ރާއްޖޭގެ ރަށްރަށުގައި ގާވެފައި ހުރި މަޝްރޫއުތައް ބަލައި އެ މަޝްރޫއުތައް އަލުން ހިންގަވާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެެއްޖެއެވެެ.
ރައްޔިތުންގެ މަޖިލީހަށް މިއަދު އިއްވެވި ރިޔާސީ ބަޔާނުގައި ރައީސް ޑރ. މުޙައްމަދު މުޢިއްޒު ވިދާޅުވީ އިންތިޚާބުތަކާ ދިމާކޮށް ކަޑަޖަހާ އުސޫލުން، ވޯޓު ހޯދަން ދަޅަދައްކާ އުސޫލުން، ޢުމްރާނީ ތަރައްޤީގެ މަސައްކަތްތަކެއް ރަށްރަށުގައި ފަށާފައި އެބަހުރި ކަމަށެވެ. އެގޮތުން އެފަދަ ގިނަ މަޝްރޫއު ތަކެއްގެ މަސައްކަތްތައް ވަކި ހިސާބަކުން ހުއްޓިފައިވާ ކަމަށް ރައީސް މުޢިއްޒު ވިދާޅުވިއެވެ.
މަގުހަދަން، ނޫނީ ނަރުދަމާގެ ޚިދުމަތްދޭން ކޮނުނު ތަންތަން އެގޮތަށް ހުންނަތާ އެތައް އަހަރެއްވެ، މަސައްކަތްތަކަށް ގެނައި އާލާތްތަކާއި ތަކެތި ހަލާކުވެ، މުޅި ދައުލަތަށާއި ރައްޔިތުންނަށް އެކަމުގެ ގެއްލުމާއި ތުރާ ލިބެމުންދާ މަޝްރޫޢުތައް މަދެއްނޫން.
– ރައީސް ޑރ. މުޢިއްޒު
މީގެ އިތުރުން ރައީސް ޑރ. މުޢިއްޒު ވިދާޅުވީ ރާއްޖޭގެ ހުރިހާ ރަށެއްގައި އެ ގޮތަށް ގާވެފައި ހުރި މަޝްރޫޢުތައް ބަލަމުންދާ ކަމަށެެވެ. އެމަޝްރޫއުތައް ބެެއްލެވުމަށްފަހު ރައްޔިތުން އެދޭގޮތަށް އެމަޝްރޫޢުތައް އަލުން ހިންގައިދޭނެ ކަމުގެ ޔަގީންކަން ރައީސް ދެއްވިއެވެ.
