން މިނިސްޓަރުގެ ވާހަކަފުޅުން ފާހަގަކުރެވުނެވެ.
