ދިވެހި މުޖުތަމަޢުގައި ފަހަކަށް އައިސް ހިނގަމުންދާ ނަފްސާނީ ގޮތުން އަސަރުކުރުވާފަދަ ހިތާމަވެރި ޙާދިސާތަކާ ގުޅިގެން، މިނިސްޓްރީ އޮފް ހެލްތުން ކަންބޮޑުވުން ފާޅުކޮށް ނޫސްބަޔާނެއް ނެރެފިއެވެ.
މިކަމާ ގުޅިގެން އެ މިނިސްޓްރީން މިއަދު ނެރުނު ނޫސްބަޔާނެއްގައި، މިފަދަ ނާޒުކު ދަނޑިވަޅުތަކުގައި އެކަކު އަނެކަކަށް ހަމްދަރުދީއާއި ޒިންމާދާރުކަމާއެކު އޯގާތެރިކޮށް މުޢާމަލާތް ކުރުމަށް ހުރިހާ ފަރާތްތަކަށް ވަނީ އިލްތިމާސްކޮށްފައެވެ. ކޮންމެ އިންސާނެއްގެ ފުރާނައަކީ މަތިވެރި އަދި އަގުހުރި އަމާނާތެއްކަން ފާހަގަކުރައްވައި، ދިރިއުޅުމުގެ ދަތުރުގައި ކޮންމެ މީހަކަށްވެސް އުފަލާއި ހިތާމައިގެ ވަގުތުތަކާ ކުރިމަތިލާންޖެހޭނެކަމަށް މިނިސްޓްރީން ބުނެފައިވެއެވެ.
ހެލްތް މިނިސްޓްރީން ވަނީ މީސްމީޑިއާގައި ފަތުރާ ވާހަކަތަކާއި މަޢުލޫމާތުތަކާމެދު ސަމާލުވުމަށް އެދިފައެވެ. އެގޮތުން، ޙަޤީޤަތެއް ނެތް ވާހަކަތަކާއި ހިތްދަތި މަންޒަރުތައް ފެތުރުމަކީ ނަފްސާނީ ގޮތުން ބަލިކަށިވެފައިވާ ފަރާތްތަކަށާއި ވަކިވެދިޔަ ފަރާތްތަކުގެ ޢާއިލާތަކަށް ފޫނުބެއްދޭ ފަދަ ހިތްދަތި އަސަރުތަކެއް ކުރާނެ ކަމެއް ކަމަށް ބަޔާނުގައިވެއެވެ. ވީމާ، ކަށަވަރުނުވާ މަޢުލޫމާތު ފެތުރުމުގެ ބަދަލުގައި، އުއްމީދާއި ހިތްވަރު ދިނުމުގެ މެސެޖުތައް އިސްކުރުމަށް ޢާންމުންނަށާއި މީޑިއާތަކަށް ވަނީ ބާރުއަޅާފައެވެ.
”ޙަޤީޤަތެއް ނެތް ވާހަކަތަކުގެ ބަދަލުގައި ހަމްދަރުދީ އިސްކޮށް، ފާޑުކިޔުމުގެ ބަދަލުގައި އޯގާތެރިކަން އަދި ބިރުވެރިކަމުގެ ބަދަލުގައި އުއްމީދު ކުރިއަށް ނެރުއްވާށެވެ،“ މިނިސްޓްރީގެ ބަޔާނުގައިވެއެވެ.
މީގެ އިތުރުން، ޢާއިލާތަކާއި ރައްޓެހިން އަދި މުޅި މުޖުތަމަޢު ގުޅިގެން އެކަކު އަނެކެއްގެ ޙާލުބަލައި، އޯގާތެރިކަމާއެކު އަޑުއަހާލުމަކީ މީހެއްގެ ފުރާނަ ސަލާމަތްކުރުމަށް ލިބޭ ބޮޑު ބާރަކަށް ވެގެންދާނެ ކަމަށްވެސް ބަޔާނުގައި ފާހަގަކޮށްފައިވެއެވެ. ނަފްސާނީ ގޮތުން ދަތި ޙާލަތެއް ތަޙައްމަލު ކުރަމުންދާ ފަރާތްތަކަށް، އެ ފަރާތްތަކަކީ އެކަނިވެރި ބައެއް ނޫންކަން ހަނދާންކޮށްދެމުން، ލަސްނުކޮށް އެހީތެރިކަން ހޯދުމަށް ވަނީ އިލްތިމާސްކޮށްފައެވެ.
އެހީތެރިކަން ބޭނުންވާ ފަރާތްތަކަށް ’ނޭޝަނަލް މެންޓަލް ހެލްތު ހެލްޕްލައިން‘ 1677 މެދުވެރިކޮށް 24 ގަޑިއިރު ނަފްސާނީ އެހީތެރިކަން (Psychological First Aid) ލިބޭނެ އިންތިޒާމު މިހާރު ވަނީ ހަމަޖެހިފައެވެ.
ހެލްތް މިނިސްޓްރީން އިތުރަށް ބުނެފައިވަނީ، ނަފްސާނީ ދުޅަހެޔޮކަމަށް ދެވޭ ޚިދުމަތްތައް ހަރުދަނާކުރުމަށް ފަންނީ ބޭފުޅުންނާއި ގުޅުންހުރި މުއައްސަސާތަކާއެކު މަސައްކަތް ކުރަމުންދާ ކަމަށެވެ. އަދި ދެމެހެއްޓެނިވި ގޮތެއްގައި އެހީތެރިކަން ފޯރުކޮށްދެވޭނެ ހަރުދަނާ ނިޒާމެއް ބިނާކުރުމަކީ ސަރުކާރުގެ މުހިންމު އަމާޒެއް ކަމުގެ ޔަޤީންކަންވެސް އެ މިނިސްޓްރީން ވަނީ ދީފައެވެ.
